ام شاكر عجنت طشت عجين والغبشه خبزته لفة ببطانيه وخلته بغرفة المونه صاحت على نبيه يمه تعالي جيبي نجاين اخذي نجانه مشمش يابس وننص علوجه واخذي من كلشي طاسه جوز ولوز وهذا الهيل والتين هم واخذي من ذيج البستوكه نجانه دهن حر ومن ذاك الخناب هم شيلي نجانه دهنه ولحمه نبيه اي يوم وبعد عيني اخذي الشعريه والكشمش واللوز واخذي طشت بصل وست كلايد بانيه و٣ روس ثوم
نبيه يمه على كيفج مدالحك
ام شاكر يمه اريد اقفل غرفة المونه قبل متجي النسوان وننصاب عين ديله وطلعي خصافة تمر وذيج البستوكه مال اللبن هم طلعيه طلعي ٣ صوابين يغسلون الزلم واثنين للمواعين واخذي كفشتين سيم للجلف بعد شنحتاج؟
نبيه يمه فدوه لامي النادره
ام شاكر بفخر لعد شلون المره الحوك تزوج ولده وهيه كاعده ببيته
نبيه اي والله يمه بس مكلتي شراح تعشين الزلم
ام شاكر يمه راح نسوي خبطه شعريه فوك التمن وطرشانه صدك طلعي بطل مي ورد وقرنفل وهيل واكو بطاله مال شربت وره خناب الطرشي وطلعي نجانة طرشي واريد تجهزين تضمين من كل جدر شويه الباجر عشه العرسان
نبيه ميخالف طلعو طرشي وتوابل وقفلن غرفة المونه نبيه وغنيه كل ما يفوت مسعود من يمهن يهلهلن ويهوسن
اليله حنته وباجر يزفونه ام كاطع متحزمه تهوس وتركص وترجع تطبخ جهال شاكر حركو الولايه من الدبج والركص التمو الزلم فرشو كراسي بباب البيت ومسعود كاشخ بنصهم خلو طبله كدامه و٣ صواني حنه شاكر ملتهي يعشي واصدقائهم يهوسون الى ان اجه شيخ عشيرتهم باركله وفتح ايده خلاله الحنه بعده انتهت الحفله اما عائلةابو كاطع التمن الحبايب
ام كاطع سوت دجاج سلكته وقلته ويا زلاطه وسوت لفات دجاج وعصير برتقال ونارنج قدمو المسقول والحامض حلو لبست كرجيه فستان زيتوني مطعم بذهبي ولبسوهه فوطه بيضه وفوكاها جلاب ذهب مطعم بشذر زيتوني ولبست كل ذهبه كعدن الحبايب يدكن على السطل وصينية الحنه والياس منصوبه خالته تغني
يبنيه من تمشين
خايب هون
ثوبج قديفه
خايب هون
منشافج الدختور
خايب هون
عاف الوضيفه
خايب هون
كون انكلب فنجان
خايب هون
عند الكهوجي خايب هون
وبحجة اشرب جاي
خايب هون
ادهك وابجي
خايب هون خلاني وراح وراح والقلب مامرتاح
كون انكلب فراش
خايب هون وبمدرستهم
خايب هون
وبحجة امسح جام
خايب هون
اسمع درسهم
خايب هون
جيت اشجر التنور
خايب هون
والورده طاحت
خايب هون مودع
يا حلو الطول
خايب هون حس امي صاحت
خايب هون جيت اشجر التنو
خايب هون بخدي يحبني
خايب هون
خله وطلع زعلان
خايب هون
جي كتله هدني
خايب هون وخلاني وراح وراح
والقلب مامرتاح
شفت البنات اشكال
خايب هون مثل الجفافي خايب هون
وحده تخون بساع
خاييب هون
وحده توافي
خايب هون
صينية ابو كاطع خايب هون
عشره انكلوها
خايب هون شمر واهل بغداد خايب هون
ماخلصوها خايب هون
ضوة شمعة البيت
خايب هون كرجيه بتنه
خايب هون
مزفوفه للمزيون
خايب هون ومودعتنه
خايب هون
بين الجرف والماي خايب هون حنطه زرعوني
خايب هون لاكالو الله وياك
خايب هون
لاودعوني وخلاني وراح وراح والقلب مامرتاح
٠
٠
والله اني ضليت صافنه لاهيه عركه لاهي رومانسيه لانخوة عشاير بس هيه اغنيه المهم القافيه وماعرف العروس فرحانه الحنه كله باغنيه وحده ومابيه رباط
٠
المهم هاذي من اقدم اغاني الاعراس
كعدت ام كاطع يم كرجيه بعد ما تعشو وعشو العروس بدت مراسيم الحنه التمن سبع بنات ممتزوجات وحده تلزم المرايه وتعكس صورة العروس والسته الباقيات يلزمن قماش اخضر ويسونه مثل خيمه للعروس ويهفن بالقماش على العروس والملا تقره مدح للرسول وزواج ابتته عليهما الصلاة والسلام
ام كاطع خلت بيد كرجيه ليره ذهب باليمنه وليره فضه باليسره وغطتهن بالحنه ولفت ايده بقماش ابيض
راح الخطار وبقن الخالات والعمات باتن يمه
ساعه يغنن ساعه يسولفن ويحششن على العروس ابو كاطع اكلج ام كاطع اليوم باتي يم خطارج وخل كرجيه تبات يمي هم عندي حجايه اله وهم تنام من وكت تعبت اليوم
ام كاطع خوش
كرجيه ها يابه امي كالت ابوج يريد يكعد يمج
ابو كاطع تعالي بويه حضنه وباسه من راسه كعدي يبعد ابوج لف جكاره وكانه راح يضيع منه نص عمره
ابو كاطع يابه كرجيه اني اتشكر منج رفعتي راسي بين الناس ماجبتيلي حجايه وخدمتيني اني راضي عليج الله يرضى عليج ويباركلج بالمال والبنين والرجل الصالح دمعت عيينهه وهيه تشوفه يتوسل برب العالمين ويدعيله بالسعاده شلون راح تفارك هيج اب باست ايده وانتجت على كتف تبجي
يابه ماريد اعوفك شلون اكعد صبحيه مابيه صوت قرأنك اريد اعيش جوه جناحك لما اموت
ابو كاطع يابه اريدج تحالليني وتوهبيني خاف صحت عليج لو حرمتج من شي
كرجيه يابه انته حاللني واوهبني اخاف عاندتك لو ضوجتك
ابو كاطع تبسم بابه عندي وصيه الج اخر شي اطلبه منج
كرجيه اامرني يابه
ابو كاطع يابه انتي راح تطلعين بايزار الصلا البيت رجلج ومن بيت رجلج تطلعين بالجفن ماريد تجيني زعلانه اريد يترحمولي على تربيتج وكل مشاكلج تنحل ببيتج مثل ما رفعتي راسي ببيتي ارفعي راسي هناك وشتحتاجين ورجلج ميكدر يجيبه بيني وبينج نحله بلا ميحس وديري بالج تعلين صوتج بحضوره ابويه ابويه صيري مره مطيعه والله الله بسترج ودينج فرطي بروحج ولاتفرطين بيهن الدين والستر والعفه زيديهن لاتقلليهن ديله بنيتي لفي راسج ونامي والله يسعدج ح
