للحب حروب أيضآ ( روايات ليبية )

حلقة 16🔥

رواية [#للحب_حروب_أيضا]

قصة سمية&مراد

16

قريت الخبر وانا نفنص قلبي مسكني حسيت روحي بنموت ،قعدت نقرا ونرد نقرا من جديد بلكي كدب
عيوني تعبن دموع وطارن الحروف تميت ننخنق بالشويه بالشويه اطرافي اتصقع وراسي بتنفجر وعيوني تدرف دموع بلا وعي
لالا مستحيل يكون هو ياربي راضيه نتعدب معاه بس مايموتش ياربي راضيه انموت من قهرتي من افعاله بس مانفقدش للأبد ..شن اندير بس ياربي كيف نصرف
ااااه ياقهرتي فيك يامراد ااااه ياحبيبي ياعمري انت لا ياربي ماتفجعني فيه خودني انا بس ماتعدبنيش بفراقه ياربي ياربي نوضني من هالكابوس ياحبيبي يامراد رن عليا سمعني صوتك قوللي هضا كله كدب يامراد وييينك ياعمري سامحني ياروحي انت ..بالله عليك ماتسيبني يامراد بالله عليك ماتسيبني
وقتها فقدت قعدت كيف الهبله بروحي انعيط وانخبط وبما ان دار الضيوف كانت في جناح بروحها برا الحوش ماحد من هلي سمع عياطي ولا بكايه
اول شي دزيت للصفحه نسأل نبيهم حتى ايدزولي صورته نتأكد بس ماحد رد عليا ، قعدت كيف المجنونه اندور في أي شي يطمني رنيت ع سراج ماردش وقتها زادت شعلت فيا النار
رنيت ع رقم مراد مقفل مقفل مقفل
كرهت الاسطوانه عزقت التليفون والكتابات ظلمت في عيني الدنيا
يامرادوينك حبيبتك حتموت لو صارلك شي
شويه وخشت عليا امنيه اختي تبي تصمط عليا لقتني منهاره والدنيا حدايه طراطيش
امنيه:كنك سن في
-مراد مراد يامني ااااه ياربي
امنيه:تي كنه
حكيت لامنيه ورغم انها ماتحبكش يامراد تأثرت بكل لأنك ف النهايه كنت صديقها قعدت اتهدي فيا وتقولس بالشويه وتأكدي قبل بلكي كدب
وقتها جاني شعورعور اني ارمله وانا مش مزوجتك اصلا جاني شعور اني نبي انموت معش في شي انعيشله ولا انعيش عشانه قلبي انقبض والدمزع والحسره والترقب تمو اسياد الموقف
وگأن فطومه صاحبتي حاسه بيا شويه لقيتها ترن بعد عزقت الفون خديته بسرعه ع امل يكون سراج ولا انت يامراد بس لقيتها فطومه
-ايوا
فاطمه:كنه صوتك
-لقيت خبر موت باسم مراد ع الفيس ونفس العمر
فاطمه:هييييء تدوي من جدك
-ياريتني انبصر ياااريتني يافطومه ناااار والعه فيا بنمووووت يافطومه بنموت
فاطمه:اهدي تي الفيس مش كل شي يصدق فيه مرات كدب
-يارب يطلع كدب والله لو يطلع حي ماعاد انسيبه ولا انزعله بكل غير يردلي حبيبي يافطومه
فاطمه :وحدي الله حبيبه خلاص اسمعي امي اتضبح انشوفها وانعاود عليك
سكرت فاطمه بعدها بدن صحباتي يرنن عليا بالوحده لما فاطمه قالتلهن والحق ماسيبنيش بكل كل شويه يرنن وانا مزلت مقهوره
لين ادن المغرب ومافيش اي شي يطمنني خديت فوني وصبيت ندعدع كأني سكرانه كل شي ظلام وضباب قدامي كل شي يوجع فيا والله مانبالغ بس شعور كان اسوأ ساعات واسوا ايام مرن عليا نسيت كل شي داره فيا تميت نبيه قدامي نبي نسمع صوته وبس
خشيت لداري نسند ع السيسان لين وصلت لسريري وانا ماوقفتش بكا من اول ماسمعت الخبر لين حسيت روحي تعبانه جد حسيت روحي بنفقد وخواتي يهدن فيا وماشيات جايات عليا وانا شريط حياتي مع مراد يمر عليا
كل دكرياتي معاه في دقايق يمر ويقتلني ويحيني من جديد
