ﻧﺤﻜﻴﻠﻜﻦ ﻋﺎﺩ ﺩﻕ ﺍﻟﺒﺎﺏ ﺳﺎﻋﻪ 10 ﻓﺘﺤﺖ ﻟﻘﻴﺘﻬﺎ ﺣﻨﻲ ﻭﺍﻋﻤﺎﻣﻲ ﺍﻟﺴﺘﻪ
ﺍﺳﻔﻪ ﺍﻗﺼﺪ ﺍﻟﺨﻤﺴﻪ ﺍﻟﺴﺎﺩﺱ ﻫﺬﺍ ﻳﺴﻜﻦ ﻓﻲ ﺳﻮﻳﺴﺮﺍ ﻛﺎﻥ ﺻﺪﻗﻨﻲ
ﺭﺑﻲ , ﻋﺸﺎﻥ ﺩﻛﺘﻮﺭ ﻭﻛﺬﺍ ﺣﻴﺎﺗﻪ ﻣﺒﻬﻤﻪ ﻭﻏﺎﻣﻀﻪ , ﻳﻼ ﻣﺎﻋﻠﻴﻨﺎ ﻣﻨﻪ ﺍﻟﻠﻪ
ﻳﺴﺎﻣﺤﻪ
ﺧﺸﺖ ﺣﻨﻲ ﺗﺰﻏﺮﺕ ﻟﻮﻟﻮﻟﻮﻟﻲ
ﺍﻧﺎ : ﻟﻴﺶ ﻟﻴﺒﻴﺎ ﺣﺼﻠﺘﻮﻟﻬﺎ ﺭﺋﻴﺲ
ﺣﻨﻲ : ﻻ ﻳﺎﺑﻨﻴﻪ ﺟﺒﻨﺎﻟﻚ ﻋﺮﻳﺲ
ﺍﻧﺎ : ﻋﺮﻳﺲ ﺳﺎﻋﻪ 10 ﻓﻲ ﻟﻴﻞ ﻟﻴﺶ ﺍﻧﺘﻮ ﺧﺎﻃﻔﻴﻨﻪ
ﺣﻨﻲ : ﻃﺎﻟﻌﻪ ﺍﻟﺤﻴﺎﺓ ﺟﺪﻙ ﻧﺎﺩﺭ ﺍﺣﻮﻳﻨﻄﻪ
ﺍﻧﺎ : ﻳﺎﺭﺑﻲ ﻣﺶ ﻭﻗﺖ ﺷﻜﻴﺮﺓ ﺭﺍﺟﻠﻚ ﻭﻣﺪﺣﻪ ﺷﻨﻲ ﻓﻴﻪ ﻳﺎﺟﺪﻳﺪﻩ ﺭﺍﻩ ﻗﻌﺪﺕ
ﻋﻠﻲ ﺍﻋﺼﺎﺑﻲ
ﺣﻨﻲ : ﻻ ﻣﺎﺗﻘﻌﺪﻳﺶ ﻋﻠﻲ ﺍﻋﺼﺎﺑﻚ ﺻﺒﻲ ﻋﻠﻴﻬﻦ
ﺍﻧﺎ : ﺍﻫﺎ ﺍﻋﺘﺒﺮﻧﻲ ﻃﺤﺖ ﺿﺤﻚ
ﺣﻨﻲ : ﺧﺰﻱ ﻳﺎﻗﻠﻴﻠﺔ ﺍﻻﺩﺏ ﻛﻨﻲ ﺍﻧﺎ ﻛﻲ ﻋﻤﻚ ﻟﺆﻱ ﻣﺎﻧﺎﺧﺬﻛﺶ ﻟﻮﻟﺪﻩ ﺍﻣﺮﺍﺟﻊ
ﺍﻧﺎ : ﻗﺼﺪﻙ ﺟﻴﻴﻦ ﻭﺩﺍﻳﺮﻳﻦ ﻫﺎﻟﺰﻋﺰﺍﻋﻪ ﻋﺸﺎﻥ ﺗﺨﻄﺒﻮﻧﻲ ﺍﻟﻤﺮﺍﺟﻊ
