PART 09
LOGOPMAN I Love You!
By : Annell Cjrosey Adorey
Wattpad : Annell85
SABAHAN SLANG...
"Ish! Apalagi lagi bah ni, tunduyutung mau ni?"Diabilang si Jalis, tapi palan ja tu suara dia.
"Layan sajalah, manatau urgent, dia mau cakap..."Bilang si Carmen. Serba salah kali dia, kalu durang nda peduli.
Si Jalis pigi juga buka tu jendila kerita dia, dingar cakap tu sayang dia. Kalu nda mana dia mau layan si Vivian tu.
"Kamurang pigi mana?"Menyibuk butul si Vivian ni.
"Aikk, saya mau bawa tunang saya pigi sana sungai kijap..."Diabilang si Jalis, monombirang. Si Carmen tahan-tahan tu ketawa dia.
"Buat apa juga pigi sungai malam-malam, apa kamurang tinguk sana, galap sudah ni."Diabilang lagi Si Vivian.
"Ahyah! Suka hati sayalah. Bah siou, kami mau capat ni. Tu nah, si Jonggot panggil-panggil ko sudah. "diabilang si Jalis, bilang nampak si Jonggot, mau pigi tampat durang.
Si Vivian pusing saja belakang, mau tinguk si Jonggot. Turus si Jalis jalan turus saja kerita dia. Ketawa dia berabis.
"Silaka!!"Si Vivian marah butul, bila nampak jalan sudah kerita si Jalis.
"Aikk... Durang si Jalis, pigi mana tu?"Bilang si Jonggot.
"Ntah! Kawan ko, takkan ko nda tau dia pigi mana."Si Vivian mau jalan sudah kasi tinggal si Jonggot. Si Jonggot turus bubut dia dari balakang.
"Kanapa ko ni, mintogod!(marah-marah)"Bilang si Jonggot lagi.
"Suka hati sayalah... Ko apa kisah??"Carmen jeling lagi si Jonggot. Lain-lain turus tu hati dia.
"Bikin takut juga ni, mau bikin bini. Nanti selalu kana suruh tidur luar..."Bilang si Jonggot dalam hati. Hehe..
Si Jonggot malas sudah dii, mau layan si Vivian. Turus dia kasi biar si Vivian masuk duluan sana rumah. Muncul si Gina sama si Christina.
"Kanapa tu Jong?"Diabilang si Gina. Mungkin durang dingar suara si Vivian marah-marah tadi.
"Ndalah saya tau tu, obing togod(kuat marah) butul, rijiklah tu... Salah kali tuhan bagi saya juduh."Diabilang si Jonggot. Si Christina turus ketawa ni. Apalagi turus si Jonggot baru tersadar, ada lagi pula sumandak lawa di dapan dia.
"Harapan Jong! Harapan!"Diabilang tu suara hati dia bercakap. Tapi tiba-tiba patah balik tu rasa hati si Jonggot.
"Ish! Mustahil ni Sigu mau sama saya..."Bilang Si Jonggot. Dia turus pigi balik sana port durang lumogop.
Si Gina sama si Christina, pigi duduk sana pondok dapan rumah durang. Si Stephanie lama sudah kogoruk.
"Tu kah, si Jonggot?"Diabilang si Christina.
"Ya, kanapa?"Si Gina tersenyum jajal sudah. Macam dia dapat baca tu fikiran si Chris.
"Hmm.. tedalah, tanya ja... Buli tahan juga gia tu kan, apalagi kalu tu jambang kasi trim sikit atau buka turus. " Diabilang si Chris lagi.
"Yaii... Kau jatuh sinta dii padanya!! Hahaha..."Si Chris turus pigi tapap tu bahu si Gina.
"Ish, bukan dia mau pok si Vivian kah?"
"Perangai macam si Vivian tu, ko ingat orang tahankah?"Si Gina bilang lagi.
"Oh... Hehe, nda saya barani, mau tegur bah..."Si Chris bilang.
"Aikk.. ko mintalah petua sama si Carm, dia sampion kalu bab-bab mengurat ni..."Diabilang si Gina.
"Good idea juga tu, tapi... Kalu si Vivian marah?"Diabilang si Chris lagi.
"Paduli bah, bul jadi buipren dia pun..."Si Gina bilang. Nda lama tu durang masuk dalam rumah. Ogumu togondui(banyak nyamuk) bah haha...
Poradit rabas si Jonggot, masa dia sampai sana port meginum durang. Si Terry Heran juga, kanapa tiba-tiba berubah tu reaksi wajah si Jonggot. Bikin kesian butul si Terry tinguk.
