ام شاكر نضفت البيت هيه وبناته كعد مسعود ريكته
مسعود ها يمه شراح تسوين اليوم
ام شاكر يمه اليوم روح نام واكعدك ويه صلاة الضهر بين ميجون ربعك يودوك للحمام واني أجهز الغده واختم غرفتك تركته وا
راحت للغرفه رتبته ومسحت التراب وصلت بالغرفه صلت ركعتين شكر وفتحت القران بدة تقرا قرت جزء عمه وسورة الرحمان كدامه تنكة مي تصب بيده وترش على الغرفه فتحت القرأن وخلته كدام مخدة العرسان فرشت جرجف صغير كدام مندر الصدر خلت ماعون مريس يتكون من دهن حر ودبس وخبز حار يفركوهن مع بعض يقدم وجبه خاصه للعرسان و ماعون فواكه وماعون كليجه وكرزات وشمعدانات اثنين بيهن شمع اخضر وفواكه مجففه وغطتهن بوصله ململ خفيفه وسدت الباب رتبو البيت حضرت نجانه مي خلت بيه ياس وقطع نقديه حديد وماء ورد وخلته وره باب الحوش رتبو البيت وبدو يستقبلون الاقرباء الضهر اجوي اصدقاء مسعود ام شاكر نطتهم البقجه مال هدومه والعطور اخذو للحمام وهناك غسله الحممجي ودلكو وراها سبحو بمي بارد ورتبو زيانه دهنو جسمه بالمسك والعنبر لبسو دشداشه بيضه وصايه وشماغ مرتب بلفه بغداديه وشحاطه وحزام وجوارب هاي طول الدرب هوسات وصفكه
من طلع من الحمام يضوي مثل الشمعه رجعو للبيت بدو يهوسون ويركصون وام شاكر جهزت ثلاث صواني شمع وياس وجكليت وجهزو عربانه بحصان يسموهه ربل زينوهه بالسعف والياس للزفه اما بيت ابو كاطع كعدو رتبو البيت خالة كرجيه اخذته غسلتله وعطروهه وجابوهه للبيت أجتي ام حميد جرت كحله ورتبت شعرهه تسريحه لبسوهه ثوب ستن ابيض وخلو على راسه بركع صارت تجنن ملاك اجه ابوهه باسه من راسه وخله بركع ثاني اجه كاطع سلم عليه وخله عليه بركع ثالث كعدوهه وخلو رجله بمي بي ياس وفتحو القران بوجهه وتحضرن البنات كل وحده شالت بقجه لو سله سبع بقج وسبع سلات صار المغرب وتحركو بيت ام شاكر الربل يمشي الزلم بعده والشباب شايلين صواني الشمع والياس بعدد تمشي النسوان الشباب يهوسون
مبارك عرسك يالهيبه
شايف خير ومستاهلهه
لما وصلو البيت ابو كاطع استقبلهم دخلو النسوان سلم مسعود على ابوهه واخوانه بعده اخذو اصدقائه للكهوه اما العروس دخلن النسوان
ام شاكر اللهم صلي على محمد وال محمد نيالك يمه مسعود على هيج جمال تشكرت من ام كاطع وابوهه سلمت كرجيه على ابوهه واخوته امهه لبسته عبايه صعدوهه بالبل ابوهه متحمل طلع للزياره اخذو العروسه ورجعو للبيت ام شاكرخلت نجانة المي كدام رجل كرجيه دفرته وعبرت على المي والياس وسط الهلاهل الكل فرحانين الى كرجيه خجلانه وخايفه من المجهول دخلوهه غرفته ودخلن حبايبه رتبن غراضه وطلعن بقت خالته يمه
الخاله حبيبتي كرجيه ما وصيج صير معدله بعد هذا رجلج يشوف شعرج وتطيعي هسه عشكي واسمعي غزل وعيشي احلى ايامج هسه انتو صرتو واحد من يجي ابد لاكلبين خلقتج
كرجيه نزلت دمعته خاله ابقي يمي شلون ابقه ويه رجال وحدي حبابه اخاف
الخاله الله محلل تبقين يمه وحدج اكيد امج كلشي فهمتج عن ليلة الزفه اني مو بعيده عنج راح ابات بس ويه النسوان سمهو هوسات الزلم رجعو من الكهوه زافين العريس الخاله وكفت كرجيه خلت بيده الشمعدانات وعلكت الشمع هاي من يطب اعلي الشمع وضلي صلي على محمد وال محمد الى ان تشوفي حتى يحله بعينج رغم تشجيع الخاله كرجيه بعده خايفه اما مسعود من عوايد الي يزفو يوصلو الباب غرفته ويرجعو الراس الشارع يزفو مره ثانيه بالزفه الثالثه يدخلو بغرفته دخل الغرفه لكه العروس وخالته