ﺣﻨﻲ : ﺍﻩ ﺍﻩ ﺍﻣﻚ ﺑﺪﺭﺭﻱ ﻗﺎﻟﺖ ﺍﻧﻚ ﻣﻮﺍﻓﻘﻪ ﻭﻧﺤﻨﺎ ﺟﻴﻨﺎ
ﺍﻧﺎ : ﻛﻠﻤﻪ ﻋﺎﺑﺮﻩ ﻗﻠﺘﻬﺎ ﻃﺎﺋﺮﻩ ﺳﺤﺎﺑﻪ ﻧﺴﻤﻪ ﻃﻠﻌﺖ ﻓﻲ ﻭﻗﺖ ﺩﺭﺍﻩ ﻛﺒﺪ ﺩﺭﺗﻮﻫﺎ
ﺟﺪﻳﺎﺕ ﺍﻧﺘﻮ ﻳﺎﺣﻨﻲ
ﺣﻨﻲ : ﻛﻴﻒ ﻳﻌﻨﻲ
ﺍﻧﺎ : ﻗﻠﺘﻠﻜﻢ ﺳﺒﻌﻄﺎﺷﺮ ﻣﺮﻩ ﻣﺎﻧﺒﻴﺶ ﺍﻣﺮﺍﺟﻊ ﻭﻫﺬﻱ ﺍﻟﻤﺮﻩ ﺍﻟﺜﻤﻨﻄﺎﺵ ﻛﻨﻜﻢ
ﺍﻧﺘﻮ
ﺣﻨﻲ : ﻭﻳﻦ ﺗﻠﻘﻲ ﺣﺪ ﺍﺷﻌﻞ ﻭﻋﻴﻮﻧﻪ ﻣﻠﻮﻧﺎﺕ ﻛﻲ ﺍﻣﺮﺍﺟﻊ , ﻫﻮﺍ ﺍﻟﻮﺣﻴﺪ ﻟﻲ
ﻳﺸﺒﻪ ﺣﻴﺎﺓ ﺟﺪﻙ ﻧﺎﺩﺭ ﻭﺣﺘﻲ ﻓﻲ ﺷﻌﺮﻩ ﺍﻟﺴﺎﺑﻞ ﻭﻋﻴﻮﻧﻪ ﻟﻮﺳﺎﻉ
ﺍﻧﺎ : ﺣﻨﻲ ﺑﺲ ﻣﺎﻧﺒﻴﺶ ﻣﺎﺯﻟﺖ ﻃﻔﻠﻪ ﺭﺍﻩ
ﺣﻨﻲ : ﻃﻔﻠﻪ ﻭﻣﻨﻘﺼﻪ ﺣﻮﺍﺟﺒﻚ ﻏﻴﺮ ﺍﺭﺗﺰﻋﻲ ﺑﻼ ﺑﻮﺩﻋﻪ
ﻣﻊ ﻃﻠﻌﺖ ﺑﺎﺗﻲ ﻣﻦ ﺍﻟﻤﺮﺑﻮﻋﻪ ﻳﻜﻠﻢ ﻓﻲ ﻳﺎﺟﻴﺠﻲ ﻳﺎﺟﻴﺠﻲ ﻧﺒﻴﺪﻱ ﺳﺎﻋﺘﻪ
ﻋﺎﺩ ﻣﺘﻌﻘﺪﻩ ﻣﻦ ﺍﻟﻨﻘﺎﺵ ﺍﻟﺤﺎﺩ ﻣﻊ ﺣﻨﻲ
ﺍﻧﺎ : ﻧﻌﻢ ﻧﻌﻢ ﻛﻨﻜﻢ
ﺑﺎﺗﻲ : ﻋﻄﻴﻨﻲ ﻛﻔﻴﻦ ﺗﻌﺎﻟﻲ
ﺍﻧﺎ : ﺑﺎﺗﻲ ﻫﺎ ﻛﻨﻚ ﺷﻦ ﻓﻲ
ﺑﺎﺗﻲ : ﻳﺎﺟﻴﺠﻲ ﻋﻤﻚ ﻟﺆﻱ ﺟﺎﻱ ﻳﺨﻄﺐ ﻓﻴﻚ ﺭﺳﻤﻲ ﻟﻤﺮﺍﺟﻊ ﻭﻗﺎﻟﻮ ﺍﻧﻚ
