سيارة اسعاف امام الفندق والشرطة بداخل الفندق والجميع يتحدث عن طلقة الرصاص وينظرون للشخص المصاب على النقالة والخوف يسيطر على الجميع
امام المشفى
الدكتور : الحالة ايه ؟
رجل الاسعاف : سيدة عمرها 25 سنة .. مصابة بطلقة رصاصة والاصابة خطيرة !!!
الدكتور : نبضات القلب ؟
رجل الاسعاف : غير مستقرة وفقدت دم كتير
الدكتور : على غرفة العمليات فورا .. بسرررعة
سلمى تبكي : انا خايفة عليها اوي
خليل : وانا كمان جدا .. ربنا يستر
سلمى : يااارب . وجاء خالد
خالد : سلمى ! ايه اللي حصل ده ؟ شوفته على التلفزيون والنت .
سلمى : مراد ضرب جميلة بالغلط !!!
خالد : انتي بتقولي ايه ؟ ازاي ؟
سلمى : جميلة وقفت فجأة قدام خليل اخوها عشان تحميه والطلقة جت فيها هي
خالد : انت اخوها خليل !!!!
خليل : ايوة انا
خالد : مراد كان حكالي عن انتقام او حاجة زي كده
سلمى : تعالى معايا .. اخوها هو الشخص اللي مراد عايز يقتله وينتقم فهي طبعا مقدرتش تشوف اخوها ميت ولا جوزها مسجون
خالد : ايوووه .. مش قادر اتخيل حتى ... الخبر في كل مكان وفندق ماريوت طلق ناري بداخله
سلمى : كارثة
عبد العزيز وعزت وسعاد وصلوا المشفى
عزت : بنتي ...بنتي فين ؟
سلمى : انكل عزت ..اهدى ارجوك .. دخلوها غرفة العمليات ولسه منعرفش اي حاجة عنها ... اهدي وادعيلها
سعاد : يا حبيبتي يا جميلة .. مش عارفة ايه اللي بيحصلها
عبد العزيز : ومراد فين ؟
خالد : في القسم .. قبضوا عليه
سعاد : وازاي خليل يطلع اخوها ؟ لو اعرف ما كنت قولتلها حاجة من الاول
عزت : انا عرفت هي ليه سألت عن خليل .. كانت عايزة تتأكد
عبد العزيز : انتي كنتي موجودة ساعتها .. ايه اللي حصل بينهم
سلمى قالت لهم كل شئ
عزت : يعني زين يبقى ابن خليل مش مراد !!
سلمى : بالظبط وطبعا بعد ما مراد عرف ان شيري خانته وان زين مش ابنه .. اتجنن خالص وكان عايز يقتل خليل .. جميلة فجأة ظهرت قدامه والطلقة جت فيها هي ! مراد حالته صعبة جدا.. ادمر
عبد العزيز : انا مش قادر اصدق اللي حصل
----------------------
في مركز الشرطة
مراد صامت ودموعه تسقط
و الخوف يسيطر عليه بالكامل .. خائف ان يفقد جميلة ! ( ما اصعب ان تفقد شخص تحبه وتكون انت المتسبب بوفاته ! )
الشرطي : مراد .. مراد عبد العزيز اعترف ... ليه ضربت مراتك جميلة بالنار ؟ الانكار مش هيفيدك
مراد : ضربتها بالغلط ... لا يمكن اعمل كده فيها قصد .. دي مراتي وانا بحبها ..قتل خطأ
الشرطي : ولما هو كده ليه المسدس كان معاك ؟ واخوها هو خليل .. مكنش عندك علم بالموضوع ده ؟
مراد : مكنش عندي علم
الشرطي : انت داخل الفندق وكنت قاصد تقتل خليل ؟ ومراتك ظهرت قدامك فجاة عشان تحمي اخوها.
مراد :انا كنت رايح عشان انتقم من خليل لاني كنت متأكد انه هو اللي اتسبب بموت مراتي شيري وابني زين الله يرحمهم في ايطاليا .. حصل حريق في مخزن واتوفوا واعتقد انه هو اللي عمل كده
الشرطي : وليه كنت متأكد ؟
مراد : لان من زمان انا وخليل كنا صحاب وبيت خليل اتحرق وامه واخوه ماتوا وساعتها اتهموني بأني انا اللي عملت كده لكن بعد كده طلعت برئ
الشرطي : ف اعتقدت انه هو عايز ينتقم منك بنفس الطريقة
مراد : بالظبط .. لكن هو قالي الحقيقة ..انه مش هو اللي عمل كده وانا ليا اعداء في الشغل كان واحد منهم
الشرطي : موضوع كبير
مراد : نعم
مراد تم حبسه وسوف يعرض على النيابة صباح الغد
--------------------
في المشفى
سلمى : الدكتور
عزت : طمني ارجوك .. بنتي عايشة ؟
الدكتور : عايشة الحمد لله ... الطلقة كانت في مكان خطير جدا ، فوق القلب ب 4 سنتي .
