رواية .....جعلتني احبها للكاتبة #Besaan💓

البارت_العاشر 🔟

رواية #جعلتني_أحبها

#البارت_العاشر

بعد روحوا الناس قريب المغرب ،قعدت سارة في حوش العيلة وتعشت غادي وتعرفت ع جوهم العائلي ،وكانت ملاك فرحانة بيها واجد تلعب تلعب وتجيها زي اي طفل لما يجي لأمه،والعيلة كلها لاحظت هالشي بفرح،طبعا سارة كانت واخده على قرب ملاك منها من قبل بس توا الشي المختلف ان ملاك كانت تشوفها كأم ومش معبرة حد آخر غيرها مع ان كل العيلة حاضرين حنتها وعماتها ومرت عمها وحتى من جيهة أم ملاك خالاتها كانوا حاضرات بس ملاك كانت تدلع على سارة بس وتجي لسارة بس❤️

ملاك تلعب مع بنات عمها وعمتها بفرح،
ملاك :انا مامتي سارة شفتيها تهبل بتقعد معانا ديما😍 اليوم دارتلي حمام ومشطتلي شعراتي 👧
فوفو:حتى انا مامتي تهبل😍
نونو:حتى انا مامتي 😍
بعد العشاء بوقت سارة كانت بتروح بعد العيلة كلها قريب روحت خدت ملاك معاها ومشت للحوش،تحساب أحمد في الحوش لانه معاش شافاته من لما طلع في العشية ووقت العشي قالولها جي تعشى بس ماقدرت تطلع لان رجالة العيلة كلهم قاعدين وما تجرأتش تتصل بيه.
خشت للحوش وخدت ملاك بدلتلها دبش النوم ورقدت هَا في مكانها طبعا من التعب واللعب رقدت طول،طفت سارة الضي ومشت لدارها بتغير دبشها بس تسمع في جرس الحوش ،استغربت من بيكون وأحمد عنده مفتاح !
مشت بالشوي صبت قدام الباب والجرس يرن
سارة:من ؟
أحمد :أنا
سارة ماسمعتش زين صوته
سارة:من إنت
أحمد:أنا أحمد يا سارة
فتحت سارة الباب بس مستغربة ليش مافتحه هوا وعنده مفتاح
أحمد ورأسه لوطه :آسف كان خلعتك بس المفتاح راحت مني اليوم في المزرعة ومعاش لقيتها مش عارف وين طارت😅
سارة:اممممم ولا يهمك فداك أحمد
أحمد سمع اسمه رفع راسه ،في هاللحظة تلاقت عيونه بعيون سارة كان لحظة قصيرة بس لحظة عمر ،النظرات اللي جمعتهم كانت بالنسبة لسارة حب وحنان،بس لأحمد مش معروف شن معناهن الا ان سارة مش شخص عادي في حياته،بس هو يعرف شي واحد ان آية حب حياته الاول والأخير .
كل هالوقت كان الضي خافت لما فتحتله الباب لما تلاقت عيونهم بس في الوقت اللي خش أحمد وسكر الباب وجي ولع الضي قالتله سارة
سارة: تعشيت أحمد؟
هيا كانت تعرف انه تعشى بس تبيه يشوفها بها الشكل لان مهما كان اقل شي تخليه يعترف بجمالها كأنثى حتى لو بدون حب حاليا.
تلفتلها أحمد في لحظة ماقدرش يرد كانت جذابة بشكل كبير حتى في لمة الأقارب والجيران طول الوقت يتكلموا عليها فما بالك برجل وهالرجل يكون زوجها !
جمال سارة وجاذبيتها كانت لاتقارن بآية لان سارة أقل مايقال عليها انها فتنة تمشي على الارض ،أحمد ماقدرش يخفي إعجابه بجمال سارة وطلعت منه ابتسامة ولمعت عيونه ،بس حاول يتدارك الموقف ونزل عيونه ورد على سارة
أحمد بلبكة:اي تعشيت بكري الحمد لله،ملاك تعشت؟
سارة شافت ابتسامته لما شافها حست بانتصار وان كسب قلب أحمد مش شي مستحيل بس يبي وسعة بال وتفهم ليه،فهمت انه يغير في الموضوع بسيرة ملاك ردت عليه سارة وماحبتش تخليه مرتبك.
سارة:اي ملوكة تعشت ورقدت من التعب والجري اليوم مارقدتش حتى في القايلة جت رقدت طول بس سالت عليك وقلتلها بابا تو يجي بس ارقدي توا والحمد لله رقدت .

