هل مازلت في قلبك

البارت 30

كالت... فرح توفت

سمر ... لحظه صمت لحظه صدمه مرت عليه مداستوعب الي كالته رديت كتلها شبيها فرح

جنه ... داكلج توفت شبيج

سمر ... اني هنا كمت وكفت على حيلي وبس مجرد خاله التليفون على اذني ضرغام الي واكف يمي يريد يعرف شكو
——-
مثنى .... لمن عرفت جايين خطابه على سمر جنت واصل مرحله من الجنون اخطفها واعقد عليها واخليها بس الي بس المنعني شي واحد هي ....
تعرف هذا الشخص يريدك من يوكف وياك هي ماعمرها وكفت ويايه
اكذب اذا اكول جنت مرتاح بغيابها
من انتهى كلشي وصار زواجها بقيت باللبيت ردت اشوفها بثوب العرس الثوب الي مفروض تلبسه الي مو اله جنت اشوف حبيبتي وطفلتي تنزف لشخص ثاني
اكو شي بداخلي يكلي هي ممقتنعه بزواج بدليل بس باوعت بعيوني جمعت دموع عرفت هاي دموع ندم بس بعد مافات الاوان تندمت بعد مصارت باسمه تركت المكان لان ماتحملت اشوف دموعها وماكدر اسويلها شي لان بساطه صارت باسم رجال ثاني
اسوء واقسى ليله مرت عليه هي ليله عرسها محد يتحمل يشوف حبيبته عند غيره وكفت يم باب بيت زوجها بالليل اباوع عالشبابيك اكول يجوز هاي غرفتها وهسه هي يمه يجوز هسه صارت مرته يجوز لمسها يجوز هسه صار هو بكلبها يجوز يجوز
جانت نار بصدري ماكو شي يكدر يخمدها ....

مرت ايام بعدها بس الله يعلم بحالي جنت جثه جان اكو غضب بداخلي مو طبيعي منها
بيوم الي اهلي عزموهم هي ورجلها عالغده ماكدرت ابقى واشوفها يمه اشوفها من يحجاجيها اشوفه من يضحكلها اشوفها من تحاجي وتهمس وياه
طلعت من البيت ركبت السياره وهمه وكفت سيارتهم سيارتي جانت مو كبال البيت مشافتني بس اني شفتهم شفته من خله ايده على ظهرها شفته من يضحك وياها بهاي اللحظه جنت اضعف خلك الله
لان نار مشتعله بيه وماكدر اسوي شي

شايف من تفاركـ وانت لسه تغاررر......
ويصفن بيك لونك والهضم يحتار ...
من يروح منك وانت بعدك حار ...
شيبرد ابراهيم اجروحك...
شايف من تكله انتهت بالحسره...
وتجبر دمعتك بس حيلك اتكسره....
تضيع اخباره بس تتمنى لو كبره...
بالكت نفس اترابه ايدفنك....
شايف من تكله الله يعوض الراح...
وبكلبك حجي بس انت صوتك راح...
من تثكل جلمتك والجرح ينلاح...
اتخيل تابوتك بمتونك....
شايف من تسئلك امك اشمالك.....
وتكللها راح اتكول هنيالك...
يبنيي العشك مرات جتالك...
وتكللها شمدريج عايش يمه...
شايف من تحس غيرك سكن كلبه....
تغااار اتموت تبجي المسأله صعبه .....
ابوطن حضن امك ومتروس بالغربه....
مسكينه امك بس تلولي.....
زين شايف من يكلك رايح اتزوج....
وتطفى الدنيا بيك ودمعتك تنوج....
الكاع اتحسها مرجوحه اعلى متن اعرج....
وتكل لضيمك يسترسل....
هسه شفت هذا الصاير بحالي....
ابن كليبي شفته يصير مو مالي.....
ابن كليبي صار جتالي.....
....
ماكدر اكول وجود علاوي ابني بحياتي ماجان اله دور اطلع من القوقعه الجنت بيها التجارب التكسرك تقويك
رجعت لحياتي صرت اهتم بفرح وابني اكثر من قبل ماكول كدرت انساها من اسمع احد يحجي بيها اشوف نفسي صافن اسمع حجيهم
تاخذني رجلي لدوامها حتى اشوفها
كل هذا سهل ويعدي ويروح وممكن ينسي بس من انت نايم وتكعد من النوم على صوت ابنك يبجي شفت فرح نايمه بكلبي كلت خطيه تعبانه من وره علاوي بحيث محست عليه وهاي اول مره كمت عليه شلته رحت شغلت الضوه رجعت سويت ممه اله وشربته اله جان جوعان رجع نام بس كل الهوسه والبجي والحركه بالغرفه فرح محست ماعرف شنو الي كلي روح كعدها رحت كعدت يمها مشيت ايدي على وجها جان بارد كتله فروحه
ظليت اكعد بيها ماتكعد بسرعه فتحت الباب صرت اصيح على جابر وامي بدقيقه الكل جمع بسرعه شلتها ورحنا للمستشفى ماكو نفس جان عدها ظليت حاضنها من كلي الدكتور البقاء لله ماتت اثر نوبه قلبيه ماماتت كل هالسنين ماماتت بالولاده ماماتت بالايام الي جانت حالتها خطره ماتت بايام جانت صحتها كلش زينه دمعتي نزلت عليها كعدت بالكاع ابجي مثل الطفل عليها ممصدك راحت ماممصدك عافت علاوي الي جان روحها من الدنيا
———
سمر ... بجيت بجي على فرح مصاير كاعده بالفاتحه شفت امها دخلت بالفاتحه تعيط وتبجي وتلطم جانت حجيه جبيره
رحت اخذ من خاطرها اخت فرح كالت لامها هاي بت عمه لمثنى سمر
امها حضنتني حضنه وتبجي دكلي سوده عليه فروح تحبج جانت وبس سولف بيج طبعا اني نهاريت بالبجي مقهوره على فرح مقهوره على ابنها جانت حامل دكلي اني اريد بس اجيب اشوف ابني حتى لو بعدها اموت راضيه
رب العالمين خلاها شوف ابنها وشيله 4 اشهر تقريبا وراحت وعافته
حالتي نفسيه صفر الكل مقهور عليها رحت لجنه الي جانت شايله علاوي تشربه ممه وتباع عليه وتبجي اخذته منه ورحت لغرفه بيبي ظليت الوليله لحد منام هو صح نام بس ظليت لازمته ذكرت من اجتي عليه قبل ولادتها توصيني عليه ادير بالي عليه اذا صار عليها شي
اني ماشايفه مثنى شكد جنت اتمنى اروح عليه اواسيه اوكف وياه بس ....