رواية #جعلتني_أحبها
#البارت_الاول
اليوم يوم زواجه الثاني، بعد 4 سنين ع وفاة زوجته وأول حب في حياته،ماكانش يبي يتزوج ولامقتنع بالزواج مرة اخرى،بس امه وكل الناس قنعوه ان بنته تبي ام ومحتاجة ام مهما كانت حنيه الاب وقربه بس الام شي ثاني،بنته (ملاك) الريحة الوحيدة اللي بقتله من زوجته،هيا كل همه ومستعد يضحي بحياته وسعادته عشانها،هوا مش متقبل اي مراة تكون في حياته غيرها غير (ايه) حبيبته اللي توفت وهيا تولد في بنتهم وطفلتهم الاولى،طول اليوم كان برا مع أصحابه،قلبه وعقله رافضين فكرة الزواج من اصلها بس مجبور،امه وخوه تكفلوا بالعرس وكل شي،خوه قاله ان أهل العروس رح يجوا في حوش العيلة ويتعشوا ولازم يجي يستقبلهم،بس هوا رفض وقال لخوه انت اهتم بكل شي وبعد يروحوا نجي مش طايق نشبح حد ولا حتى حد يباركلي اصلا مافيش شي يفرح!
كمل العرس ،اتصل بيه خوه بيش يجي وقاله العروس قاعدة في الحوش،الحوش هذا لخوه جنب حوش العيله،رفض يتزوج في حوشه وان يجيب فيه مراة غير (ايه) او تكون ريحة وحدة غيرها في حوشه،عشان هكي رضي بالزواج بس بشرط يكون في حوش خوه،فتح الحوش وخش داخل،نادى على بنوتته الصغيرة( ملاك) متعود كل مايجي للحوش تجيه تجري وتحضنه وتبوسه،قعد ينادي عليها،
احمد:ملوكة،ملوكة حبيبتي،وينك يا بابا انا جيت،
استغرب ان بنته ماجاتاش مع ان الوقت مزال بكري على النوم،مشي لدار نومها ،بس مالقاهاش،اتصل بامه،ردت امه طول وهيا تعرف ليش متصل وشن يبي،
قالت له:ملوكة قاعده عندي بترقد مع حنتها انت عريس جديد خليك مع مرتك وبعد اسبوع نجيبهلك بيدي
احمد :والله لو ماتجيبوا ملاك توا انخلي المراة اللي قاعدة داخل وانجي نجيبها بالقوة
امه:باهي يا احمد باهي تو يجيبهلك خوك مصطفى ربي يهديك ياوليدي،
سكر من امه وفتح الباب يراجي في خوه يجيب بنته ،وصل خوه مصطفى وهوا رافع ملاك ،كانت راقده..
مصطفى : توا كيف رقدت كانت تعيط تبيك بكت بكت ورقدت..
خداها منه احمد بالشوية مع انه كان معصب بس مع بنته مايقدرش الا انه يكون حنون ويروق بشوفتها،دخلها داخل وسكر الباب ،قعد يمشي لعند وصل دار نومها حطها في سريرها وقعد يقرا عليها قران،باسها ع خدها وراسها وباس كفوف يديها وطلع،مشي للمطبخ خدي اميه وشربها،كان متردد من انه يخش لدار النوم مش قادر ،رجليه ماخلوشي يمشي ،مش حاس بفرحة ولا اي احساس اخر،عيونه حمر من البكاء مش متخيل يتزوج وحدة غير ايه غير ايو حبيبته هكي كان ينادي فيها (ايو حبيبي)..
استغفر ربه وحاول يمشي للدار ضرب ثلاث مرات مافيش رد فتح الباب،لقي زوجته تصلي! قعمز ع السرير لين كملت صلاتها،بعد كملت قاللها تقبل الله ..
سارة:منا ومنك العمل الصالح ..
