#صفحات من الماضي
الكاتبة فاطمة عادل
علي : ماما عدنة خبر الج موزين بس لتنقهرين فدوة خفنة عليج ومكدرنة نكلج
ماجدة : شنو صاير
علي : مووو تدرين تكريت صاير بيها قصف
ماجدة : اي
علي : شقتنة راحت بالقصف اتفلشت العماير كلها للكع
ماجدة : حسيت مي حار ووكع ع راسي شقتي اللي ذبيت بيها تعب عمري واني اللي تصورت رح تكون سند الي باجر عكبة تصير الاوضاع بتكريت زينة وابيعها واشتري هنا لو نرجع لتكريت الايجار هلكنة وشكد تعبت يلا كدرت اشتريها
بس نزلت راسي وحطيت ايدي ع راسي
اجوي علاوي وحسوني كعدو يمي ويحاولون يقنعوني مصاير شي جبير وعادي نكدر نعدي الازمة
علي : فدوة الج ماما احنة تلاثتنة نشتغل ونجمع الفلس ع الفلس ونشتري احسن من ذيج الشقة بس لتنقهرين
حسين : ماما فدوة الج اهم شي انتي سالمة واحنة سالمين وعايشين سوة
ماجدة : رفعت راسي كتلهم اي والله اهم شي انتو سالمين وبستهم ودخلت نمت نزلت دموعي ع تعب السنين اللي راح بعدين كمت صليت ركعتين واستغفرت ربي وكعدت
علي : هااا ام علاوي ممأمنة بولدج يجيبولج احسن من هاي الشقة
ماجدة : فدوة لعينكم انتو عندي الدنيا كلها
علي : الله لايحرمنة منج امي واندعيلي الله يرزقني حتى ادزج للحج وتصيرين حجية
ماجدة : اتمنى والله يايمة
علي : ان شاء الله
ماجدة : علاوي شنو اخبار نيرمين
علي : والله ماما نفس الشي هذاك ابن عمها العار بعدة خاتل ورايح للموصل وابوها يركض بيها يريد يطلكها وعمامها واكفين الة ميقبلون يكلولة ابن عمها وتبقة ع ذمتة
ماجدة : شنو اجباري تبقة ويا
علي : هاي عقليتهم بعد
ماجدة : الله يهديهم
ثاني يوم أجة علية الصبح استاذ مهند وطلعت كعدت بالسيارة ورحنة حجالي عن نفسة
مهند : اني مطلك زوجتي وعندي جهال ومتقبل اشوفهم ومن حاولت ابلغ المحكمة اخذتهم وسافرت وبعد مشفتهم
ماجدة : الله يكون بعونك بعد الظنة مينحمل
مهند : يجي يوم واخذهم بحظني مثل الاول
ماجدة : ان شاء الله
مهند : وانتي ست ماجدة متزوجة
ماجدة : اي اني منفصلة وعندي اولاد اثنين
مهند : الله يحفظهم الج
ماجدة : رحم الله والديك
وصلنة للدائرة كعدنة نشتغل اجة مسؤول الوحدة كلي عندج رواتب متراكمة تعاي استلميها رحت استلمت رواتبي المتراكمة كلش فرحت بيها وكلت من ارجع افرح ولدي وياية