مسعود السلام عليكم
خالة كرجيه وعليكم السلام وليدي مبارك عرسك يمه بعد سلمناك الوديعه منك المال ومنه البنين انشالله عينك عليه عشيه تره ممتعشايه طلعت وسدت الباب البيت مليان خطار بكل مكان نايمين
ام شاكر دكت الباب نطته صينيه بيه دجاج مسلوق وخبز للعشه ميشوو ولا يقلو يكولون ميصلح على العرسان سد مسعود الباب اخذ الشمع خلاه على الرازونه قلوبهم تخفق رفع البرقع الاول كرجيه مجلبه باول برقع متريد ينرفع مسعود شال البرقع الثاني ابتسم كله فد لايطلعن سبعه راد يرفع البرقع الثالث متقبل بعد ايده ورفع كشر كشره بحياته ممكشره طلعت حلوه
مسعود اللهم صلي على محمد وال محمد طلعتي احلى من الي ببالي كرجيه مغمضه عينه تستحي تعاين بوجهه
مسعود شنو راح تنامين انتي وواكفه لزم ايده تختض مثل السعفه
مسعود فتحي مراح اكلج فتحت عيونه هذا حلو وعيونه كبار جنه عيون النسر
مسعود اكعدي اني ميت جوع خل ناكل لكمه ونسولف شويه عمري ممسولف ويه وحده بداخله كلش فرحان وعيونه تكول
حلوه قسمتي هواي ماكو احلى منه
خد وحسن وعيون ريحانه جنه
كعد شال الغطه من السفره بده ياخذ كل لكمه يقسمه بينهم
مسعود اي كرجيه تدرين جنت خايف منج
كرجيه متعجبه وخجلانه ليش
مسعود لج كتلني صوتج من يوم المهر جنت خايف منج تخيلت اشيل البركع الكيج سوده لو عوره جان وين رحت ابتسمت بعفويه عاين عليه داعب خصلات شعره مبتسم الحمد لله طلعتي حلو بس نص خرسه يله شسوي بين الضحكه وبين السالفه بدت تتعود على كلامه وتسولف ويا كملو عشه السجادات مفروشه صلو ركعتين شكر وعاشو اسعد لحضات حياتهم كزوجين الصبح اندكت الباب عمات كرجيه جايبات سله بيض مسلوق وصينيه بيه خمس كيلوات كيمر وجبن عرب وخبز ابو السمسم حار ودبس ومربى وعسل وكليجه وجاي وشكر وخصافه تمر وكيس كرزات تلكتهن ام شاكر بالهلاهل ناس تخدر جاي وناس سوو صينيه للعرسان دكن الباب
ام شاكر يمه مسعود مسعود فتح عينه لكه كرجيه غافيه وجهه بوجهه باسه كومي حبيبتي اهلج جوي فزت شلون ابتسم غيري هدومج بدلو رتبو غرفتهم
ام شاكر دكوم يمه مسعود
مسعود اي يمه جاي فتح الباب بدة الهلاهل ام شاكر دروحو يمه غسلو الحمام حار بين منرتبلكم الصينيه دخلن عمات كرجيه وخالتها ونبيه وام شاكر رجعو العروسين تريكو سوه بين تحشيش نبيه وخالة كرجيه تريكو ولمو الريوك طلعن وسدن الباب سحب كرجيه الحضنه عصفورتي الصغيره تصدكين اشتاقيتلج لزكن بالكوه يله طلعن ضحكت كرجيه لاتحجي عليهن يونسن اندكت الباب لطم على راسه لج يومين وحدي نايم محد يدك باب اليوم لجو
شاكر ولك مسعود اطلع دنباركلك وجيب مرتك
مسعود سمعتي اليوم صرت عزيز دكومي خلصتي مني لبسي فوطتج دنطلع طلع الك كاعدين بده التعارف اهل كرجيه راحو بتهم بيضت وجههم شاكر خيتي كرجيه اني صرت بمثابة ابوج اذا غثج مسعود اذبحه ابتسمت بخجل لاعمو اسم الله عليه الثفت المسعود لك هاي تدافعلك مسعود عوف البنيه بحاله مو كدك هسه تعصي بالغرفه بعد متطله مر اليوم وكل ميدخل مسعود الغرفته يجي واحد يطلعه حتى يباركله باليوم الثاني ام كاطع سوت حلاوه مال طحين وحلاوة تمن وحلاوة شعريه وعصيده وساهون ولقم وسمسميه دزتهن بيد نبيه وكاطه طبو باركو للعروسين وسلموهم حلاوة العرس ويعزمون الزلم للثالث ٠
