للحب حروب أيضآ ( روايات ليبية )

حلقة 1🔥

رواية (#للحب_حروب_أيضا)

قصة سمية ومراد

"1"

المقدمة:
عشت حياتي ببراءة وعمري ماتوقعت إني انعيش حرب مع نفسي ،حرب الخاسر فيها قلبي ،حرب أصعب من حروب الواقع الي عايشتها بلادي توا
حرب الروح لما تعشق، ولما تحطك في حيرة بين الحياة والموت،موت أوله دمعة ونهايته خسارة
شن شعوري وكيف نحمي نفسي منه،لما تفتحلي الحياة باب كنت خايفه أنخش منه لأنه حيشيلني لعالم صعب عالم نهايته شلل المشاعر وموت الحياة في عينك
صح بدايته جنه بس بمجرد ماتتعمق فيه تحس بأنك وسط حرب ماتقدرش تهرب منها.
هكي هو الحب،وعلي هالحال عشته،لكن الحب في الحقيقة للي يفهمه ويقدره أبسط من هكي وأحلى ..
نتذكر بداياتنا لما كنت عايشه معاك في جنة الحب،لما عشقتك وتميت مانحقش في حد غيرك في الدنيا كلها.
نتذكرك لما قلت لي ( حتبقي ديمه حبيبتي حتى لو ماكنتيش ليا) كأنك كنت حاسس إن الوفاء والاستمرار ف الحب صعب عليك وإنك مش حتوفي بوعودك.
(اسمي حبيبك) هكي كنت ترد عليا لما إناديك باسمك (مراد)
ياريتك قدامي توا عشان تشهد ع إن كل شي نحكيه في الروايه هذي صح ،وتشهد ع إنك كنت عالة ع الحب،وتوقع بحبر الخيانة واللامبالاة والتعب على حروفي وتختملي بإني أصدق منك حتى في وصف حبي لك في رواياتي

