رواية عرس بغداد القديمه

تجهيزات العرس

ام شاكر يمه عيب نطول على العالم اريدك من باجر تجيب خلفه يدك الكع ويملجه بطين حر ويسد الزواغير واريده يسويلنه رازونتين ويصبغ الشباج ويصلح الباب
شاكر يمه ميصير تطلعين من غرفتج زوجي بغرفته
لا يمه هوه اني وحدي وغرفته صغيره اني واختك تكفينه الغرفه الصغيره يله وليدي ورايه كوم شغل طلعت للنداف وصته على لوله (مخده طويله لنفرين )واربع مخاد ومندر قطن ولحافين وجودليتين (منادر قطن ناصيه للكعده ) واشترت حصير وفجتين (الفجه مفرش حياكه يدويه ) واشترت برده وكازه (مصباح نفطي)ومرايه وحمله دولاب بباب وحده وجرار على الباب مراة طويله )وصندوك متر ونص واشترت قماش لونين وخيوط رجعت للبيت
ام شاكر لج يمه غنيه كلاص مي متت عطش
غنيه اي يمه شربت المي
ام شاكر لج قلبي ديرجف من الجوع اكو خبزه يابسه بالزنبيل بلليه وجيبيلي طماطايه وملح بين ما مرت اخوج تجيبلنه خبز
غنيه اهو كل شويه تجيبلي شغله اريد اتفرج على الجهاز
ام شاكر ولج اني حموت بعدين
مسعود الله يساعدج يمه شلونج تعبتج ويايه
ام شاكر شو تعال ابوسك يبعد امك ولو عركانه
مسعود حضنه بقوه اروح فدوه الريحة العرك مالتج باس ايده شعندي غيرج حبيبه
ام شاكر كوم يمه اندكت الباب ابو العربانه جاب الحمله والصندوك  دخلالغراض ودخلت نبيه شافتهن كامت تهوس
عرس مسعود هيل وطش بالولايه
جتي غنيه تكمز وياها
هاي الراده وهاي التمناها بنت الشيخ لبن الشيخ جبناها
مرت شاكر سمعت الهلاهل جتي هيه وجهالها يكمزون تهوس
لاتكول كليلات كلنه خواتك
اخونه خوش اخو يستاهل الهوسه مسعود كلش فرح مكشر ميعرف شيسوي دخل شاكل يكمز وياهم 
اخذنه بنت الهلالي كسرنه كل خشم عالي
هاي فرحه وبعد فرحه واليحب يتباركنه
ام شاكر نست التعب وكفت وحضنت مسعود تهوس
والحاكم كال المعرس هذا منين
عمامه شيوخ وخواله سلاطين
شاكر كافي بعد منا الهالم اشر الزوجته جيبي الغده اليوم نتغده يم امي الجهال فرححو رتبو الغراض ثاني يوم من الفجر شاكر دك الباب
ام شاكر خير يمه شاكر يمه خلي البنات يفرغن غرفتج الخلفه يصلي ويطلع حضري ريوك
ام شاكر بعيوني اني راح ادز غنيه يم مرتك واروح البيت ابو كاطع ومسعود يصب الريوك احضره قبل ما اطلع
كملت ام شاكر شغله واخذت قماش الجراجف  وراحت بدربه للسوك اشترت حنه وملبس وحامض حلو وشمعتين طولهن متر ودرزن شموع صغار وشمعتين خضر مزينات واخذت صابون ركي وحجارة (حجر الخفان الاسود لدلك القدم)وليفه ومكحله وعود عنبروماشات وشرايط ونعال حمام وطاسه وخيط حفافه وسبداج (حجر ابيض يستعمل قبل تنضيف الوجه من الشعر )وفوطه ومرايه صغيره وعبا وشحاطه ولفاليف (قطع قماش فانيله طول متر وعرض عشر سم تلف بها القدم قبل انتشار الجوارب )مرت للصايغ اشترت خزامه وورده وعران وجناغ  وجلاب
الجلاب ٠هو عباره عن دبوس تثبث به الفوطه
الجناغ هلال من الذهب متعلقه بي ثلاث نجمات ومطعم بالفيروز والشذر يثبت بالكذله بدايت الشعر يتدلى على الجبين
الورده ٠هي زهره من الياقوت او الؤلؤ تثبت في غضروف الانف
الخزامه هي حلقه مزينه بالكرستال توضع في طرف الغضروف الايمن للانف
