The Estranged Wife (COMPLETED)

24. Irritated

Two Years Ago...

NAG-LEAVE ng dalawang linggo sa trabaho si Albert sa trabaho nang manganak si Jackie. Wala kasing puwedeng tumulong rito sa recovery nito at sa pag-aalaga ng anak nila. Nang manganak ito ay saktong nagkatrangkaso ng isang linggo ang ina nito. Hindi rin makaluwas ng Maynila ang ama nito para alagaan ang asawa. Pagkatapos naman noon ay may isang linggong pilgrimage ang mag-asawa sa Baguio.

Okay lang naman kay Albert ang pag-leave sa trabaho. Naiintindihan niya na responsibilidad niya iyon. Kaya nga lang, pakiramdam niya ay may nag-iba sa sarili niya simula nang manganak si Jackie. Madalas na iritado siya, lalo na nang makauwi sila ng bahay kasama ang anak.

Iyakin si Jileen. Madalas rin ay tuwing gabi ito gising. Halos wala tuloy silang pahinga ni Jackie. Maligalig rin ito. Kahit walang problema ay panay ang iyak nito.

Madalas ay si Jackie lang ang nakakapagpatahan dito. Pero naiintindihan naman ni Albert na hindi lang dapat si Jackie ang kumilos. Ganoon rin siya. He is a part of Jileen. It was his responsibility to take care of his child. Lalo na at kailangan pang mag-recover ni Jackie.

Isang araw ay nagkaroon ng emergency na trabaho si Albert. Dahil hindi niya pa rin maiwan ang mag-ina, sa bahay siya nagtrabaho. Nakipag-video call siya sa empleyado niya para sa isang urgent meeting. Gamit rin ang internet inayos niya ang problema. Nang matapos siya ay nagpaalam sa kanya si Jackie na bantayan muna si Jileen. Maliligo kasi ito. Pumayag naman siya dahil tulog naman ang bata.

Pero wala pang ilang minuto si Jackie sa bathroom ay naggising si Jileen. Umiyak kaagad ito. Kinuha niya ang dede nito pero iniluwa lang nito iyon. Ch-in-eck niya ang diaper nito pero wala pa naman itong ihi at dumi. Sinubukan niyang buhatin ito pero lalo lang itong nagwala. Nang ihiga niya ulit ay nagwawala pa rin ito.

"What do you want?" Naiirita na si Albert.

Iyak lang ang naging sagot sa kanya ng bata. Sinubukan niya ulit na buhatin ito at naglakad. Inilibot niya ito sa bahay. Pero ganoon pa rin ang bata. Mas lalo lang tuloy siyang nainis. Mainit na nga ang ulo niya sa biglaang kailangang trabaho ay naiirita pa siya sa hindi tumatahan na anak. Matinis pa man rin ang boses nito.

Ibinaba na ni Albert ang bata. Sinubukan niyang kumalma. Pero nang lumakas pa nang lumakas ang iyak nito ay naubos na ang pisi niya.

"Kailan ka ba tatahan?!" Sa inis ni Albert ay napasigaw na siya. As expected, hindi iyon nakatulong. Mas nagligalig ito at maya-maya pa nga ay nagsuka na. Napamura siya.

"Bakit ka sumigaw?! Bakit ka nagmura?!"

Nagdidilim na ang paningin ni Albert nang lumabas si Jackie sa banyo. Pulang-pula ang mukha nito, halatang nagalit sa kanya. Parang binuhusan naman siya ng tubig. Aminado siya na mali ang ginawa niya. Dapat ay may pasensya sa kanyang anak. Sanggol pa lang ito. Wala pang isip.

Napayuko si Albert. Alam naman niya ang tamang gawin. Alam rin niya na mali ang nararamdaman niya. Madalas ay iritado siya kapag nakikita si Jileen. Hindi niya gustong alagaan ito. At mukhang nararamdaman rin naman iyon ng anak niya kaya ganoon na lang rin ang pagliligalig nito sa kanya.

Disappointed si Albert sa sarili. He felt like a useless father. Mali talaga na nakipaglapit at nabuntis niya si Jackie. Kagaya lang rin siya ng mga magulang niya---walang kuwenta at sisirain lang ang buhay ng anak niya.