أسفة ولكني عنك لن اتنازل ✅✅✅✅✅

Part 10

كانت الاجواء في الشركة وخصوصا بقسم التصدير علي غير العادة ... الكل واقف علي قدم وثاق حتي يصل مجدي ومروان الي حقيقة خروج الاوراق من مكتبهم ووصولها الي مكتب حازم عن طريق منال ...

مروان : مش ممكن اللي بيحصل دا ... من امبارح واحنا مانمناش وبرضو مش عارفين ازاي الكارثة دي حصلت ...

مجدي : الكارثة الحقيقية هتحصل اول ما الاستاذ حازم يوصل ويطلبنا سوا عشان يعرف نتيجة البحث اللي عملناه ...

مروان : والحل ... كدا احنا اللي هنشلها واحنا مالناش دخل في الموضوع دا ...

مجدي : بس ماتنساش ان الاوراق دي نسختين واحدة عندي والتانية عندك والاتنين اختفوا ...

مروان : مين اللي عمل العملة دي ... هتجنن مين المستفيد انه ياذينا ...

مجدي : مش عارف ودا اللي مطير عقلي ومخليني مش عارف اركز ...

مروان : شوف الحكاية دي مالهاش الا مخرج واحد ...

مجدي : اللي هو ...

مروان : نراقب منال ...

مجدي : نعم ... منال ... ليه بقا ... فهمهالي ...

مروان : مش محتاجة تفكير ... منال هيا اللي قدمت الاوراق دي لحازم وبعديها صحي المارد من نومه واستدعاك وعرفك اللي حصل واداك المهله اللي قربت تخلص علي فكرة ... يبقا حل اللغز كله في ايد منال

مجدي : لكن ... انا اشك في نفسي وما اشكش في منال ... لا مروان شوف حل تاني ...

مروان : مجدي اسمعني بقا المرة دي وبلاش تحكم عواطفك ... انا ملاحظ اعجابك بمنال ويمكن كمان تكون بتحبها لكن صدقني البنت دي ما تستاهلكش ومش مناسبه ليك ...

مجدي : تقصد ايه ...

مروان : قصدي انت فاهمه كويس ... دي لو بتحبك صحيح كانت ريحتك وعرفتك مشاعرها من ناحيتك ايه

مجدي : مش يمكن مكسوفة ...

مروان : مكسوفة ... والله انت راجل طيب ... مين دي اللي بتتكسف ... منال ... اولا دي وشها مكشوف وعارفة هيا عايزة ايه وعايزة توصل لايه وازاي توصله ...

مجدي : مروان شكلك عارف حاجة ومخبيها عليا ...

مروان : شوف يا مجدي انت عارف انا بحبك وبعزك زي اخويا واكتر كمان وبصراحة كدا مش عايزك تكون مضحكة الشركة كلها ... يعني الكل عارف انها من وقت حطت رجلها هنا وهيا حاطة عينها علي حازم بيه ومش هترتاح لحد ما توصله ويمكن تتجوزه كمان...

مجدي : بس كلنا عارفين بما فينا هيا ان حازم راجل متجوز ... وغير كدا بيموت في مراته مش بيحبها بس

مروان : ايوة احنا عارفين كدا بس خلي بالك اننا من وقت اتجوز ما شوفنهاش معاه في ولا حفلة من حفلات الشركة ... وبسبب كدا كل اللي في الشركة خدوا فكره عنها انها وحشة ومش مهتمية بيه ولا بنفسها عشان كدا مابتظهرش معاه زي ماكان متوقع بعد جوازه ... والست منال بقا حصلت كل المعلومات دي وخزنتها في دماغها عشان تعرف تلعبها صح معاه وتوصله زي ما هيا عايزه ... فهمت يا فالح ...