بعد مكالمة زياد الغريبة قعدت علي كراسي راسي😂
وشربت كباية قهوة وقعدت انخمم 🙄
ازعما كلام زياد صح والمفروض كنت نشاوره قبل
😒وعليش نشاور فيه هذا رزق باتي وهو حر 😒 ازعما المفروض قلت لباتي نصيبي نبيه 🤔
😒 ويش خاصك من خير انتي باتك كل لوازم فرحك جابهن لك واثثلك الشقة اللي ماشيتلها 😒
ازعما زياد طامع زاد 🤔
😒اكيد العقرب امه هي اللي توز فيه 😒
🤔ازعما اح اح اححح اح وطلعن الدموع شرقت ف البن متاع القهوة 😭😭😫
جت امي مفجوعة و قجت علي كأس اميه 💦💦💦
امي : اسم الله اسم الله عين عزيزة هذه الله لا اتربحا الله يرزيها في كرعيها عطها دا
انا : هاي هاي وسعي بالك شرقت ف القهوة بس 😂
امي: اكيد منها هاللفعه 🐍
انا : 😂😂حرام يا امي كويسة عمتي عزيزة
امي : اقطع كوستا من منبتا😒
انا : كوستا ولا قرعتا هو هو هو
امي : سامطه كي باتك 😣
انا : والله نقولها له 😂
امي : اسكتي سلم بنيتي تخربيش بيتي😚
انا : ديري العشا نسكت ومانقولهش 😂
امي : به توا نديره 😥
انا : كنك خفتي وقريب تبكي😂😂
امي : نخاف منه باتك مرة زمان ونحنا مخطوبين مشيت مع زاهية للدكان شوي لاقيني فالشارع قعد يطلق في حيط فينا وردنا للحوش بالحيط 😭 هبل باتك مغير بعد جيتي انتي دار شوي عقل
انا : حتى هذه نقولها له 😂😂
امي : عشا اليوم والعوايز شوري اسكتي بس😚😚
باتي : احم وينكم يا هل الحوش🤨
امي : اقفزت فووووق ها نحنا هنا ياتاج روسنا
انا : صار تاج راسك ، اه ياديني 😂
باتي : تعالن نحكيلكن ايش درت
انا : لا ياباتي تبي تجوز وتسيبنا 😭😭
باتي : اسكتي يامهبولة نا ماتلايمت معاكن نجيب ولية اخرى تدوخ راسي 😂
امي : الله يربحك وين ماتدير بوجك 😍
باتي : انا بعت الشاليهات والأرض الكبيرة بيش نغطي تكلفة الجامع
امي : يسدن قولك
باتي : إن شاء الله يسدن
امي : وباقي الأراضي 🤔
باتي : حتى هن نبي نبيعهن ندير توسعة لحوشنا هذا وندير شقة لاعطيوه ونعطي هالشكلة حق الباتارية😂😂
انا : عليك البخيل 😕
باتي : عيب يابت😂😂
انا : كان هذه عيب ايش تقول لما تسمع امي شن قالت 😂😂😂
باتي : ايش قالت 😡😡
امي : خليك منها ، تبي نديرلك كسكسو ولا بازين
باتي : وين عمرك درتيه البازين 😒
امي : نديره مغير اطلب 😍
باتي : ديري اللي يريحك وتعالي يارجعة احكيلي ايش قالت 🙄
امي طلعت وهي تعضلي في شاربها وتغمزلي😂😂
انا: ياما قالت من بدري دوخت راسي وهي تشكر فيك وتحكيلي على ايام خطوبتكم 💕
باتي عدل شنته وقالي باتك توا غير باتك زمان😎
انا : شنو كنت مهند زمان 😂
باتي : كانت تخاف وين ماتشوفني اللي توا تحكي وتلاطع وأول ماخذيتا ماتبيني نطلع بكل مالحوش تقولي ماتسيبنيش بروحي ، وكانت ماتخطي قدام الباب نين تاخذ شوري اللي توا مايمسكها ولا شارع 😂
انا : خوذ ولية اخرى وخلاص 😂
باتي : لا وحياتك ، امك الله يربحها هي اللي ديمه فارجتا في وجي ❤
انا : اسملا ع الغافل 😌
باتي : ايش حسك قلتي 🤨
انا : شي شي نمشي نساعد امي 😂
خشيت على امي ف المطبخ وقلتلها وين ع الحب انتي والشايب السامط هذا😍😍
امي : حكيتيله ايش قلت 😥
انا : لا مزال بكرا كان ماسويتيش الغدا نحكيله
😂
امي : خزي عليك😂😂
حطينا نا وامي العشاء وانا قعدت بينهم وهم وهما يعونهم قلوب😂😂😂😍
ريتوا الشياب مايطلع منهم 🤗🤗
