PART 16 ( Ending )
Logopman I Love You!
Annell Cjrosey Adorey
SABAHAN SLANG.....
Sampailah hari yang ditunggu-tunggu. Si Jalis sama si Jonggot bertolak dari kampung, bersama-sama tu rombongan dari kampung durang.
"Odoi tie tanak wagu, tau mau kawin pigi nogi lumogop. Tinguk sekarang jam berapa sudah ni baru kamu mau bersiap-siap."Si Daima sama mama si Jonggot berabis membebel.
Mingirak nogi durang dua. Durang pigi tabung saja sana sungai tadi mandi. Baru berlari tu logopman and the geng balik rumah pigi bersiap. Durang Gina sama si Stephanie yang tulung atur tu pengantin kusai dari kampung.
Siap sudah kana kasi badak tu rabas durang, kasi lawa tu rambut. Pakai tu lipbalm lagi. Mau kasi nampak tu bibir mirah memukau gia. Jangan kamurang cakap macam pundan kama. Saya rutan kamurang sana hehe. Insom sudah dii tu pengantin lelaki.
Si Gina sama si Stephanie. Pigi menulung lagi atur tu pengapit logopon. Lapas tu Si Gina pigi suruh si Stephanie atur tu adik dia punya baju pengapit. Dia nda nampak pula si Kevin.
"Mana gia adik ko ni, teda di sini pun."
"Ahyah... Dia balik rumah pula tadi tu, ko pigi sanalah, nanti kami singgah ko sana turus. Sudah juga kita bersiap ni. "Diabilang si Gina.
Dua hati si Gina mau pigi. Tapi hari penting ni, mana bulih macam tu. Si Gina pigi juga dii. Sampai sana rumah durang si Gina ada mama durang sana ruang tamu.
"Anty, ni nah baju si Kevin..."Diabilang si Stephanie, dia harap tu Mama si Gina, ambil tu baju turus pigi kasi sama si Kevin. Tapi tekaannya meleset, bilang tu malayu punya cakapan hehe.
"Sana dia bilik dia tu, pigi nopo bagi dia sana.. "Turus Mama si Gina keluar pigi kaki lima.
Si Stephanie terpaksa juga dii pigi ketuk tu pintu bilik si Kevin tapi teda menyahut ni. Dia tinguk tu jam tangan dia, turus dia buka saja tu pintu bilik si Kevin. Terkejut dia turus. Sikit lagi terjatuh tu baju sana lantai.
"Atukoi, busul yoh!!"Diabilang tu suara hati si Stephanie berteriak haha...
"Kevin!! Nah baju ko..."Si Stephanie turus pigi buang kasi tutup busul(punggung) si Kevin. Si Kevin terbangun, relax saja dia berdiri arr.. menguap nogi dii.
"Aikk... Step, ko pula..."Diabilang si Kevin.
"Iya, saya... Pakailah tu baju. Nda malukah bertelanjang bulat?"Diabilang si Stephanie tapi dia membelakang sudah dii dari tinguk si Kevin.
"Ko nampak sudah dii, jadi ko harus bertanggungjawab."Diabilang si Kevin nogi.
"Banyak santik ko sana, pakailah baju. Lambat sudah kita ni."Si Stephanie turus mau keluar dari tu bilik. Tapi si Kevin pigi tahan lagi tu pintu bilik. Sampai tertutup. Si Kevin pigi peluk si Stephanie dari belakang.
"Mana lagi ko mau lari, juduh ko di sini sudah. Dulu saya bulih biar ko lari. Sikarang? No!"Diabilang si Kevin. Si Stephanie turus terimbas tu kisah silam durang.
"Sudahlah Kevin, dulu-dulu punya cerita jangan ungkit lagi."
"Iya, saya nda mau ungkit, tapi saya mau tagih sudah. Ko tunggu saya di luar, kalu nda ko tinguk saya pakai baju saya."Si Stephanie turus keluar.
Dia pigi duduk sana kaki lima. Nda sinang tu hati dia. Nda tau berapa minit tu si Kevin keluar sudah turus dia kunci tu pintu rumah. Heran si Stephanie.
"Aikk... Anty mana? Takkan ko mau kunci anty di dalam rumah..."Diabilang si Stephanie.
"Lama sudah durang jalan..."Si Stephanie kalam kabut sudah mau jalan pigi sana rumah si Jalis.
"Aikk... Ko mau pigi mana lagi, durang semua sudah jalan tadi lagi. Ko ikut saya..."
"Silaka!!"Diabilang si Stephanie, tapi dalam hati sajalah.
Senyap saja durang dalam perjalanan pigi kk. Si Stephanie berabis memaki durang si Gina sana grup wasap durang.
"Silaka, buduh... Kanapa ko kasi tinggal saya oh!! Saiko butul adik ko ni... "Si Kevin silik-silik kama si Stephanie.
"Nda payahlah ko wasap kakak saya... Bagus ko bercerita sama urang yang ada sama-sama ko sikarang ni. Ada hasil lagi."Diabilang si Kevin.
"Apa juga mau cerita. Diam begini pun okaylah... Atau pasang lagukah?"Turus si Stephanie mau pigi tojok tu button on radio. Si Kevin tahan tu jari dia.
"Saya gigit ni jari ko... Jangan on, kita kasi selesai dulu hal kita."Diabilang si Kevin lagi.
"Sudahlah bah Kevin. Past is past. Semua sudah jadi sejarah lama kita..."
"Tapi saya mau tagih..."
"Apa juga ko mau tagih ni?"
"Saya mau tagih janji ko dulu, ko cakap apa-apa jadi ko tatap akan cari dan tunggu saya. Sikarang saya ada di dapan ko sudah. Kanapa ko ignored saya?"
"Saya malu bah, ko taukah apa itu malu. Cinta monyet bah dulu. Masing-masing masih jajal."
"Jadi sikarang?"
"Bulihkah, kita sambung cerita pasal ni lain hari, saya nda mau mood saya kana kacau masa wedding kawan saya. Saya janji lepas habis ni acara, kita sambung balik bincang ini hal."
"Okay, kalu ko lupa janji ko. Saya sendiri tarik ko dapan-dapan durang kakak sama abang saya."Diabilang si Kevin.
