PART 08
LOGOPMAN I Love You!
By : Annell Cjrosey Adorey
Wattpad : Annell85
SABAHAN SLANG...
Sebulan berlalu... Kana ikat sudah dii. Si Carmen. Dalam setahunlah kunun durang kana kasi tempoh bertunang, paling lamalah. Si Jalis sama si Carmen mau saja kawin tunang turus, tapi keluarga durang yang nda setuju. Sebab macam kelam-kabut.takut ada mulut-mulut bau bawang berabis yang bergosip bukan-bukan.
"Haro noh matu suang!(ada sudah kali isi)"Bilang tu selalukan yang urang-urang, punya mulut.
Jadi durang dua pun setujulah juga. Masa bertunang tu, si vivian nda datang. Sebab alasan dia ngam-ngam ada kursus kunun. Nda tau butulkah nda. Tapi nda penting juga dia ada masa itu. Bukan juga dia yang kana tunang kan? Hehe.
"Kita break!!"Bilang si Jordan masa berjumpa sama si Vivian.
"Kanapa kunun?"Si Vivian macam nda puas hati, sebab direct saja si Jordan cakap begitu.
"Apasan(bosan) sudah saya sama ko, ko ingat saya nda taukah, ko ada hati sama tu kusai kampungan?" Bilang si Jordan lagi.
"Mimanglah saya ada hati mau cari kusai lain, sebab ko pun buat saya macam patung saja. Dulu bukan berabis lagi ko pigi guda-guda saya. Sedangkan masa tu ko mo sama-sama si Carm sudah!"Marah sudah si Vivian.
"Huh!! Saya ingat mau pasang dua,. Nda sangka pula si Carmen dapat tau..."Senyum siring lagi si Jordan. Macam teda tu rasa bersalah.
"Jadi ko pikir, saya pun suka juga kana begitu. Ko mimang lalaki aiso tutok(otak). Ko ingat mo sadap-sadap sajakan?"Si Vivian balas lagi.
"Ceii!! Masa saya pakai ko pun, mimang ko sudah norugus (rosak) sudah. Ndalah saya mau ada bini macam ko. Sadarlah diri tu sikit. Teda lelaki mau ko lapas ni. We are over!!"Turus si Jordan kasi tinggal saja si Vivian.
"Buduh!!"Diabilang si Vivian, dia pun turus jalan dari sana juga.
Si Carmen bermalam di rumah sewa durang si Gina ni malam, masa durang bercerita, si Vivian baru balik. Tapi dia nda layan durang si Carmen sama housemate yang lain.
Bang!! Si Vivian kasi hampas saja tu, pintu bilik dia masa dia tutup.
"Kanapa tu? Macam teruk ja dia mengamuk..."Bilang Si Carmen. Si Gina menggeleng saja.
"Bergaduh kali sama Si Jordan. Macam ko nda kanal tu kusai, kaki tondu(perempuan)..."Bilang Si Stephanie.
"Tulah, sudah juga kana kasi nasihat, masa si Jorsan makan jalan dulu. Masih juga karas kapala. Nah apa dia dapat. Sana tempat kerja pun dia ada skandal juga sama tondu lain bah tu."Diabilang si Christina. Si Christina ni satu pejabat sama si Jordan. Tu company memang family si Jordan punya.
"Anak urang kaya, kalu sudah tu gaya jahat mimang pasang sana-sinilah... "Si Step cakap lagi.
"Bah, kamurang jangan pula, termakan rayuan gombal si Jordan."Bilang si Carmen, kasi peringatan sama kawan-kawan dia yang masih bujangan.
"Soripalis, kalu bulih mau juga macam si Jalis bah, biar logop tapi pandai berpikir jua, insom lagi tu. Gosh!! Napalah bukan saya yang duluan pigi mengurat hari tu arr.. masa di kampung ko Gina. Hahaha..."keluar sudah tu geteh si Christina. Pura-pura dia nda nampak si Carmen yang tunjuk muka gerigitan sudah.
"Oit!! Sudah kana cop tu arr jangam kama kamurang pandai-pandai mau makan jalan."Bilang si Step lagi.
"Halimunan saya ni arr... Sadap ja kamurang bercakap pasal Oppa saya..."Diabilang si Carmen.
"Aish!! Ada pula koupusan si Jalis sini hahaha..."Pacah ketawa durang semua.
"Bah, bisuk awal sikitlah, kita jalan balik kampung durang si Gina. Lama sudah puasa, nda manahan sudah ni..."Diabilang si Carmen, sambil dia tahan-tahan tu ketawa dia.
"Sial, no1 getehlah kalu ko Carmen...hahaha"Si Gina sumarat juga tinguk tu gaya geteh si Carmen.
"Saya geteh pun sama, tunang tersinta saja bah..."
"Ada lagikah, logopman yang macam si Jalis di kampung kamukah Gina? Manatau bulih try, test dan cuba mengurat haha..."Si Christina tanya lagi.
"Ada bah! Tu abang saya... Ataupun si Jonggot."Bilang si Gina lagi.
"Jonggot! Yang berjambang tukah?? Yaii gali-gali gia tu kalu dia kasi topis tu jambang sana pipi..."Bilang si Step pula.
"Ko ingat mo kana sium sajakah? Bulum tau dia mau kamurang,terbayang-bayang sudah dii kamu.kana sium dia... Odoi dogo, kanapalah kawan-kawan saya ni semua geteh.. haha"Diabilang Gina.ketawa turus durang semua.