ﻣﻮﺍﻓﻘﻪ ﺻﺎﺡ ﻫﺎﺍﻟﻜﻼﻡ ﻳﺎﺭﻳﺖ ﺗﻌﻄﻴﻨﺎ ﺍﻻﺟﺎﺑﻪ
ﺍﻧﺎ : ﺍﻧﺎ ﻓﻲ ﻣﻦ ﺳﻴﺮﺑﺢ ﺍﻟﻤﻠﻴﻮﻥ ﻭﻻ ﺷﻦ ﻋﻠﻲ ﺍﺳﺎﺱ ﺧﻠﻴﺘﻮﻟﻲ ﺧﻴﺎﺭ ﻟﻲ
ﺑﺎﺗﻲ : ﺧﻴﺎﺭ ﻭﻻ ﻛﻮﺳﺎ
ﺍﻧﺎ : ﺩﻳﺮﻭ ﺟﻮﻛﻢ ﺣﺴﻨﻲ ﻣﻠﻴﺖ ﻣﻦ ﻧﻔﺲ ﺍﻟﺴﺆﺍﻝ
ﺑﺎﺗﻲ : ﻳﻌﻨﻲ ﻧﻘﻮﻝ ﻣﺒﺮﻭﻙ
ﺍﻧﺎ : ﻗﻮﻝ ﺣﺘﻲ ﺧﻠﻴﻔﻪ ﻣﺎﻳﻬﻤﺶ ﺑﻠﺤﻴﻞ
ﻟﻤﻴﺖ ﺍﻗﺸﺎﺷﻲ ﺍﻱ ﺩﺑﺸﻲ ﻭﺻﺒﺎﻃﻲ ﻭﺧﺸﻴﺖ ﺍﻟﺪﺍﺭ ﻭﺧﺸﻴﺖ ﺍﻟﺰﺍﻭﻳﺘﻲ
ﻭﻓﺮﺍﺷﻲ ﻭﻧﺰﻟﻦ ﺩﻣﻌﺘﻴﻦ ﻣﻨﻲ ﻭﺍﻧﺎ ﺧﺬﺍ ﻓﻲ ﺟﻮ ﺍﻻﺣﺴﺎﺱ ﻭﺍﻟﻬﺪﻭﺀ ,
ﻭﻧﺴﻤﻌﻠﻜﻦ ﻫﺬﻙ ﺍﻟﺮﻣﺎﻳﻪ ﻃﻠﻌﺖ ﻧﺠﺮﻱ ﻳﻨﻌﻠﻲ ﻣﻦ ﻫﺎﺭﺏ ﺷﻦ ﻓﻲ ﻟﻴﺶ
ﻫﻚ ﺍﻟﺮﺻﺎﺹ ﺻﻮﺗﻪ ﻳﻔﺠﻊ
ﺍﻣﻲ : ﻫﺬﻱ ﻋﺸﺎﻥ ﻭﺍﻓﻘﺘﻲ ﻋﻠﻲ ﺍﻣﺮﺍﺟﻊ
ﺍﻧﺎ : ﻭﻛﺎﻥ ﻭﺍﻓﻘﺖ ﺗﻔﺠﻌﻮ ﺍﻟﻨﺎﺱ ﺍﻟﺴﺘﺮ
ﻭﻧﺒﺤﺖ ﻓﻲ ﺳﻤﺎﺀ ﺭﺑﻲ ﻭﻧﻠﻘﺎﻫﺎ ﻛﻠﻬﺎ ﺿﺒﺎﺏ ﻭﺷﻬﺐ ﺣﻤﺮﺍﺀ ﻣﻦ ﺍﻝ 77 ﺭﺻﺎﺻﻪ
ﻟﻲ ﻧﻄﻠﻘﻦ
ﻳﻼ ﻣﺎﻋﻠﻴﻨﺎ ﺳﺮﺍﻗﻴﻦ ﻣﻦ ﺍﻟﺪﻭﻟﻪ , ﻻﻻ ﻳﺎﺑﻨﺎﺕ ﻣﺎﻓﻴﺶ ﻭﺣﺪﻩ ﺗﻘﻮﻟﻲ ﻋﻴﺐ
