لمسات مخيفه

أبو تلات صوابع(أكل لحوم البشر)

"خيالى"

 القصة  رووووعه

كنت قاعده في الفصل بضحك وبهزر مع إصحابي 

فجأه سكتنا كلنا لما لقينا الباب إتفتح
ودخلت مُدرسه جميله جداً لون شعرها أسود عينها زرقا قصيرة إلي حد ما لبسها متحرر
إبتسمت لينا وهي بتعرفنا بنفسها
وقالت أنا إسمي لمياء مدرسه الإنجليزي الجديده
أتمني تكونوا سعداء بوجودي
وبدأت تشرح درس جديد ..

في نهاية اليوم الدراسي بدأت أتكلم مع إصحابي عن الميس الجديده قلت لهم بصراحه أنا مش مرتاحه ليها معرفش ليه
إنتوا محدش منكم لاحظ إنها كانت مركزه علينا طول ما كانت بتشرح مش فاهمه ليه

ردت عليا ندي وياسمين وقالولي
عادي يابنتي مفيهاش حاجه
وبعدين أنتي مأڤورة أوي يا ساره علي فكرة
قلت لهم أتمني يخيب ظني فيها

[ ياسمين ، ندي ] بتربطني بيهم علاقه صداقه
وبما إننا جيران كنا بنتقابل يوميا علشان نروح المدرسه سوا

بعد كام يوم بدأت ألاحظ حاجه غريبه علي الميس لمياء
وهي إن في يوم بيكون لون شعرها أسود
وعينها زرقا وقصيرة ولبسها متحرر
ويوم بتكون طويله وعينها سمرا
وشعرها قصير لونه بني ولبسها محترم

قلت عادي جايز بتحط لينسيز بتصبغ شعرها بتلبس كعب ومباخدش بالي بتغير إستايل لبسها
المهم مهتمتش بالموضوع أوي

الخميس 2018/4/19
ندي مرجعتش افقققإختفت تماما
أهلها سألوا عليها في كل مكان
وللأسف ندي إتخطفت وملهاش أثر

مبقتش مصدقه لما عرفت إنها إتخطفت
حزنت وبكيت عليها جدا
كذا يوم قاعده في الأوضه مبخرجش للمدرسه
أو الدروس ومبكلمش حد نفسيتي تعبت بجد

" ساره الميس لمياء هي اللي خطفت ندي "

الجمله اللي قالتهالي ياسمين وهي عندي في البيت
مبقتش مصدقه اللي سمعته
قلت لها ايه اللي بتقوليه ده لا طبعا ازاي !!

قالتلي اسمعيني بس آخر مره انا شوفت الميس خارجه من المدرسه ومعاها ندي ومن بعدها إختفت
زعقت فيها وقلت لها
طب ليه معرفتيش أهلها باللي شوفتيه ده

قالتلي معرفش خوفت ليه يا ساره
ندي مش صاحبتك لوحدك أنا زعلانه عليها أكتر منك
بس بجد مش عارفه ليه مقولتش لحد وقلت ليكي أنتي وكلامك طلع صح لما قولتي لينا إنك مش مرتاحه للميس لمياء أنا مش عارفه هنتصرف إزاي دلوقتي

قلت لها بكره نتكلم في الموضوع ده يا ياسمين
لو سمحتي سبيني دلوقتي عشان مخنوقه

تاني يوم تعبت جدا ومقدرتش أروح المدرسه
لقيت ياسمين جاتلي البيت تطمن عليا
لكن شكلها كان متغير الخوف باين في عينيها

دخلنا الأوضه أنا وهي
قلت لها مالك شكلك متغير ليه يابنتي
قالتلي بعد ما خرجت من المدرسه يا ساره
مشيت ورا الميس لمياء من غير ما تاخد بالها

لقيتها مشيت في شوارع وحواري كتير أوي
ودخلت مبني شكله قديم جدا عامل زي جراچ كبير جدا
في نهايته أوضتين شبابيكهم مفتوحه دخلت واحده منهم

أنا قربت من الشباك وبصيت منه من غير ما تاخد بالها
إتصدمت لما لقيت واحده شبه الميس لمياء
كإنها توأمها كانت موجوده معاها
شعرها طويل لونه أسمر وطويله عينها بني
ولقيتهم بدأوا يتكلموا سوا

وبعد شويه سمعت خطوات شخص داخل للجراچ
إستخبيت ورا صناديق الزباله اللي موجوده

وبعد لما الشخص ده دخل سمعت الميس لمياء
وتوأمها بيتكلموا معاه
وبيقولوا ليه الحمدلله علي سلامتك ياحبيبي
تحب نحضرلك الغدا
قالهم أيوه بسرعه علشان جعان
سمعت واحده منهم بتقوله تحب تاكل إيه ؟
الصدر ولا الكتف ولا نجيبها وأنت تختار
قالهم لا هاتولي الكتف

قربت بهدوء ناحيه الشباك ورفعت راسي لفوق
وشوفت منظر مش قادره أنساه
لقيت شخص قاعد علي كرسي معرفتش أحدد ملامح وجهه كويس لكن أنا شوفت إيده اليمين مقطوع منها 3 صوابع
ولقيت واحده منهم فتحت تلاجه كبيرة
وطلعت منها ندي وبدأت تقطع كتفها بالسكينه

صرخت غصب عني لما شوفت المنظر ده وجريت
لقيتهم خرجوا بسرعه وبدأوا يجروا ورايا
بس محدش منهم لحقني
أنا مرعوبه أوي يا ساره وخايفه

لقيت ياسمين بدأت تنهار وتعيط
حضنتها وبكيت علي ندي ومش عارفين نعمل إيه
خايفين نتكلم ونحكي لأي حد

تاني يوم رُوحت المدرسه أنا وياسمين
وإحنا قاعدين في الفصل لقينا الميس لمياء دخلت الفصل
وبدأت تشرح لكن كانت نظراتها لياسمين كلها إنتقام وشر كإنها عرفت إن هي اللي كانت بتتجسس عليهم

بعد يومين ياسمين إتخطفت زي ندي
إزاي وإمتي وليه محدش كان عارف
بس أنا كنت عارفه وخايفه أنطق

وصلت البيت ودخلت أوضتي وأنا منهارة وبعيط
علي إصحابي وخايفه يكون مصيري زيهم
مقدرتش أسكت أكتر من كده

خرجت من أوضتي لقيت بابا قاعد في الصاله
جريت عليه حضنته وأنا ببكي أوي
قلت له بابا أنا مش هروح المدرسه تاني
أنا خايفه أموت زي ياسمين وندي

لقيت بابا بيقولي طيب إهدي كده ياساره
ومتخافيش وإحكيلي اللي حصلي

أنا إترددت أتكلم ودخلت أوضتي وقفلت الباب
وقعدت علي الأرض بعيط ومنهارة
بعد ما شوفت بابا قلع الـ glove من إيده اليمين لأول مره

" وإتصدمت لما لقيت مقطوع منها 3 صوابع "