Bisuknya tu, awal pagi lagi durang bersiap-siap sudah. Si Carmen sama si Chris angkat-angkat sudah barang-barang mau kasi masuk sana bonet kerita. Tiba-tiba si Vivian keluar dari bilik. Turus pigi bercakap sama si Gina. Dia bilang dia mau join juga balik kampung. Durang semua on saja. Kesian juga. Orang baru broken heart... Manatau happy juga dia di kampung si Gina. Jangan saja buat hal.
Ting!! Masuk mesej wasap di handphone si Carmen. Bilan dia tinguk tu nama penghantar. Turus berseri-seri wajah dia.
"Mana sudah kamu honey?"Diabilang si Jalis.
"Sini lagi kk ni, kijap lagi mau jalan sudah kami. Miss you!!"Bilang Carmen balas tu wasap si Jalis.
"I miss you too... Nda sabar mau ngap tu bibir siksi."Diabilang si Jalis lagi. Geteh oo hahaha...
"Saya pun, lama sudah puasa kan"
"Iya!! Bah jumpa nanti malam kio,"Diabilang si Jalis.
Si Carmen send emoji lob-lob ja.selesai sudah bersiap sama kasi masuk barang di Bonet kerita. Turus durang bertulak dii. Si Gina yang driving. Si Carmen duduk sana sebelah saja. Yang 3 ikur lagi di belakang. Haha macam binatang sajakan mau cakap 3ikur hehe..
"Ko okaykah Vie?"Bilang si Carmen. Iyalah... Walaupun durang nda berapa ngam sama gaya si Vivian kadang-kadang. Tapi lama sudah durang suma berkawan. Jadi timbul juga tu rasa kesian durang sama si Vivian.
"Okay bah, relax ja kamu..."Si Vivian bilang lagi.
"Kumbang bukan seikur bah Vivian..."Bilang si Christina lagi.
"Hmmm... Senanglah cakap, mimang bukan seikur, banyak bah... Tapi mau cari yang berkualiti punya kumbang tu yang susah..."
"Teda juduhlah tu, tutup cerita... Lain kali mau pilih kusai pun, jangan main ambil ja. Macam ko nda tau Si Jordan sama sepa mula-mula. Karmalah tu."Diabilang si Gina. Si Carmen diam saja.
Si Vivian pun nda cakap apa-apa lagi lepas tu. 3jam perjalanan sampailah durang di kampung si Gina sudah. Si Carmen silik-silik sudah tu kusai-kusai yang meginum sana belakang rumah durang si Gina. muncul pula si Terry.
"Teda si Jalis, dia bulum balik karja lagi, Aikk! kamurang bawa lagi tu tunduyutung??"Diabilang si Terry. Merah-merah sudah pipi dia. Masuk cas sudah kali.
"Tunduyutung! Sepa tu?"Diabilang si Vivian yang tiba-tiba muncul...
Si Terry apalagi, takajut juga dia bila yang dimaksudkan muncul haha...
"Aikk... Ada juga ni, juduh saya sini!!"Bilang si Jonggot, bila muncul sana dapur. Sambil tinguk si Vivian. Mabuk sudah si Jonggot. Tu kali barani.
"Juduh?? Sepa juduh ko??"Bilang si Vivian. Poradit sudah tu wajah dia.
"Ko la bah, ko break up, sudahkan... Ada chance laini haha..."Diabilang si Jonggot lagi.
"Sot!! Sepa juga mau ko, bajambang... "Sinis butul, cara si Vivian bercakap.
"Aikk... Jambang bukan sembarang jambang. Kalu bikin gali-gali ni siuk ni. Misti ko nda mau yang lain... Hahaha"Masih juga si Jonggot, nda mau kalah.
"Yaii... Gali saya, ko ni Jonggot. Tapi kalu butul-butul ko sorius mau mengurat saya. Ada 15 tiang sana rumah saya. Jadi ko rasa-rasa ada bikin sedia untuk duit kawin??"Diabilang si Vivian nogi.
"Small matters baitu, Arud!! Ko ingat saya teda income kaini??"Diabilang Si Jonggot lagi. Durang si Carmen sama si Terry ketawa saja dingar durang bertikam lidah.
"Ish!! Loyar buruk butul..."Bilang si Vivian, turus dia keluar dari dapur.
"Aikk... Ko ingat saya main-main, ini Jonggot lah!!! Haha..."
"Jong, napa ko tiba-tiba pigi mengurat dia??"bilang si Carmen lagi.
"Ish, malas saya bah..beliau saya mau kasi juduh saya sama tu anak kawan dia. Mana saya mau begitu. Pantang butul saya. Bagus saya cari sendiri gia..."Bilang si Jonggot lagi.
"Bah... Good luck sajalah, cukur dulu tu Jambang ko bah. Barulah insom..."Bilang si Terry lagi.
"Trademark gia ni, tapi demi Si Tunduyutung... Abang sanggup bah... "diabilang si Jonggot lagi haha.
Malam sudah, Datanglah si Jalis pigi sana rumah durang si Terry. Menunggu sudah si Carmen sana luar rumah. Mungkin sudah durang berwasap awal-awal. Tapi si Jalis bawa tu kerita pelanduk dia. Stop saja tu kerita, turus si Carmen pigi masuk. Baru si Jalis mau sium pipi si Carmen. Kana katuk tu jendila kereta dia.
Aish!! Sepa lagi yang kacau daun ni...
To Be Continue.
