PART 11
LOGOPMAN I Love You!
By : Annell Cjrosey Adorey
Wattpad ; Annell85
SABAHAN SLANG....
Si Vivian sampai sana rumah durang si Gina, macam ada yang dia fikir-fikir ni. Tu rabas dia macam mo makan urang ja. Dia nda masuk lagi dalam rumah. Dia turus pigi pusing sana balakang rumah durang si Gina. Dia nampak aransak nokopio Si Jonggot sama si Terry menius tumpung, sambil menyanyi.
Si Vivian tersenyum macam ada maksud. Dia turus pigi duduk di sebalah si Jonggot. Terkajut juga durang dua ni. Nampak si Vivian muncul di sana tiba-tiba.
"Kamurang bulih tulung sayakah?"Diabilang Si Vivian.
"Apa kunun?"Si Terry, yang menjawab.
"Mari kawan saya pigi sana pekan, ada barang penting saya mau beli ni."Monombirang sudah si Vivian.
"Manada kadai buka lagi ni sekarang. Tangah tuong sudah bah ni... "Diabilang si Jonggot.
"Jong, ko bilang ko suka saya. Kasi tunai tu kata-kata ko ni malam... Kalu nda saya rijik ko."Mengugut sudah si Vivian.
"Siou nopo Tunduyutung, sebelum ko rijik saya. Saya sudah rijik ko duluan. Isai orohian kalu obingtogod kopio."Bilang si Jonggot. Tapi macam palan-palan dia cakap yang ayat last sudah.
"Ko nda manyasal kaini, cakap begini Jong?"Diabilang si Vivian. Macam dia nda percaya si Jonggot baru rijik dia.
"Isai orohian tunduyutung..."Diabilang si Jonggot, palan-palan cakap.
"Apa ko cakap Jong!"Turun naik sudah nafas si Vivian.
"Tedalah... Pigilah ko tidur bah, apa juga ko mau sibuk cari-cari durang si Carmen sama Jalis tu, bukan ko nda tau durang tu bertunang sudah. Ko nda malukah, mau pigi jadi kacau daun."Diabilang si Jonggot lagi.
"Aikk... Saya bukan mau pigi cari durang bah, ada barang saja saya mau beli."Monombirang butul si Vivian ni.
"Ko mau beli barang apa juga begini punya masa, kadai pun sudah tutup."Si Terry menyampuk lagi.
"Kalau kadai sudah tutup, kanapa durang bulum balik!!"Si Vivian kasi tinggi suara dia.
"Aikk... Suka hati duranglah, ko apa hal mau menyibuk sama durang punya hal! Masuk ko dalam rumah sekarang, sebelum saya yang tampiling ko..."Si Jonggot tumbuk tu meja. Si Vivian terdiam turus. Sampat lagi dia menjeling tajam sama si Jonggot, lepas tu turus dia jalan dari sana.
Si Jonggot usap-usap tu Dada dia. Terbasar juga mata si Terry tadi nampak si Jonggot tumbuk tu meja. Nasib nda terbalik tu tumpung durang di meja.
"Sabar ko Jong... Jangan ikut perasaan hehe..."
"Banci butul saya, gaya tondu begitu. ish!! Soripalis... Nasib duluan saya nampak tu gaya dia begitu ooo... Nda tau malu butul."Si Jonggot Tius tu tumpung berabis.
"Saya bulih bayangkan, kalu ko kawin sama dia Jong. Tersiksalah batin ko, hahahaha....."Berabis si Terry ketawa ni.
"Soripalis!! 100% Saya rijik tu..."Diabilang si Jonggot lagi.
Si Gina sama si christina masih lagi bulum tidur, durang masih bercerita di ruang tamu. Tiba-tiba si Vivian masuk, turus si Vivian berlari pigi sana bilik. Berpandangan durang dua.
"Kanapa sudah tu?"Diabilang si Gina.
"Ndalah saya tau, dari mana juga dia tu. Nda saya perasan dia keluar tadi."Si Christina bilang.
Si Jonggot muncul dari pintu dapur. Dia jalan saja kasi limpas durang si Gina. Tapi si Gina turus pigi kombit si Christina. Si Christina macam dua hati mau pigi tegur juga.
"Pigilah, saya mau masuk bilik tinguk si Vivian."Bilang si Gina berbisik.
"Apa saya mau cakap??"Si Christina garu-garu kepala dia pula.
"Ko pura-puralah mau pigi tutup pintu bah, tu pun mau ajarkah?"Si Gina turus kasi tinggal si Christina.
Cepat-cepat si Christina mau pigi tegur si Jonggot. Tersadung pula kaki dia. Nah naratu dii dia macam tu buah nangka ekeke...
"Aduh!!"Diabilang si Christina. Si Jonggot turus pigi masuk balik tinguk.
"Silaka, butul... Macam mana lagi mau kuntrul lawa ni."Diabilang si Christina palan-palan bercakap. Malu sudah dia mau tinguk si Jonggot.
