رواية .....جعلتني احبها للكاتبة #Besaan💓

البارت الخامس 5️⃣

رواية #جعلتني_أحبها

#البارت_الخامس5️⃣

مشت سارة وملاك للصالة بيش ينوضن احمد بس ماكانش في الصالة ،سارة فكرت انه في الحمام،مشت للمطبخ مع ملاك،اول ماخشت سارة شافت احمد مجهز الفطور،مشت ملاك تجري لبوها،احمد نزل لمستواها وحضنها وباس على خدها..
احمد:صباح الخير ملاكي
ملاك:صباح النور بابا
احمد :كسلانه اليوم توا نضتي،درتلك فطورك بنيتي السمحة ،هي نفطروا
ملاك:ايه بابا انا جيعانة واجد😍
سارة تشبح فيهم وتفكر في احمد ،في أسلوبه وحنيته ومعاملته،زاد إعجابها بيه وكيف مهتم بينته هكي ،خاصة ان اللي تتوفى زوجته يتزوج وينسى صغاره يلوحهم عند خوالهم او يعطيهم لامه بيش يريح راسه،بس هوا لا،ومش هكي وبس كان رافض الزواج مرة اخرى عشان بنته،وحتى لما رضي يتزوج عشان بنته،وشرط وجودها وتربيتها قبل كل شي ،سارة في بالها:غريب انت يا احمد،غريب على طبع مجتمعك ،غريب بطريقة حلوة!
احمد يشبح لسارة:احم صباح الخير
سارة: صباح النور
سارة:اممممم وتيت الفطور ليش ماقتليش انا كنت بنوتيه
احمد بحيرة:درته بحكم العادة هكي متعود 😅
سارة :طيب
قعمزوا كلهم ع الطاولة وقعدوا ياكلوا في جو هادي ،ملاك كانت مرة تأكل ومرة تلعب بالأكل ومرة تبزع وتلبز في روحها
احمد : خلاص يابابا كولي زين عاد شن قتلك قبل مش هذي نعمه من ربي مانفسدوهاش
ملاك: حاضر بابا
ملاك خدت طاسة عصير بتشربها تبزعت علي دبشها
احمد شبحلها بمعنى مش توا قتلك
سارة شافاته وبسرعة لمحتله ان عادي وقعدت تمسحلها في دبشها
احمد سكت ماقالش شي
ملاك بعبرة :هوا تبزع مني شن بنديرله
سارة بضحكة ولعبتلها بخشمها :ههههه عادي ياسمحة فداكي
ملاك فرحت وارتاحت
احمد ناض قال الحمد لله شبعت وناض غسل يده وطلع للصالة
قعدوا سارة وملاك ياكلوا لعند كملوا
سارة ناضت ضمت الطاولة وغسلت اللماعين وملاك كانت تساعد فيها ،فرحانة واجد بها الشي اول مرة تجربه ، بس كانت تشوف فيه مع بنات عمها وأقرابهم بس هيا لا لان ماعندهاش ام
كملوا ضمة المطبخ ،سارة دارت نسكافيه ليها ولي احمد ،ملاك مشت لدارها بتلعب بالألعاب ،مشت سارة ورفعت النسكافيه معاها
احمد كان يقلب في القنوات وكان منزعج ومش حاس بشي جنبه،سارة جت قريبة منه ومع هذا هوا مش معاها،
سارة : اممممم تشرب معاي نسكافيه
احمد تفاجأ التفت عليها وواسى روحه وابتسم
احمد:ايه اكيد في وقته والله
سارة عطاته طاسة وهيا خدت طاسة وقعمزت جنبه قريبة شوي قصدا،
احمد قعد يشرب وسارح يفكر
سارة: ليش درت هكي مع ملاك؟وانت احن اب ع بنته شفته في حياتي!
احمد بألم: ملاك ادير هكي بيش تلفت النظر ع غياب امها وع فقدها ليها ،انا سالت دكتور نفسي على نفسية الطفل اللي هكي وقالي ان الطفل يتصرف تصرفات تلفت النظر وهوا يعرف انها خاطئة مع انك محذره عليها قبل وبينتله ان خطا بس يديرها بيش يجذب انتباهك وهذا اللي صار ولما دارت هكي انا ماعرفتش كيف نتصرف لآني مانعرفش كيف نتصرف نتذكر امها نتذكر الوجع اللي عشته واللي قاعد فيه ،يتخلط عليا كل شي وتسود الدنيا في وجهي،مرات نحاول نضبط نفسي بس نفشل ،ع قد كل شي درته باني نحاول نعوضها ع امها بس مافيش فايدة لان تشوف في روحها لما تبدا مع الأقارب والجيران والبنيات الصغار اللي معاها أمهاتهن كلهن قاعدات معاهن الا هيا ،ديما امي تقولي شن ادير وكيف تصرفاتها في مواقف هكي مع الناس تخيلي تبقى تتعارك مع الصغار وتضرب فيهم مع ان عمري ما ضربتها ولاحد ضربها بيش تكون عنيفه هكي ،معاش عرفت شن ندير كسرتني والله كسرتني،ياريتني انا اللي متت مش هيا ياريتني انا،
سارة قطعت ع احمد كلامه،في لمحة حطت يدها ع فمه تبيه يسكت معاش يحكي،ماتعرفش توصف إحساسها بكلامه ان يبي يموت!
سارة بحب وهيام ولمعه الدموع في عيونها :اششش احمد معاش تقول هكي معاش تقولها مرة اخرى،ربي ماخداهاش منك الا لخيرة ليك وليها وحتى لملاك ،ربي ماياخد شي الا يعوض مكانه بشي اجمل ممكن ماتعرفاش في وقته بس يجي يوم وتعرفه،حتى الوجع اللي تحسه ربي يبي يقويك بيه ،وملاك يكفيها اب زيك،ع قد ماشفت وعشت ماعمري شفت اب زيك في حنيتك وحبك واهتمامك ببنتك حتى في ادق تفاصيلها،يعني كيف تقول هكي وتتمنى الموت تبي تحرم ملاك منه،من حبك ومن حنيتك،وبالنسبة لتصرفاتها فا كل الأطفال عندهم تقلبات ومافيش حد كامل ،بعدين انا وين مشيت،ملاك في عيوني وقلبي وح نكونلها امها الثانية ونحاول نعوضها ع فقدها لامها بحد جهدي ،المهم مانشوفك هكي مرة ثانية
احمد مش عارف شن يحكي ولا شن يرد اصلا من ناحية كلام سارة اللي خش قلبه وذوبه ولمسه يدها لشفافه! هالشي خلاه يرتبك بجد مش ارتباك عادي ارتباك شخص متأثر بشخص ومرتاحله او ممكن حتى حس بإعجاب ناحيته!

#بيسان