بعد يومين
ام شاكر السلام عليكم عيوني
ام كاطع كل الهلا وعليكم السلام
ام شاكر بالمهلي عيوني
كعدن بالحوش عيني وين جنتي
ام شاكر اي مو تدللين يمه كرجيه تعالي
كرجيه كرصت خدوده حتى تورد وعضت شفايفه وعدلت شعره هالمره خلته محلول بلا ضفر وصل الرجله دخلت السلم عليكم
ام شاكر اللهم صلي على محمد وال محمد محصنه بالله ورسوله كرجيه وردت من الخجل
ام شاكر تعالي يمه كعدي يمي نياله مسعود على هالحسن المهم بنيتي شيعجبج نجيبلج ذهب
كرجيه بكيفكم عمه
ام كاطع كومي كرجيه سوي الجاي التفتت لام شاكر عيني انتو شرايدين تشترون احنه شتفصلون نلبس
ام شاكر والنعم منج عيني لعد نطلع هسه للصايغ نجيبله حجول وكلاده وحلقه واني ضامه العرس مسعود ٦ بتوت ومحبس وترجيه يكفن لو نجيب بعد
ام كاطع نعمه قابل نريد نكسر ضهر الولد
ام شاكر ونجيبله شيله وثوب وشحاطه وملابس داخليه للمهر وروب ابيض تعقد عليه
ام شاكر هاي بقت يمج
طلعن ام شاكر وام كاطع تسوكن للمهر غراض
ام كاطع اشترت هيل ومي ورد وسبع حلويات بلون ابيض علج ومن السمه ونبات وقرص نعناع وقند وملبس واشترت قفل صغير وشال ابيض
ام شاكر اشترت ملبس وزبيب واكياس صغار وجفافي رجاليه بيض وعقيق على كد الجفافي رجعن للبيت
ام شاكر عيني صيحي كرجيه تشوف ذهبه
ام كاطع لاعيني ميصلح تلبسه كبل بيوم المهر
ام شاكر زين اخلي الهدوم يمج حتى تلبس والذهب نجيبه ويانه حددن الموعد الخميس يوم الاربعاء اندكت الباب
ام كاطع منو
ام حميد عيني اني ام حميد الحفافه
ام كاطع كل الهلا تفضلي دخلت ولج عيني كلش تعبت باجر حنة عمشه وحفيتله كل جسمه والنوب حبايبه هوايه بين وجه بين اعدل حاجب ماتت ايدي
يرحم ابوج فد استكان جاي
ام كاطع بعيني بس عينج على كرجيه اول مره تحف خاف تعبانه وتاذيه
ام حميد لا حبيبه اني متعوده شغلتي بعد شوفي شلون اطلعه كعدت كرجيه كدام الحفافه اول مره حست بالم عيونه دمعت