البداية:
كنت وحيدة فاقده أغلى انسام في حياتي،كنت عايشه في تعب وألم أكبر من كل شي،عمري ماتمنيت إني نطلع من الألم هضا وانخش معاك وبسببك في ألم ودوامة أكبر،لكن هذي هي الحياة والنصيب
تعرف ؟ كل ما نذكر بدايتنا تركبني حالة تشبه نوبات الجنون،نضحك وبعد تبدا دموعي تنزل ونتألم بدرجة يعجز عن الي كيفك الاحساس بيه .
نتذكر كيف كانت بدايتنا عبيطه وتضحك
كيف قدرت انصدق حب كانت بدايته لعبه  ع الفيس بوك،كيف يكون حب وهو بدايته لعب واستهزاء؟
خشيت للعبه وتعرفت عليك وتميت كيف ماكنا متوقعين مجرد صديق،قعدت تسأل علي وعن تفاصيلي لدرجة إني خفت منك ،كنت نتمنى نبعد عنك ع قدر مانقدر
وياريتني توا وبعد 3 سنين بين الحب والفراق،وبين السلام بداخلك،والحرب فيا أنا ،وبين الأمان من ناحيتك والخوف من ناحيتي.
تذكر يامراد؟ عمرك ماناديتني باسمي كان الاسم الي ديمه تناديني بيه ( عبيه دلع غبيه)
كنت ديمه نسأل في روحي ،زعمك مراد مسميني هكي لأني فعلا غبيه؟ وهو يشوف فيا هكي؟
صح عندك حق كنت غبيه لما آمنت لعشق خذاني من جنة الحب،وحطني بين قضبان الفراق .
كم مره سألت روحي:
ليش تميت نتقرب منك وأنا خايفه؟ ليش درت العكس ،كان المفروض نبعد منك نحذفك من الفيس ولا كأن شي صار،ليش ماعتبرتك مجرد شخص ضفته ع الفيس ،الي الخيال فيه أكثر من الواقع
قبل مانعرفك كنت انقول الكلام هضا غلط والفيس كله أشخاص حقيقيين،بس اليوم اكتشفت إني غلط،وإن الفيس ماهو إلا مكان مليان بالوجوه الملونه والشخصيات المزيفه.
تميت يوم ورا يوم تكون معايا وتحاول تتعمق فيا وتلمس نقطة ضعفي في آلامي بيش تلونلي الدنيا وتطلعني من حياة البؤس والتعب وكأنك تطلع وردة من كومة شوك
تعامل فيا بحنان عمري ماجربته،خليتني نحتاجك بدرجة إني خفت من نفسي وعلى نفسي ،تميت نحتاجك أكثر من حاجتي للنفس
كنت صديق وقريب ،بس مزلنا ماخشينش ع جو الحب
الحب الي من يوم مابديناه وهو حي في قلبي ،حب يتيم يصارع الحياة بتحدي،كل ماتمنيت موته قاللي مانقدرش انموت باقي حياتي في قلب شخص يحبك
كنت انصدق في خيالي ،وكنت نحساب إن باقي حياة حبي لك في قلبك إنت يامراد ولكن ديمه اتخيب الظنون .
نتدكر يامراد لما قتلي إنك معجب بيا ،قلتها ليا بعد شهرين من يوم ماتعرفنا ع بعضنا
صدقتك رغم إني متأكده بإن العين تحب قبل القلب
سألتك كيف معجب بيا وإنت ماشفتنيش وماتعرفش مني غير حروف نكتب فيهن لك
نتذكر جوابك ليا:
(حبيتك من شخصيتك وأخلاقك ،حبيتك من حروفك)
حي ع أمه ،حب ؟ تي توا كنا نحكو ع الإعجاب ،فجأه تحول لحب
مش عارفه ليش زاد خوفي وقررت نبعد عنك ،سكرت النت فتره وخليته اوف لاين  عشان مانحكيش معاك
ليش حسيت بإحساس هضا
خوف مخلط بغرور ومعبي بالارياف لحكيي معاك ،لكن غصبت ع روحي وع كبريائي وكملت الي بديته وبعدت عنك شهر كامل
وبعدها رديت لقيتك ع ضلالك الأول .
غلط مني إني انقول ع الحب ضلال، بس حب كيف حبك مايستاهلش غير الكلمه هذي .
بمجرد اني فتحت الفيس جنني منك عرم مسجات،ماقدرتش انقاومهن ،ومن هنا انطلقت بدايتنا
مراد:سميه وينك شن هالغيبه حرام عليك
-مراد سامحني ،كيف حالك
مراد:مش كويس،كنت انراجي فيك
-اسفه
مراد:المهم فكرتي في موضوعنا؟
لما سألتني السؤال هضا ماعرفتش شن نجاوبك ،رقدت ع ظهري وعزقت تليفوني حدايه وقعدت انحرك في جمة شعري ،وهضا حالي ديمه لما نسرح في أي شي يشغل بالي
كنت مشتته فكره اتجيبني والأخرى تشيلني
كيف تحبني ومشتاقلي وانت ماتعرفنيش؟
كيف أنآمن لك ونؤمن بحبك وأنا مانعرفكش  ولا نعرف عنك غير الكلام الي تكتبلي فيه؟
كيف ياربي كيف؟
ياربي قديش كنت عاجزه ،مش عارفه ناخد قراري ،ومش قادره نبعد عنك شي يجدبني ليك بلا راده ،ليش انت ليش تعلقت بيك؟
ماوعيتش لنفسي إلا لما كتبتلك
(مراد أنا موافقه بس بشرط مش حنقولك انحبك إلا لما انشوفو بعضنا)
مش عارفه ليش شرطت عليك هكي وانا بمجرد قولة موافقه أعلنت البدايات
ما كنتش انحبك ،وكنت نبي انجرب الحب كيف يكون؟
قلت في نفسي :وشن فيها لو جربت ؟ لو مانسجمتش معاه وماقدرتش انحبه نبعد بسلام ولا كأن شي صار
كنت بريئه ومانعلمش إن سلام البدايات نتيجته حروب للنهاية.
نتذكر لما قتلي :حبيبتي حتى لو بعدت عليك ماتبعديش عني ماتخلينيش نخسر حياتي وفرحتها
كنت وقتها في حالة تخذير بسبب العشق،كنت كيف السكرانه ماقدرتش انفسر معنى كلامك
ولكن توا فهمت كويس كل كلمه كنت اتقول فيها
قتلي إنك كنت شخص سيء بكل تشرب واتحشش ومهبل امك في جرتك بس توا ربي هداك وتميت تصلي وتخاف ربي
وقتها صدقتك يامراد..
قدقتك ونسيت إن ابليس مزال ماماتش .....

يتبع..

تقييمكن :*