ﻛﻼﻣﻚ ﻫﺬﺍ ﺳﺮﺍﻗﻴﻦ ﻫﻤﺎ , ﻳﻼ ﻣﺎﻋﻠﻴﻨﺎ ﻣﻨﻬﻢ ﺍﻟﻠﻪ ﻳﺴﺘﺮﻫﻢ ﻣﺎﻧﺤﺒﺶ
ﻧﻔﻀﺢ ﺑﻨﺎﺱ
ﻉ ﺍﻟﻌﻤﻮﻡ
ﺭﻗﺪﺕ ﻭﻋﻴﻮﻧﻲ ﻣﻨﻬﻤﺮﺍﺕ ﺩﻣﻮﻉ ﻭﻗﻌﺪﺕ ﻧﺴﻤﻊ ﻓﻲ ﺍﻏﻨﻴﺔ ﺍﻡ ﻛﺜﻠﻮﻡ ﺍﻟﺤﺐ
ﻛﻠﻮ ﺣﺒﻴﺘﻮ ﻟﻴﻚ ﺍﻟﺤﺐ ﻛﻠﻮ ﻋﺸﺎﺕ ﻧﻌﻴﺶ ﺩﻭﺭ ﺍﻟﺤﺰﻳﻨﻪ ﻃﻠﻌﺖ ﺍﻻﻏﻨﻴﻪ ﻛﻠﻬﺎ
ﺍﻟﺤﺐ ﻛﻠﻮ ﻣﺎﻓﻴﺶ ﺍﻱ ﻛﻠﻤﻪ ﺛﺎﻟﺜﻪ ﻃﻔﻴﺖ ﺍﻟﻤﺴﺠﻞ
ﻭﺳﻨﺪﺕ ﺭﺍﺳﻲ ﻉ ﺳﺎﺱ ﺍﺧﻄﺮﺕ ﻋﻠﻲ ﺩﻏﺮﻱ ﻏﻨﺎﻭﺓ ( ﺍﻟﻴﻞ ﺗﺮﻗﺪ ﻓﻴﻪ ﺍﻟﻨﺎﺱ .
ﻭﻧﺎ ﺳﺎﻧﺪ ﺭﺍﺳﻲ ﻉ ﺳﺎﺱ ) ﺍﻧﻬﻤﺮﻥ ﺩﻣﻮﻋﻲ ﻭﻗﻠﺖ ﻳﻼ ﻳﺎﺟﻴﺠﻲ ﻭﺍﻓﻘﻲ ﻣﺶ
ﻣﺸﻜﻠﻪ ﻭﻳﻦ ﺑﺘﻠﻘﻲ ﺣﺪ ﻋﻴﻮﻧﻪ ﻣﻠﻮﻧﺎﺕ ﻭﺍﺷﻘﺮ ﻭﻃﺎﻟﻊ ﺍﻟﺤﻴﺎﺓ ﺟﺪﻩ ﻭﺧﺎﺻﻪ
ﺍﻧﻲ ﻣﺶ ﺳﻤﺤﻪ ﻳﻼ ﻣﺎﻋﻠﻴﻨﺎ , ﻫﺬﻙ ﻟﻴﻠﻪ ﺭﻗﺪﺕ ﻭﻋﻴﺖ ﻟﻘﻴﺖ ﺍﻣﻲ
ﻣﻄﻠﻌﻪ ﻣﻨﺎﺻﺐ ﻭﻃﻨﺎﺟﺮ ﻭﺣﺘﻲ ﻣﺤﺎﻗﻦ ﺧﺒﺮ ﺧﺒﺮ , ﻗﻠﺘﻠﻬﺎ ﺍﻣﻲ ﻟﻤﺎ ﻣﻄﻠﻌﺘﻴﻬﻦ
ﻫﺬﻳﻦ ﻣﻦ ﻟﻲ ﻋﻨﺪﻩ ﻣﻨﺎﺳﺒﻪ
ﺍﻣﻲ : ﺍﻟﻴﻮﻡ ﺟﺎﻳﻴﻨﺎ ﺍﺳﻴﺎﺩﻙ ﻛﻠﻬﻢ ﺑﺼﺒﻴﺎﻫﻢ ﻭﻋﻮﻳﻠﻬﻢ