سعاد : اتكتبلها عمر جديد
الدكتور : بالظبط .
عبد العزيز : وحالتها ؟
الدكتور : غير مستقرة حاليا .. هننتظر 48 ساعة لغاية ما تعدي مرحلة الخطر .
عزت : يارب
الدكتور : لكن في حاجة ..
عزت : في ايه يا دكتور ؟
الدكتور : مدام جميلة دخلت في غيبوبة !!!!!!!
سعاد: غيبوبة !
الدكتور : وطبعا احنا الدكاترة بنعجز قدام الغيبوبة
عزت : يعني متقدرش تحدد ممكن تفوق امتى ؟
الدكتور : للاسف لأ .. في ناس بتفوق بعد شهر .. شهرين .. ستة ... وساعات سنة .. وللاسف في ناس بتفوق بعد سنين .. لا يمكن نعرف هي ممكن تفوق امتى .. كل اللي علينا وعليكم الدعاء .. الدعاء فقط .
عزت : الزيارة مسموحة ؟
الدكتور : ممنوع بعد ما تعدي مرحلة الخطر .. حاليا انتم مش في ايديكم اي حاجة .. تقدروا تروحوا ترتاحوا ولو حصل اي تطور او لا قدر الله حاجة هنتصل بيكم فورا
عبد العزيز : شكرا يا دكتور
سعاد :ادعيلها .. ادعيلها
عزت : بنتي بتموت ! يا عالم هتعيش ولا لأ
سعاد : بعد الشر عليها .. هتعيش ان شاء الله
خليل يبكي : انا السبب في اللي حصلها ! مراد مشكلته معايا ... وقفت قدام الرصاصة عشان تحميني !
عبد العزيز : انا مش لاقي اي حاجة اقولها ... الانتقام عمى عين مراد
خالد : مراد هيتعرض على النيابة الصبح
عزت : ما يتعرض .. انا همشي
خليل : جاي معاك
سعاد : متزعلش منه .. بس هو موقفه صعب جدا
عبد العزيز : عارف ومقدر .. مش قادر ابص في وشه حتى ... مراد مستريحش الا ما دمر نفسه ودمرنا كلنا معاه
خالد : مفيش فايدة فيه .. انت بعتله المحامي مش كده ؟
عبد العزيز : اه
خالد : انا هوصل سلمى
عبد العزيز : ماشي
خالد : يلا يا سلمى
------------------
في السيارة
سلمى : تفتكر كده علاقتهم انتهت صح ؟
خالد : مش عارف .. بس مفتكرش ان جميلة لما تفوق ان شاء الله ممكن تسامحه
سلمى : ولا انا
خالد : مراد مدمر .
سلمى : انت مشوفتش شكله بعد اللي حصل .. جميلة على النقالة ودمها طبعا ومراد في ايده الكلابشات وبيبص ليها .. كان بيعيط وصامت .. اتصدم
خالد : مراد طول عمره تعبان في حياته .. ربنا يستر على اللي جاي
سلمى : هو كده مش هيخرج ابدا
خالد : لسه .. بس غالبا بما ان جميلة عايشة ف ممكن يخرج بضمان محل اقامته لانه قتل خطأ .. اما نشوف ايه اللي هيحصل بكره
سلمى : ربنا يستر
--------------
اليوم التالي
عزت : سلمى تعالي عندي دلوقتي
سلمى : في ايه ؟
عزت : تعالي بس عندي البيت
سلمى : انا جاية حالا
وبعد وصول سلمى
عزت : انا طول الليل منمتش .. جوايا شك .. في حاجة بتحصل مع جميلة او في حاجة في حياة مراد بتأثر على جميلة
سلمى : ازاي يعني ؟
عزت : يعني بعد كل اللي حصل لجميلة .. انا ابتديت اشك ان فيه حاجة مش طبيعية .. فيه سر في حياتهم .. في حاجة انا مش عارفها .
سلمى : هقولك .. خلاص اعتقد ده الوقت المناسب اللي انت تقدر تعرف فيه كل حاجة من الاول
سلمى قالت لعزت عن سبب جواز مراد وجميلة المفاجئ !
