لمسات مخيفه

المشرحة

ممكن ناس كتير متصدقش بس اللي هقولو ده حصل بالحرف و أنا لحد دلوقتي في المستشفي ..

أولا انا اسمي يوسف عندي 22 سنة أنا طالب في كلية تجارة ظروفي الماديةصعبة جدا وده السبب الأساسي في كل اللي حصل وبالمناسبة أنا ليا أخت اصغر مني ومن ساعة ما بابا أتوفي وهي حالتها وحشه جدا فكنت لازم اشتغل واصرف ع البيت ومصاريف امي وعلاجها.......

--الظروف خلتني أشتغل عامل في المشرحة وطبعا ده بعد الحاح شديد من راجل اعرفة شغال جوه وقالي مش هتستحمل بس انا كنت محتاج للفلوس فأقنعته وبالفعل بدأت شغل في الأول اشتغلت فترة صباحية وقولت هعرف اذاكر في ليالي الامتحان فضل الشغل تمام جدا وكل يوم باجي بنضف الاوضة اللي بيشرحوا فيها الجثث بعد كل جثة ....

-طبعا عملت علاقات مع العمال اللي زيي بتوع الفترة المسائية و في يوم مشئوم رئيس العمال طلب مني اني اشتغل انا فترة مسائية مكان واحد زميلي فأنا وافقت وقولت مش مهم ماهي كده كده جثث وبالفعل من تاني يوم مسكت الفترة المسائية مع واحد تاني اسمه اسلام على طول بقينا صحاب وبنتكلم عشان نسلي قعدتنا وطبعا مش قادر أقولكم ان المكان اللي احنا قاعدين فيه في حتة مطرفة جامد شبه خالي من حوالينا والدنيا كلها سودا ماعدا حوالين المستشفي ..

فات أسبوع والتاني وانا باجي وبعد ما الدكتور يخلص ادخل انا واسلام ننضف المكان من الدم وتقريبا اتعودنا على كده ... لحد ما يوم كان مساعد الدكتور تعبان ومجاش والدكتور كان موجود لواحده فالتليفون رن وقالوا ان فيه حالة طارئة جايه بعد ساعة بالظبط طبعا الدكتور قالي وجهزت الاوضة عادي جدا وقعدت مستني الجثه عشان اشليلها في الترولي وادخلها للدكتور بس محدش قالنا قبل ما الحالة تيجي هي ماتت ازاي او اي معلومات عنها ...

- قبل ما الجثة توصل بربع ساعة كنت بقفل باب الغرفة ونضفتها كويس وخليت اسلام يعملنا شاي لحد ما الجثة توصل بس وانا بقفل الباب مره واحدة لقيت نور المستشفي كله طفى و ولع تاني لوحده بسرعة قولت اكيد بيتهيئلي وانا بدي ضهري للباب لقيت راجل عجوز واقف قدامي ووشه شاحب جدا وعليه أثار خربشة وايده اليمين كانت بتنذف اتفاجئت هو دخل هنا ازاي وقولتله انته مين .. يا حاج انته مين!!! ... كان ساكت ومبرق في وشى جامد ومره واحده لقيته بيخرج قدامي وقالي كلمة واحده بصوت يخوف وبغموض شديد " انت " وخرج من باب المستشفي جري طلعت اجري وراه لكن ملقتش ليه أي أثر و في نفس اللحظة لقيت اسلام في وشي بيقولي يلا الجثه وصلت....

دخلت انا واسلام الجثة لاوضة التشريح والدكتور كان مستني وقال انا محتاج واحد منكم بس معايا والتاني يخرج تطوعت أنا طبعا الجثة كانت في كيس أسود كبير ليه سوسته فتحتها لقيت ملاية .. الملاية كانت كلها دم وانا اول مره اصلا اقف مع الدكتور انا اخري انضف الاوضة من الدم المهم جاي أنزل الملاية اللي تقريبا بقت حمرا من كتر الدم عشان الدكتور يبدء شغله .....

أول ما نزلت الملاية اتخضيت ورجعت كذا خطوة لورا وانا خايف جدا والدكتور استغرب قالي متخافش مش انت اللي هتشرحها المشكلة ان الدكتور مكنش عارف ان الجثه دي هي نفس الراجل اللي شوفتة من شوية وانا بقفل الباب أيوه انا فاكر وشه كويس وكمان نفس الخرابيش اللي فيه حاولت أقول للدكتور لكن افتكرنى مجنون او تعبان وقالي لا انته اطلع ونادي اسلام احسن لسه هرد عليه لقيت نور المستشفي كله قطع ... الدكتور قالي اطلع شغل المولد بسرعة وتعالى طلعت أجري على البدروم والدنيا ضلمة عشان اشغل المولد وماشي بكشاف الموبايل ... مره واحدة لقيته قدامي أيوة قدامي اللي يفصلنا عن بعض سنتيمتر بس لدرجة اني كنت حاسس بنفسه .. عنيه كانت حمرا وملامح وشه كلها متغيره و شكله كان يرعب انا اتمسمرت في مكاني معرفتش اجري ولا حتى انادي على حد فضل باصللي بنفس الطريقة وفي لحظة ما عيني رمشت ملقتوش قدامي ...

سيبت المولد ورجعت على الدكتور جري وببص لقيت الجثه مكانها ا وفي نفس الوقت النور رجع تاني حاولت احكي للدكتور واقولة انتهى بيا الموضوع اني اطردت وقالو عني مجنون بس قبل ما اخرج عرفت اجيب بيانات الراجل ده و تاني يوم روحت مكان سكنه وكل ما اسئل حد عنه يقولي معرفش .. مليش دعوة .. اللهم احفظنا . لحد ما واحد قالي انه كان بيستدعى جن في أوضته وكان اشبه بالدجال او الساحر ومحدش يعرف لحد دلوقتي مات ازاي ...

طبعا انا سمعت كل الكلام ده وقلبي اتملى خوف يعني انا اللي شوفته ده كان جن يعني ده جن الراجل ده كان مسخره ليه ومن ساعتها روحت حكيت لأهلى وأصحابي ومحدش صدقني بس الموضوع مخلصش لحد كده الراجل ده كان بيجيلي كل يوم قبل ما انام يقف باصصلي بنفس نظراته المرعبة وافضل انادي بأعلى صوتي على امي وتيجي مش تلاقي حاجة وانتهى بيا الحال اني دخلت مستشفي اتعالج عشان امي قالت اني اكيد اتجننت من شغلى فى المشرحه ولحد دلوقتي محدش بيصدقني وتقريبا انت كمان مش هتصدقني حتى لو قولتلك ان الراجل ده واقف قدامي حالا .. !!!!!