ﺍﻧﺎ : ﻣﺎﻫﻢ ﺩﻳﻤﺎ ﻳﺠﻮﻧﺎ ﺑﺲ ﻟﻲ ﻣﺰﻟﺖ ﻣﺎﻋﺮﻓﺘﻪ ﻟﻴﺶ ﺍﻟﻜﻢ ﺍﻟﻬﺎﺋﻞ ﻫﺬﺍ ﻣﻦ
ﺍﻟﻤﺎﻋﻴﻦ
ﺍﻣﻲ : ﻋﺸﺎﻥ ﺗﻐﺴﻠﻴﻬﻦ
ﺍﻧﺎ : ﺣﺎﻧﻄﻪ ﺣﺘﻲ ﺍﻧﺘﻲ ﻃﺎﻟﻌﻪ ﺍﻟﺤﻴﺎﺓ ﺟﺪﻙ
ﺍﻣﻲ : ﻻﻧﻚ ﺍﻟﺒﻨﺖ ﺍﻟﻮﺣﻴﺪﻩ ﻟﻲ ﻓﻲ ﺍﻟﻌﻴﻠﻪ ﺣﻨﻚ ﺫﺑﺤﺖ ﺣﻮﻟﻴﻴﻦ ﻋﻠﻲ ﺍﻧﻚ
ﻭﺍﻓﻘﺘﻲ
ﺍﻧﺎ : ﺑﺎﻫﻲ ﻭﺍﺫﺍ ﺍﻧﺎ ﻭﺣﻴﺪﺓ ﺍﻟﻌﻴﻠﻪ ﺗﺬﺑﺤﻮ 2 ﺍﻣﺎﻟﻪ ﻛﺎﻥ ﺗﻨﻘﺮﻱ ﺍﻟﻔﺎﺗﺤﻪ ﺷﻦ
ﻳﺴﻴﺮ
ﺍﻣﻲ : ﻧﺪﻳﺮﻭ ﺍﻟﺨﺒﺮ ﻟﻲ ﺩﺍﺭﻭﻩ ﻫﺬﻛﻮﻡ ﺍﻟﻌﺮﺏ ﻓﻲ ﺍﻟﺰﺭﺩﻩ ﻫﻠﻲ ﺟﻴﺒﻴﻦ
ﺑﺨﺎﺭﻩ ﻣﻌﺎﻫﻢ
ﺍﻧﺎ : ﺍﻣﻲ ﺭﺍﻙ ﺍﻧﺘﻲ ﺗﺤﻜﻲ ﻓﻲ ﺣﺎﺟﻪ ﻓﻲ ﺍﻟﻤﺴﺘﻘﺒﻞ ﻳﺎﺭﻳﺖ ﻳﺎﺟﺮﺟﻴﺮﻩ
ﺗﺼﻠﺤﻲ ﻣﻦ ﺍﻟﻨﺺ
ﻉ ﺍﻟﻤﻬﻢ ﻳﺎﺑﻨﺎﺕ ﻋﻨﺪﻱ6 ﺍﻋﻤﺎﻡ ﻭﻛﻠﻬﻢ ﻣﺎﻋﻨﺪﻫﻤﺶ ﺑﻨﺎﺕ ﻭﻛﻞ ﺣﺪ ﻋﻨﺪﻩ 5
ﻋﻮﻳﻞ ﺍﻧﺎ ﺍﻟﺒﻨﺖ ﺑﺲ
# ﻳﺘﺒﻊ
ﺷﺎﺭﻛﻦ ﺍﻟﻘﺼﻪ ﻭﺩﻳﺮﻥ ﺗﺎﻗﺎﺕ ﺍﻧﺸﻄﻦ ﺣﺴﻨﻲ ﺗﺤﻤﺴﺖ
ﺍﻟﻘﺼﻪ ﺡ ﺗﻜﻮﻥ ﻉ ﺻﻔﺤﻪ ﺍﻭﻝ ﺑﺎﻭﻝ
ﺿﻴﻔﻨﻲ ﻭﻻ ﺗﺎﺑﻌﻨﻲ
ﺟﺮﺟﻴﺮﻩ ﺍﻟﻌﺮﻓﻲ
