رواية #جعلتني_أحبها
#الحلقة السادسة
في اللحظة اللي تحكي فيها سارة مع احمد خشت ملاك عليهم في الصالة،
ملاك:بابا هي نعدوا لحوش حنتي بنلعب مع نونو وفوفو
احمد بضحكة:ههههه من توا يابابا مزال صبح ماظنيش ناظن توا
ملاك بإصرار :لا ناظن نعرف انا
احمد :ههههه طيب يابابا تو نمشوا تو نديرلك حمام قبل بعدا نمشوا
سارة قاطعت احمد
سارة :انا تو نديرلها حمام
احمد :لا عادي تو انا نديرلها هكي هيا متعوده
ملاك :لالا بابا نبي خويلة سارة اديرلي
احمد:ههههه هكي ماتبيش بابا ياملوكة
ملاك:يابابا ماهو بنات عمي وبنات عميمة ايدرلهن ماماتهن وانا ماعنديش ماما اديرلي خويلة سارة
احمد انصدم اول مرة تحكي بنته هكي قبل ماقالتش هالشي لحد ولا عمرها قالتله هكي مع ان هوا اللي يهتم بيها ويديرلها حمام
سارة باسلوب تحاول تنهي الموضوع
سارة:خلاص حبيبتي ملوكة انا نديرلك من عيوني ياروحي اللي انتي تبي انديرهلك زي مامات بنيات عمك وعمتك باهي
ملاك بفرحة وضحكة:هزت راسها بمعنى باهي
مشت سارة لدار ملاك خدتلها منشف ومشت معاها للحمام اديرهلها في حمام ،قعدوا في الحمام ساعة من كثر ما ملاك فرحانة وبطير من الفرحة معاش تبي تطلع بكل احمد يسمع فيهن من برا الحمام ضحك ولعب بالمية وسارة تحاول اطلع ملاك بس مش راضية فا تقعد تلعب معاها بالمية،
احمد في الوقت اللي كانن فيه في الحمام كان مقعمز في الجنان وشارد في عالم اخر والجو مصقع وهوا لابس خفيف وداير حمام الصبح
احمد يفكر في كلام ملاك وكيف ان فراغ الام موجود في داخلها بشكل اكبر مما كان في باله او يخطرله بس هيا ماكانش تحكي قدامه لان ماتعرفش بس بوجود سارة قعدت تحكي وتقارن حياتها بالبنات اللي زيها،
احمد يبتسم جت ع باله سارة حمد ربي ان ملاك تحبها وتشوف فيها زي الام وسارة مع ملاك نفس شي وان علاقتهم زي الام وبنتها يعني اختيار أمه لسارة كان اختيار مناسب وان سارة هيا العوض لملاك على أمها .
كملت سارة تحميم ملاك ومشت لدارها عشان تلبسها وملاك لافة عليها المنشف ومش باين منها شي الا عويناتها 😂😂👀 ،سارة لافتها زي الصغار اللي كيف مولودين خايفة عليها من البرد ،ملاك تنادي على سارة
ملاك:هيا خويلة سارة عييييت
سارة تشوف لملاك وتضحك على منظرها الطفولي مش قادرة تتحرك زين المنشف ملفوف عليها بالكامل حتى تحاول تمشي خطواتها صغار من المنشف😂😂
سارة:ههههه حاضر ياروح خويلة هي تعالي
قعدت ملاك تمشي بالشوي بيش توصل لعند سارة 👀وفي اخر خطوة أطيح ضمتها سارة😍
سارة:هههه بسم الله على بنيتي الحلوة
حولتها المنشف ولبستلها توتة شتوية وشغشير ومشطلتها شعراتها ولبستلها طاقية ،ملاك ماكانتش تبي الطاقية لان سارة دارتلها تسريحة وهيا فرحت بيها قريب طارت تبي تمشي تدلع بيها ع بنات عمها وعمتها ،بس سارة قنعتها ان تلبسها وبعد تمشي لحوش حنتها توري التسريحة لبنات عمها وعمتها بعدا تلبسها مرة اخرى بيش ماتمرضش❤️
جت سارة وملاك لعند احمد في الصالة يدهن في يد بعض وواضح على ملاك السعادة من نظرات عيونها
ملاك بدلع:يله بابا انا بنمشي لحوش حنينه ارفعني يله
أحمد وسارة شبحوا لبعض بضحكة على أسلوب ملاك اللي كان ممزوج بين الدلع والأمر بشكل طفولي
احمد بضحكة :ههههه حاضر يا بابا عندك أوامر ثانية
ملاك حطت صبعها على فمها بنظرة تفكير وأحمد وسارة ميتين عليها ضحك😂😂
ملاك :لالا بابا توا مانبي شي بس لو تفكرت بعدين نقولك😇
أحمد صبى بيش يرفع ملاك لحوش حنتها
أحمد:يله ملوكة تعالي هي
ملاك قريت من بوها وشدت يده في نفس الوقت قاعده شادة في يد سارة !
أحمد وسارة شافوا لبعضهم كانت لحظة غريبة!😳
ملاك تحساب إن سارة بتمشي معاها وكلهم يمشوا لحوش حنتها قعدت تشد في سارة بمعنى هيا امشي، بس سارة فهمت ملاك وقالتها.
سارة:حبيبتي ملوكة أنا مزال مش ماشية بندير حمام زيك ونمشط شعراتي زي شعراتك الحلوات والا تبي نعدي شينه😅
ملاك بعفوية :انتي حلوة خويلة سارة😍
ضحكت سارة وجت عيونها في أحمد
نزلت عيونها بسرعة،وقالت لملاك
سارة:مافيش حد حلو بعدك ياسمحة😍
بس حبيبتي لازم ندير حمام ونمشط شعراتي بيش نولي احلى والا؟
ملاك بتفكير:اي صح ،بس تعالي لحوش حنينه نراجيك بيش نلعبوا
سارة بحب:حاضر ملوكتي انتي تآمري امر شوية ونجيك ونلعبوا باهي ياماما❤️
أحمد كان ساكت ومستمتع بالحوار اللي بين ملاك وسارة ،بس اكثر شي شده كلمه ماما اللي قالتها سارة لملاك ،كلمتها كانت حنونة واجد وبكل حب بس في نفس الوقت قلبه مش متقبل الكلمة هذي لحد غير آية!
#بيسان
أنت تقرأ
رواية .....جعلتني احبها للكاتبة #Besaan💓
Genel Kurguرواية ليبية ممزوجه بالخيال و الواقع تحكي عن حب حياته الي مقدرش يحب من بعدها💔 و متوقعش انه حيجيه يوم يحب مرة تانية 💓 دخلت حياته و قلبتهله رأس ع عقب💓 #الایمیل_الاول_تصکر_و_حنزلهلکم _هنا_انشالله_نبی_دعمکم🤗