احمد كان مرتبك مش عارف كيف يتصرف ،يبي يتكلم بس مش قادر،جي بيتكلم قاطعاته سارة:تبي تتعشى ؟
هوا ارتاح لانها بادرت بالكلام وماقالت شي اخر،رد عليها مع هزة راس بي ايه ،
طلعت سارة وخدت لبسه من الدولاب بيش تغير الفيلو اللي لابسته وتلبس حاجة خفيفة ،مشت للدار الثانية بدلت دبشها ومشت للمطبخ ،جهزت عشي خفيف ع السريع وشوي حاجات من المطعم واتيات في الثلاجة ومشت تنادي في أحمد قالتله :العشي واتي..
رد احمد؛ماشي شوي نبدل دبشي ونجيك
سارة:تمام..
في المطبخ ،
قعمز احمد ع الطاولة ،وجت سارة في الكرسي اللي قدامه وقعدوا ياكلوا،احمد طول الوقت عيونه لوطة مش في العالم نهائيا ،والأكل ماكلاش منه الا فمين بس وراح في عالم اخر،سارة نفس حالها نفس حال احمد بس هيا سرحانة فيه ،
سارة؛ لها الدرجة تحبها يا احمد مش قادر حتى تشوفلي وانا عروس،آه يا احمد لولا بنتك ماكنتش رح نوافق ان نتعذب معاك،ايه بنتك ليش مستغرب !لما امك جت تخطب فيا جابت معاها ملوكة ،ملوكة البنوته الحلوة البريئة المرحة هه تخيل قعدت نلعب فيها قدام امك مع ان وقت الخطبة لازم البنت تكون عاقله ورزينه بيش تعجب الخطاب بس ماقدرتش الا نكون طفله زيها من كثر ماكلت عقلي وقلبي،اكيد ماكنتش تعرف اني كنت رافضة اني نتزوج بواحد أرمل بس كيف صار هذا كله مش عارفة ،بس نعرف ان إصرار امك وكل مرة تمشي وتجي على امي وتجيب ملوكة خلاني نتعلق بيها حبيتها كأنها بنتي اشفقت عليها من زوجة الاب القاسية اللي ح يتزوجها بوها،قلت انا أولى نربيها،خاصة ان كان حلمي نكفل يتيم لان نحب الأطفال موت ،ومنها باب من أبواب الجنة❤️،
قطع احمد سرحان سارة وصبى قال الحمد لله غسل يده وطلع برا المطبخ ،مشي للصالة،شغل التلفزيون،
سارة صبت ضمت المطبخ وحطت الاكل الزائد في الثلاجة وغسلت المواعين،
جت للصالة وفي يدها سفرة فيها طاستين عصير وشكلاطة،عطت لاحمد،
احمد:الله جت في وقتها والله صحيتي،
سارة ابتسمت على ابتسامته!
قعمزت جنبه بينهم مسافة صغيرة ،قعدوا يشربوا في العصير ويتفرجوا ع التلفزيون، احمد حاط على كورة ومنسجم وسارة تفكر كيف تتقرب منه ،هيا عارفة كل شي عليه وهذا اللي شجعها على انها توافق تترتبط بيه كان عاجبها في وفاءه وحبه لزوجته حتى بعد وفاتها وحبه لبنته اللي مش معقول ،وحنيته معاها، ومع كل الناس ،وانه شخص محترم ماليشي في البنات والدوة الزايدة ،مع انه زوجته الاولى كان زواجهم عن علاقة بس لانها كانت صديقة اخته وعلاقتهم عن طريقها وكانت أول حب في حياته،
احمد:قوووووووووول الله اكبر الله اكبر
سارة مخلوعة كانت في عالم ثاني،نطت،بسم الله
احمد :ههههه خيرك ،شكلك كنتي سرحانة
سارة ارتبكت وتحشمت هذي ثاني مرة تسرح معاه وفيه!
#بيسان
أنت تقرأ
رواية .....جعلتني احبها للكاتبة #Besaan💓
قصص عامةرواية ليبية ممزوجه بالخيال و الواقع تحكي عن حب حياته الي مقدرش يحب من بعدها💔 و متوقعش انه حيجيه يوم يحب مرة تانية 💓 دخلت حياته و قلبتهله رأس ع عقب💓 #الایمیل_الاول_تصکر_و_حنزلهلکم _هنا_انشالله_نبی_دعمکم🤗