"Kanapakah??"Diabilang si Terry.
"Beginilah ni, kalu kurang insom, kana marah-marah saja sumandak yang ko mau mengurat..."Si Jonggot Tius turus tu tumpung,
"Aik... Ada 3 lagi kusung baitu sumandak sana dalam rumah."Si Terry Bilang lagi.
'Hmm... Si Vivian gia yang saya mo kasi Jinak, tapi dia macam mau pigi suka-suka si Jalis pula tu. Mintogod nogi dii( marah-marah lagi pula...)"Bilang si Jonggot.
"Jadi, kuroyon podi(apa bulih buatlah),"giliran si Terry lagi menius tu tumpung.
"Kalu saya jadi ko Jong, saya pigi mengurat sumandak lain saja, lagipun bukan bagus butul juga tu Si Tunduyutung..."
"Yakan, bunga bukan sekuntum begia..."Si Jonggot kasi sadap hati dia sendiri.
"Tu yang sumil, mungil dan imut-imut tu ko nda ada hatikah? Yang sigu tu hehe..."Si Terry memancing sudah kama, bukan memancing ikan kio haha...
"Tulah kanto, Juduh yang tersesat dari hati saya matu... Haha..."Koirak(ketawa) Si Jonggot berabis.
"Ko Tiun dulu tu sound gitar, saya mo nyanyi ni..."Bilang Si Jonggot.
Siap sudah si Terry Tiun tu Gitar, nah dia sitat dii main sudah.
"Bah, apa ko lagu!! Kasi main gia tu lagu Francis Landong... Yang saya salalu nyanyi tu."Diabilang si Jonggot lagi. Si Terry senyum libar sudah.
"Okay, ready ..."Si Terry sitat sudah musik gitar dia.
"Kiristina, Enam belas tahun nogi, Baru nokopiruba toh,Cemburu belum kahwin...Kiristina,Owiyo poh noh sikul nu,Ajanji ku mindad dika,Sabar aku mindad kamu...."Siuk butul tu suara si Jonggot.
Sampai ada yang tertarik hati sana dalam rumah sudah. Senyum-senyum keseorangan si Ginan sana dalam dapur, samb cuci piring sama galas.
"Uii... Macam ada harapan saja ni,"Diabilang Si Gina sama si Christina.
"Ko rasa saya kaitu dia kasi maksud, dalam tu lagu fia nyanyi..."Si Gina tanya lagi.
"Isai koilo(siapa yang tahu)...hehe, manatau untuk menarik sumandak idaman kalbu...ekekeke..."Berabis durang dua katawa.
"Ko ada hati sama dia jugakah?"Si Gina bilang.
"Hurm... Mana bulih kasitau ko, nanti ko menguluk."Diabilang si Christina lagi
"Yaii... Perasantut kopio"Si Gina turus, kasi tinggal si Christina sana dapur.
Masih lagi bulum mati tu senyum dia,
"Ish... Rumantik juga ni, bila lagi kunun ko rancang ni Oppa dalingku..."Diabilang si Carmen, bila durang duduk sudah di dalam restoran. Itu ruangan yang durang duduk suram-suram tu lampu.
Candlelight dinner gia, begitulah selalukan tu keadaan dia. Ada lilin-lilin lagi kunun di meja. Turus bertentang mata lagi. Kamurang bayangkan saja. Si Carmen senyum-senyum malu lagi kunun.
"Nda ko kasitau awal-awal bah, tinguk baju saya macam yang mau pigi pasar malam saja ni. Malas butul saya ko ni."Diabilang si Carmen.
"Ko pakai apapun lawa bah Honey, kada kosusah. Di mata saya ko sentiasa asantik."si Jalis pandai butul, berkata-kata kio.
"Sweet talker, butul ko ni Oppa..."Diabilang nogi si Carmen.
Gembira butul si Carmen tu malam, bersuap-suap lagi durang makanan.
"Baguskan, kalu hari-hari begini."Bilang si Carmen lagi.
"Nanti lapas kawin, hari-hari kita buat begini kio. Hari-hari adalah hari sinta kita."Si Jalis tangkap tangan si Carmen turus dia kiss.
Atukoi, gali-gali pula ginawo saya ni haha...
"I lob you..."Diabilang si Jalis.
"I lob you more..."Si Carmen balas.
TING!! Masuk pula chat sana wasap si Carmen. Si Carmen tinguk tu chat di Wasap dia. Berubah turus tu riak wajah dia.
"Aikk, kanapa begitu tu wajah??"Diabilang si Jalis.
TO BE CONTINUE.
