#هكذا_القدر
#الحلقة_41
انا : حيي شنو فيه
معتز (توتر) : مش عارف خلينا نخشو نعرفو شنو فيه
انا : لالا خش انت .. توا نستنى هنا انااا
معتز : تيي خشي كيف تستنى هنا
انا : مانبيش نحرجهم بلكي صايره حاجه .. خليني هنا
معتز : تي خشي انتي وحده من عائلة توا
انا : لالا نستناااك هناا
معتز : خشي لجيين هيا
( خشينا ... وانا مانبيش نخش من اساس .. لان خايفه تكون مشكله وهكي وانا عروس جديده .. اكيده يقولو وجها نو علينا (نحس) ونحرجهم حتى .. بس خشيت وانا مطبسه راسي )
معتز : كنكم شنو فيه اصواتكم عاليه واصله لبرا
ايات : هييييييييي اهي لجييييييييييين جت
( انا لما قالت هكي انفجعت قلت حي عليهم كنهم هذيما .. وحق خفت شويه )
انا : اهلا .. ان شاء الله خير
رحاب : ههههههه هذينا سهام و ايات .. مترهنات اذا انتي هتجي بدري ولا متأخر
معتز : من جدكم انتو ... صوتك واصل لغايت برا عشان هكي
رحاب : هههههه كل وحده تعيط تقول انا بنفووز ... ويتعااركوو
انا : ههههه باهي من اللي فازت
ايات : اناااا طبعا .. دزيلي رصيد هي
سهام : لااااااااا .. انتن متفقات معنتها
انا : ههههه لا والله انا اصلا خاشه وانا مفجوعه نحساب الا فيه حاجه كبيره
معتز : مترهنين ع رصيد
ايات : اها ع 3 جنيه .. خليها توا تحولي رصيد ماليش داخل انا اللي فزت
معتز : خلاااص حوليلها 3 جنيييه
سهاام : باهي انت حولي جنهين بيش نحوللها 3 جنيييه
معتز : انا مادخلنش بيكم
( طلعت عميمة من مطبخ .. وفرحت لما شافتنا )
ام معتز : اهلين اهلين .. كيف حالكم
انا : اهلا ,.. الحمد الله كيف حالك انتي <3
ام معتز : بخير لما شفتكم
معتز : خلاص انا طالع تبو شيء
ام معتز : سلامتك
معتز : هي سلام
نحن : سلام
ايات : هيا حوليلي رصيييد توااا .. خليك قد كلمتك
سهام : خلااص يا سكانه توا نحولك .. تي شنو جيبك انتي توا
انا : هههههه شنو يعني نروح ؟
سهام : ههههههه لالا كويس انك جيتي رايفنا عليك
انا : نجك ليا :*
ام معتز : ليش جايه بدري هكي .. مزلتي عروس انتي
انا : لا كيف لازم نجي بدري .. باعدين انا حابه اني نجي بدري .. ماعندش مشكله <3
ايات : هاابااا مش كيف ناس
ام معتز : اسسس يا بنت عيب
ايات : يييي علياا انا .. تعالي لجين للدار .. حتى تسلحي عبايتك
انا : باهي هي
( خشيت انا والبنات للدار وسلحت عبايتي ... كنت لابسه حاجه بتاعت حوش وضم وحوسه )
سهام : بس غريبه جايه بدري يا لجين استغربتها منك
انا : كيف استغربتيها مني
سهام : يعني بنت صغيره .. ومزالت عروس .. وتجي بدري يوم جمعه .. غريبه بكل .. يعني حاجه نادرا ماتصير توا
انا : اممم مانشوفش فيها غريبه .. بالعكس عادي <3 يعني لو عروس لازم نجي متأخر هههههه
ايات : تهبلي انتي يا لجين .. مش زي الهانمم الاخرى
انا : استبرق ؟
ايات : من في غيرها .. نتذكر اول جمعه لها معنا .. كاينه بعد ماتزوجت بشهر ونص ... واخرى جت بعد صلاة ظهر
رحاب : خلاص ومن وقتها وهيا تجي متأخر ساعه 11 او 11 ونص .. ديمه تجي
سهام : اتجي والغداء ع نار وكل حاجه واتيه
انا : اهااا .. بعد خطرها انتن اسغربتن شكلي في فرح ؟
رحاب : كيف يعني !!
انا : يعني شعري مش صابغته ولا ميش .. وقصير وهكي
ايات : ومش مدايره حنه ههههه
انا : ههههه ايوا
رحاب : امممم لا هو كل واحد وكيف مايتريح .. وكيف مايحب .. يعني نعرف واجدات تزوجن من غير صبغه ولا ميش .. واخرى شعرهن قصير .. بس الحق انتي ول وحده نشوفها مش محنيه .. حتى حاجه بسيطه مش مدايره .. شنو ماتحبيش حنه
ايااات : احسن ماعندك ماتبي فيها .. رحيتها شينه وشكلها مقززز بكل
سهام : تي عدي ملحي .. مافش احلا من ريحتها .. وانتي مقززه ... هيا هكي عجينه خضراء
انا : هههههههه لا عادي