عزت : ازاي محستش بيها ؟ يعني انا لما كنت طاير من الفرحة هي كانت بتتعذب !.. اتجوزت عشان تحميني !! يا حبيبتي يا بنتي
سلمى : انا عايزة اقولك حاجة وانت كمان يا خليل ، جميلة صحيح اتعذبت كتير في اول جوزاهم وهي ومراد كانوا كارهين بعض بس الكره ده اتحول لحب حقيقي .. مراد حب جميلة بجنون وهي كمان حبيته بجد .... محدش فيهم تخيل انهم ممكن يحبوا بعض في يوم .. ابدا .. قدرهم .. يعني دلوقتي الموضوع اختلف .. مراد وجميلة بيحبوا بعض ومحدش هيقدر يمنع حبهم !
---------------------
وبعد مرور يومين .. مراد بعد عرضه على النيابة ، تم الافراج عنه بضمان محل اقامته . واول مكان ذهب اليه هو المشفى ، لم يتصل بأحد يجري في الشوارع وهو يبكي وليذهب لها
مراد : جميلة عزت فين ؟
الاستقبال : مدام جميلة عزت في العناية المركزة .. الدور الرابع اخر الممر
مراد : شكرا .. دكتور .. دكتور انا زوج جميلة .. حالتها ايه ؟
الدكتور : مدام جميلة تعتبر عدت مرحلة الخطر الحمد الله
مراد : الحمد لله .. الحمد لله
الدكتور : معرفش اذا كان عندك علم ولا لأ بس مدام جميلة في غيبوبة
مراد : انت بتقول ايه ؟ في غيبوبة ازاي يعني ؟ ازاااااي انطق ؟
الدكتور : استاذ مراد اهدى ارجوك ... الغيبوبة دي احنا الدكاترة بنكون عاجزين قدامها ... مش بنعرف ابدا امتى ممكن تفوق .. ده في ايد ربنا .. كل اللي عليك انك تدعيلها وممكن تفوق في معاد غير متوقع .. الله اعلم
مراد : اقدر ادخلها ؟
الدكتور : حاليا مش معاد الزيارة
مراد : ارجوك .. انا لازم اشوفها
الدكتور : تمام .. الممرضة هتساعدك
مراد واقف امام جميلة قلبه يحترق وامسك يديها ويبكي ب انهيار !!
مراد : انا بموت من غيرك ! كل ما افتكر اللي حصل قلبي بيتقطع .. الاجهزة حواليكي مش قادر اصدق ان انا السبب في كل ده ... طول عمري كنت عارف ان اخرتي هتكون في السجن لكن عمري ما تخيلت ان هدخل السجن عشان ضربتك انتي ! ربنا عاقبني ب اكبر عقاب . اني اشوفك في الحالة دي وبسببي !!!
الدكتور : استاذ مراد .. كفاية كده وهدي نفسك
مراد : سامحيني يا جميلة .. ارجوك تسامحيني
الدكتور : ادعيلها
مراد خرج من غرفة العناية المركزة وعزت كان واقف بالخارج
عزت : كنت عايز تقتلها من الاول .. ارتحت كده دلوقتي .. اهي جوه في غيبوبة .. ارتحت يا مراااااد ... فرحان انت دلوقتي وانا بنتي بين الحياة والموت .... عايز اقتلك .. اقطعك !
مراد : بنتك هي مراتي على فكرة وبحبها بجنون ... وقلبي بيتقطع
عزت : انا عرفت كل حاجة يا مراد .. قد ايه غصبت عليها انها تتجوزك عشان متفضحكش انت وابوك وههدتها بيا انا !! اتجوزتك عشان تحميني ودلوقتي هي في غيبوبة عشان حمت اخوها ... انت دمرت حياتها يا مرااااد .. دمرتها ودمرت كل اللي حواليها والاصعب انك دمرت نفسك بنفسك ! انت ضحية نفسك يا مراد !!!! مش ضحية غيرك ولا ضحية خليل !
أنت تقرأ
العشق المستحيل
Misteri / Thrillerتدور أحداث القصة عن الشاب مراد الذي اُتهمَ بحرق منزل صديقه خليل والتسبب في وفاة الام والابن الصغير وهو في عمر 19 ، صديقه الذي كان لايفارقه للحظة تتحول صداقتهم الى عداوة بشعة ، ويضطر عبد العزيز والد مراد ان يُسفر ابنه خارج البلاد حتى يثبت أن مراد ب...