عران حلقه مزخرفه من الذهب تثبت في الغضروف الوسط للانف
واخذت مناشف ومشط خشب وكيس هيل وسواك لتنضيف الاسنان وصلت بيت ابو كاطع
ام شاكر السلام عليكم
ام كاطع كل الهلا عيوني
ام شاكر بالمهلي يالغاليه كعدن
ام كاطع يمه كرجيه جيبي مي العمتج
كرجيه بخجل شلونج عمه
ام شاكر هله بنيتي صلوات شلون صايره قمر ٠وردت خدود كرجيه
ام شاكر عيني مسعود يسلم عليج تره من هسه اكلج يحب الورده والخزامه   بس اني جبتلج جناغ وعران خاف يعجبج
كرجيه اخذتهن تسلمين عمه ربي يخليج الي
ام شاكر بغرور هسه تجين يمي واشوفج الدلال بعينه
ام كاطع دكت عده الحجايه عيني هيه من يومه معلمه على الدلال ابوهه يشتغل ويذب عليه ذهب وهدوم بت خير بعد
ام شاكر اي عيني وانشالله تشوفه مضاعف عدنه صدك نسيتيني عيني ام كاطع هاي الجراجف جبت بنفسجي وابيض خل كرجيه تطرزهن وخل تخف ايده
ام كاطع بعيوني واني هم ضامتله جرجف فستقي وسبع بقج كل وحده لون وفرشه وديته للخياط سمائي
ام شاكر عيني على الشهر الجاي جهزيه بس خل تنضف من تركة الصلا واطيني خبر
ام كاطع عيني البنيه اول بارحه نضفت شوكت متحبون اخذوهه
ام شاكر زين لعد باجر خميس الي بعده ناخذه عود تعالو فرشن غرفته اني اروح مسلم عليكم
ام شاكر خير انشالله الله يتمم بخير الله وياج
كرجيه اختنكت راحت الغرفته شايله الغراض تعاين عليهن بجت دخلت ام كاطع انهبطت شبيج يمه
كرجيه نامت بحضنه يمه ماريد اتزوج اشو ركض ركض وراح اعوفكم اني اموت وانتو بعيدين شلون راح افاركج
ام كاطع دمعت عينه يمه هاي حال الدنيه لو اني باقيه ببيت اهلي جان ليهسه اخدم النسوان وجان مشفتج ولا شفت اخوتج هسه ترحين وتشوفيهم بيت ابو كاطع شربو من بنات هيبه يمه اريد كلامج موزون والرجال مو اب وتدللين عليه هوه يريد واحد يدلله شوفيني شلون اتلكه ابوج من يجي من الشغل واصبله الغده واخلي طشت مي الحار افرك رجله ولسه ميشوفني الى معطره وكلمة الطيبه من يصير عصبي انتي سكتي ولاتعاينين بعينه يكول صلفه وممتربايه وواحفضي دينج يمه اني يوميه اكعدج للصلا هناك محد يكعدج من هسه علمي روحج تكعدين وحدج يمه انتي هسه درجه اولى بالبيت والدلال الج هناك تصيرين الثالثه بعد امه واخته عاشريهن بالطيب وحتى لو يتجاوزن تحملي لما تعرفين طبعهم ولاتتعاجزين من الشغل اريدج تبيضين وجههنه حضنته كرجيه ييمه بقيني يمج
ام كاطع لا يمه قابل لعب جهال هم نريد نفرح بجهالج
كرجيه يمه اكو سؤال ببالي شلون تزوجتي ابويه
ام كاطع ولج طلعت عينج بس راح احجيلج
اني اهلي بالعرب وهو ابن خالتي اجتي خالتي جهزتني وسوتلي حنه وكبل للبيت دخلوني بالغرفه اجه السيد كطع مهر طبت خالتي كايده ابوج خطيه كلش خجلان كعدنه على الجودليه وسدة الباب وهاي عشنه وربيناكم كل سنتين يوديني لهلي
كرجيه يمه شلون تحملتي فراك امج
ام كاطع لا امي كل ست اشهر تجي تزور وتمر تشوفني ومن اجيب تجي يمي عشر ايام
كرجيه يمه ماريد هيج اريد يوميه
ام شاكر لا يمه ميصير ولاتلحين على بيت اهلج هوه بكيفه بلكي مسعود حباب ويجيبج كل شهرين
كرجيه جذبت حسره لعد خل اشبع من حضنج يمه