أحمد :تمام حتى انا بنرقد توا تبي شي
سارة كانت تبي تسهر معاه وتزيد تأثر عليه بس عرفت انه محاولة بيش يبعدها

سارة:حتى انا نعسانة موت بنرقد طول،سلامتك أحمد بس❤️

أحمد :تمام تصبحي على خير، ومشي للدار خلاها واقفه سارة عرفت ان ماشي بيغير دبشة بس يعني مستحيل يقعد في الدار يرقد فيها
وفعلا هكي صار،أحمد رقد في الصالة وسارة في دار النوم،غيرت دبشها ورقدت .

في حوش عيت عم أحمد بالتحديد عند أريج.
أريج : والله تو تشوفي الا ماناخده منها وزي ماربي خدي آية وتفكيت منها بدون ماندير شي تو نتفكى من هذي يامن ربي يا اما على يديا وتشوفي

نادية بنت خال أريج اللي تحكي معاها ع النقال،

نادية:انتي راسك مسكر تو شن عجبك فيه نعرفه سمح وفلوس ومتعلم بس حتى هو أرمل وعنده بنت وتوا تزوج يعني مش فاضي ليش تجري ورآه شن ناقصك بس

أريج بإصرار وحب : ناقصني هو يا ندو تي أنحبه ياناس نحبه ليش ماحدش فاهمني

نادية:تي واك هبلتيني وراك سنين راه من ايام الإعدادي وانتي أحمد ولد عمي وحتى تزوج نفس القصة

أريج:اي أحمد ولد عمي وتو رح يكون نصيبي وحبيبي في حلال ربي وتشوفي

نادية:يعني شن بديري مثلا يعني تحسابي روحك رح تغريه زي مادرتي قبل على مرته الاولى كنتي احلى منها بس هذي سارة نعرفها وشايفتها يعني مستحيل يشبحلك بعدها،عدا انها هيا تحب بنته وانتي ماتحبيهاش على قد ماقتلك تقربي من البنت كانك تبيه اقله بالك يتزوجك عشانها بس شي

أريج:اي مانحبهاش بنته آخرتها نربي بنت هذاك الكلبة اللي خداته مني

نادية:تي تحشمي ماصح وجهك المراة ميته ماتجوزش عليها الا الرحمه بعدين ماحد يأخذ شي من حد يعني ولد عمك انتي قدام وجهه ماجاكش هوا اللي اختارها بروحه

أريج بعصبية :تو انتي معاه والا معايا نبي نفهم تقول الا انتي بنت عمه وانا مش من دمه

نادية:اي مش من دمه بس مانحبش الظلم ولو حتى الواحد يطمح لشي لكن مش زي افعالك

أريج:يعني شن شفتيني درت توا ذبحت البنت يعني

نادية :لا ماذبحتيها بس نتوقع منك اي شي بنت عمتي ونعرفك ونعرف بلاويك طلع الشعر على لساني ننصح فيك فوتي القاز أحمد والحب الفارغ وتزوجي وعيشي حياتك الف شاب يتمناك

أريج بحزم:وانا مانبيش غير أحمد والف مرة قايلتلك

نادية: واك منك وانا نحرث في البحر هيا باي

وسكرت عليها النقال

أريج تشوف لنقالها،ريت هالكلبة سكرت في وجهي،بس تو تشوف شن ندير ونخليها تشوف بعيونها ان أحمد من نصيبي ،الاولى آية وطارت والثانية سارة وتو بطير وانا الحب كله😍
هههه الثالثة ثابثة😈

#بيسان❤️
نتمنى ان الحلقة عجبتكم،ونتمنى دعمكم وتشجيعكم..

#ملاحظة حبايبي اسف ع تأخير لانه ملقيتش تفاعل واجد هدا عليش بالله نبي تفاعلكم و لو القيت تفاعل. حنزل بالحلقتين و (بنزللكم رواية جديدة )
و كلمووو اصدقائكم يقروها 😍😍 تفاعلووو