مقالة،ٌ وديوان

لا للانتحار!!

أنا دلوقت في لجنة الامتحان..
الامتحان صعب..بس من المنهج..ومتاح لي اني أستخدم الكتاب وأدور وأجيب الحل..مش عارفة الزمن كام ساعة..بس متأكدة ان الامتحان ليه وقت محدد..أظن إن من الجهل والغباء إني ما أحاولش أدور على الإجابات واستغل الفرص وأروح مسلمة الورقة في نص الوقت أو حتى قبل نص الوقت..
آه ممكن الامتحان صعب زي ما أنا قلت..ممكن ما أنجحش..بس لو استنيت لما الوقت يخلص والورقة تنسحب مني على الأقل هاتلام على قلة المذاكرة بس..لكن لو سلمت الورقة قبل الوقت...هاتلام على قلة المذاكرة والاستعجال والتهور..

الدنيا صعبة والامتحان شديد لكن متاح ليك انك تستعيني بالقرآن والأذكار وتاخدي الحسنات من كل حاجة وبكل سهولة وعلى فكرة الكوريكتر مسموح في الامتحان دا ممكن تغلطي عادي براحتك..بس تداري غلطك بالتوبة ماحدش هيقشره بعدك ويفتش عن غلطك لو فعلا قاصدة تصححي الغلط دا ما تستعجليش على الوقت الامتحان مش سهل قوي كدا ولا النتيجة مضمونة..اقري الورقة كويس وتأملي في كل حاجة..مش لازم تكون إجابتك شاملة وطويلة..كفاية تكون جملة مختصرة بس كتباها صح وقصداها مش غشاها وخلاص..حلي الامتحان بتأني..حاولي ما تسيبيش سطر ساعات بتكتبي الإجابة صح وبعدين تفتكري انها غلط وتزودي حجات تخليها غلط عشان كدا ما تسيبيش سطر أو حاولي..

ما يغركيش الناس اللي هيطلعوا من اللجنة بدري..واوعي تفكري انهم مش هيحلوا وهينجحوا..فيه ناس هيملوكِ الإجابات غلط..فكري قبل ما تكتبي أي حاجة..الامتحان دا نتيجته مش عادية..يا إما هترتاحي للأبد أو هتتعذبي للأبد..علشان كدا.. اوعي تسلمي ورقتك وتطلعي قبل نص الوقت..

_سارة النجار.