"Aikk, nokuro koh?(kenapa ko?)"Diabilang di Jonggot, dia pigi tulung si Christina berdiri.
"Terpeliot kaki saya tadi, haha... Saya mau pigi tutup pintu bah tu daa..."Nasib capat dia susun tu kata-kata dia.
"Owh... Hehe, okay jugakah ni? Dapat jalan juga? Kalu nda saya dukung..."Diabilang si Jonggot.
"Ish... Okay juga bah ni, nasib nda terseliuh.... Ko mau balik sudahkah?"Diabilang si Christina.
"Kira-kira begitulah tu. Tapi tertunda pula... Nokotigok saya dingar tadi suara ko, tu yang saya pigi tinguk balik. "Bilang si Jonggot.
"Owh... Hurm... Bulikah saya mau berkenalan sama ko?"Diabilang si Christina. Berabis dia tahan malu. Tapi nda bulih tahan juga tu mulut dia mau kasi luah, apa yang ada dalam hati dia sekarang.
"Ko mau juga dii, berkenalan sama kusai kijambang... Ko nda gali..."Diabilang si Jonggot lagi.
"Ish... Apa gia mau tinguk jambang, dari mata turun ke hati begia tu...."rancak sudah si Christina. Libar turus senyuman si Jonggot.
"Aikk, saya ingat sudah balik... Masih lagi ko di sini Jong. Mengayat kaitu!!"Si Terry muncul sudah.
"Ish... Kacau daun butul!"Diabilang si Jonggot.
"Bagi daa numbur telipun ko mandak.... Bulih?"Si Jonggot, kasi keluar handphone dia dari pukit seluar dia.
"Mari sini telipun ko, saya set...."Turus Si Jonggot bagi. Si Christina set dii numbur dia.
Berbalas senyuman durang dua. Nda lama si Jonggot minta diri balik. Sabab si Terry halau sudah haha...
"Saya punya tu arrr... Habis ko kalu makan jalan!"Si Jonggot sampat lagi warning sama si Terry masa dia mau balik sudah.
"Sepa duluan dia dapat begia, hehe...."Si Terry mencabar lagi si Jonggot.
"Puik!! Sinta saya tu, ko ngam sama si Tunduyutung... Ahaha"Turus si Jonggot jalan.
"Silaka... Janganlah masin mulut ko Jong..."Si Terry sumarat bila kana kasi padan sama si Vivian.
Bisuknya sudah, si Carmen balik nodi sana rumah durang si Gina. Si Jalis teda ikut dia. Sengaja si Carmen nda suruh si Jalis ikut dia. Malas dia nanti nampak tu gaya si Vivian yang macam taik ekekeke...
Masuk saja si carmen dalam tu rumah. Turus si Vivian pigi tempat dia.
"Mana juga ko tidur semalam, oh!!"Diabilang si Vivian.
"Ish, kenapa juga ko ni..."Si Carmen tenang lagi menjawab.
"Ko tidur di mana, kanapa ko nda balik?"Masih juga si Vivian nda puas hati.
Si Gina muncul, bila dingar tu suara si Vivian kuat butul bercakap.
"Kanapa juga ko ni, Vie? Awal pagi bising-bising sudah, nasib mama saya sudah jalan pigi dumo. Kalu nda bikin malu saja tu perangai begitu...."Meluat sudah si Gina juga, sama perangai si Vivian.
"Ni lah, si Carm... Semalam dia nda balik, dia tidur mana juga."
"Saya tidur mana, saya punya sukalah... Teda kacau ko punya hidup juga bah..."Si Carmen tahan-tahan sudah marah dia.
"Saya sepupu ko bah, saya patut tau...."
"Sepupu ja, belum layak mau campur dalam hal peribadi saya."
"Ya, tapi ko nda kanal lagi perangai si Jalis tu macam mana."Nda mau kalah juga si Vivian ni.
"Saya lagi kanal gaya dia macam mana, ko apa tau? Ko bukan tunang dia." Si Carmen turus kasi tinggal si Vivian.
"Buduh!"Diabilang si Vivian.
"Jaga sikit tu gaya ko Vivian, kanapa ko macam mencari gaduh saja di sini ni."Si Gina turus masuk sana dapur.
Si vivian masih nda puas hati dia pigi lagi menyusul si Carmen sana bilik.
"Sundal!!"Diabilang si vivian, bila dia masuk dalam bilik. Kuat kali suara dia turus terbangun si Stephanie sama si Christina.
"Ko cakap sepa ni?"Bilang si Stephanie.
"Siapa makan cili, dia terasa pedas!!" Si Vivian senyum sinis lagi.
"Jangan sampai saya tumbuk tu mulut ko sana Vie, selagi saya bulih sabar, bagus ko stop dari menyibuk hal peribadi saya."Diabilang si Carmen.
Terdiam turus Si Vivian, tapi itu jelingan dia tatap tajam. Macam tersimpan seribu dendam ni. Macam ada yang nda beres sama dia ni hehe....
TO BE CONTINUE.
