بحاول اجمع شتات زكريات قديمه
وحابي احكي واقع معاش في ريف بلدنا الجميل
بت حلتنا
بلسان بكري
....
دق الباب وبي لهفه فتحته الباب وكان عمك سعيد زول معروف لمن يدق بابك بكون في خبر ياسمح ياشين
عمك سعيد ده راجل بركه بس من سؤ حظو كان قاعد في دكان عمك بخيت وعمك بخيت ده الزول ااوحيد المركب تلفون
وكان اي زول في الخرطوم ف السعوديه عاوز زول في البلد بتصل دكان عمك بخيت
انفضل عمي سعيد
حبابك انشالله خير
قالي ياولدي خير انشالله اتصل عمك عثمان
وقال يكلمو ابوك بعد صلاة المغرب بدور يكلمو
قلت ليهو ابوي الايام دي في الخلا عندو حراته بجهز للموسم
قالي خلاص تعال انت اتكلم مع عمك
قلت ليهو خير
امي كانت بتخاف شديد من اي حاجه بكري هوووي يابكري انت ياولد اطرش مابترد خبارك
ضحكته قلت ليها برد عليك بس انتي ما اديتيني فرصه
ده منو الدقه الباب
قلت ليها عمي سعيد
امي سمعة عمي سعيد واتسمرت في مكانه
سجمي انشالله خير
مايكون في زول عندو حاجه.
ياولد قشري ياتفتح خشمك ده عمك سعيد بدور شنو
قلت ليها قال عمي عثمان بدور ابوي ف التلفون
امي انشالله خير
خلاص يابكري تمشي تتكلم مع عمك
واوعك تطير جاي ولي جاي تجي تكلمني
امي قال بتصل بعد المغرب
بقت امي تدخل وتطلع لمن دوشتني
امي لسه المغرب بعيد
وانشالله خير
عمي عثمان امكن مرسل لي ابوي قروش الحواشه
وامكن جايب لي عقد عمل وضحكته
قالت لي وحات الله همك بارد
انا قلبي مقطوع وانت تضحك
تضحك بلا سنينات شاحده ربي عليك
الحمدلله المغرب ازن
امي هوووي يابكري طير بي سراع شوف عمك عثمان بدور شنو من ابوك
خير يا امي بس البس جلابتي
جلابيتك لي شنو طير بي عراقيك ده
المهم فضلت امي وراي لمن طلعته
وانا ماشي وهي وراي بكري ماتمشي تتدمس مع الصعاليق في الدكان
تجي تكلمني وبعدين طير ارجع
قلت ليها حاااااضر امي
وانا في الطريق قابلتني رنا بت استاز حسن
وكانت رنا عباره عن نسمه
في اي مكان اشوفه حيلي بموت وبحس بي رعشه من صوف راسي لي كرعي
عمرها 16 سنه تانيه ثانوي
المهم بقيت ماشي واتلفت لمن دقشني حيدر وحيدر ده زول النوع البسعلك اتغديتو بي شنو
زول عباطه ولياقه مبالغ فيها
اختصرتو
ناداني عمي سعيد بكري اسرع عمك اتصل
جريت مدي لي التلفون
الو الووو
جاني صوت عمي عثمان
منو احمد
طبعا احمد ده اسم ابوي
قلت ليهو لا عمي عثمان انا بكري ود احمد
المهم طايبني وقالي بكري وين ابوك قلت ليهو مشي يجهز الواطه للموسم
قالي شوفي يابكري انا حجزته لي اولادي الاسبوع الجاي
لو ابوك جا يمشي يستقبلم في المطار ويجيبم البلد
وكمان لو ما جا تمشي انت
قلت ليهو خير عمي
ماتشيل هم
وقالي كلم امك تفتح ليهم البيت الفوق ينزلو فيهو
بس والتلفون قطع
بس صوت عمي عثمان مكان مريحني
ناداني عمي سعيد علي جمبه
شوف ياولدي عمك عثمان باقي زولي من زمان
واتكلم معاي قبل تجي
شوف عمك سوي حادث
ومرتو ولدو الصغير ماتو
وباقي اولادو كويسين
هو قال يرسل ديل وهو بخلص اجراتو وبجي لاحقم
طبعا انا حيلي مات وبقيت ماعارف اتصرف كيف
وصلته البيت وفي اقل من دقيقه امي بي زغريته وحدي وبكيه وحدي لمت حريم البلد
وبقي فراش عديل
وناس تعزي وناس تسال الخبر عرفتو كيف
امكن ده كلام ساي
اتاكدتو
كدي ود الخزين ده اخوهو مع عثمان في الدمام
خلو يدق لي اخوهو
المهم ود الخزين نطي
واختفي ورجع بعد ساااعه
قال ياجماعه والله اسه كنت بتكلم مع سالم اخوي
قالي يازول مافي شي
الكلام ده جبتو من وين
الصباح شفته عثمان ومرتو واقفين جنب اابقاله
وبقي الناس تدخل وتمرق
مشو نادو عم سعيد من الدكان
لمن لقي الناس مالين الديوان والحريم يبكو
قالي انشالله خير ياناس
المات منو
يازول كيف الكلام ده انت ماقلت لي بكري ود احمد ده عمك عثمان عمل حادث ومرتو ولدو الصغير مات
ياناس استهدو بالله
بكري مطرطش
عثمان قالي جارتنا هي واولاده عملو حادث وهي ولده الصغير اتوفو
بس مرت عثمان جايه عرس اخوها واجازت المدارس
الناس كلهم قبلو علي
بكري يازول انت مجنون
اسه كلام عمك سعيد ده ما واضح
والله زي الكبو فيني جردل مويه باااارد
دخلته لي امي
هووووي امي
يا امي
دفرني خالي خالد
علويه يامره انتي مجنونه
تسمعي كلام الولد المطرطش ده
غايتو انا لحدي اسه ماعارف مرت عمي عثمان ماتت ولي حيه
عمي سعيد بتاع الدكان كزب علي ولي كزب علي ااناس
الحمدلله الناس اتفرقو
امي قشري شكيت علي الله يا المبرعم
وحات الله راسي ينتح زي الداقه فيهو نوبه
بكري اسوي فيك شنو
بس في كلامه معاي ابوي جا داخل
ياناس ده كلام شنو
جا محسن كلمني وركبته بوكسي المشروع كتر خيرم نزلوني في الشارع
مشيت لي سعيد
واتصلنا علي عثمان اخوي
يضحك قالي بكري عاوز يقتل المره قبل يومه
ياخ جارتم ياحيوان
حت السمع ده ماك ناجح فيهو
طبعا كرهته عمري
ابوي قالي جهز نفسك بكره تمشي معاي الحواشه
يتبع......