شويه وخشت ماما عليا انا وخواتي في دارنا
ماما:بنات نوضن صلن المغرب ..كنها هدي تبكي
اول ماشفت ماما كان خاطري نضبطها ونبكي لأنها حتحس بوجعي بس ماقدرتش حتى انصبي
اميمه:مراد مات
ماما:مزالت معاه هي
امنيه:اها ياماما والله وجعني
ماما:ياحول الله ربي يطمنك عليه ياامي
كانن يدون احدايه وانا في عالم اخر خشيت للفيس بلكي نلقى شي يطمني بس مافيش
صبيت توضيت وصليت المغرب ودعيت ربي يبرد عليا ويرحمه لو كان هو الي ميت ولو كان حي ربي يطمني عليه
كملت صلاتي ورنن صحباتي اخرى مابيتش انرد فتحت الفيس تميت نقرى في مسجاتك ونبكي يامراد لين معش قدرت نتحمل واغمى عليا
يوم ورا يوم ورا يوم وانا ع الحال هضا اسبوعين وانا بكا وقهر وتعب ووجع وترقب انراجي في اي شي مافيش شي
انراجي فيك ولا في سراج ولا حتى الصفحه الي نزلت الخبر اي شي يطمنني بس كنت انا الضحيه
بدت الامتحانات وكنت اندير روحي نقرا بلا تركيز ومانحلش ..انا تميت فعلا مش انا مانعرفش روحي من وليش عايشه كيف تقويت ع روحي ومشيت للجامعه وكنت كل مانمشي نتقطع لان المكان الي ديمه يجمعنا لييين
في نص امتحاناتي وقفت الجامعه وضاع مستقبلي معاك يامراد
لا قرايه ولا امان ولا انت ولا حياه
تميت ميته بس حيه تميت نتوجع مع كل نفس دموعي نزحن بس دموع قلبي مزال بيرهن معبي
كل يوم نرجى وندعي ونصبر بأمل انك حي
بس لو حي وينك وين سراج ليش مايرد وين اي شي ايطمنني عليك
الشيطان كان ايزيد فيا تفكير اسود كرهت حياتي تميت ع قولتك يامراد عليشه لان ربي كاتبلي انعيش
كل يوم نكتبلك ع الفيس لا في رد ولا حتى تقرى مسجي كل يوم انخش صفحتك ونرجى لين فقدت الامل
ضرب وظلام مع قص الضي وظلام في حياتي وقلبي وقهر ومراجاه
معش عرفت شن ندير
ندكر كتبتلك في صفحتي ودرتلك تاق
(اين انت ..اين انت يامن سلبت حياتي ..ان كانت مزحه فأخبرني لأضحك لفرحتي بك وليس على مزحتك ..وان كانت حقيقه ..من سيعزيني في حب انهكته الحياة فصبر فجاء داك الموت وسلبته حياته ..لا تتركني وحيدى كأرملة او يتيمة الحب او وحيدة القلب ..عد لي واخبرني بأنهم يكدبون حبيبي لا أقوى على الحياة دونك انت روحي ايعيش الجسد دون روح )
كتبتها ودرت الخصوصيه للاصدقاء المقربون يعني انت بس الي تشوفها
بس قعد البوست وحيد ضعيف لاانت رديت ولا انا تطمنت
3اسابيع وانا بين الحياه والموت نرن ع مراد مقفل وسراج مايردش وماعنديش اي وسيله اخرى بيش نديرها سلمت امري لله وقعدت ندعي وخلاص
لين في يوم قلت نطلع انقعمز مع هلي خاصة ف الايام الاخيره بدا بابا يلاحظ تغيراتي وخايف عليا وبدا يقلق من وضعي وكان يحسابني هضا كله ع وضع البلاد بس انا كنت انعاني من فراغ البلاد في عيني فراغ الدنيا كلها بدون مراد
طلعت قعمزت معاهم تعشينا وهدرزو وانا ماده وجي ع التليفزيون بعدها بابا ناض رقد وقعدت نتفرج ع التليفزيون
وخواتي وماما ايهدرزن وانا ايره روحي منسجمه ع التليفزيون وعقلي في عالم اخر مسكت فوني فتحت الفيس ماجتنيش فيه نيه
حطيت ع مسجات مراد قريتهن ودموعي تمن ينزلن ونمسحهن بيش ماحد يفطنلي بعدها حطيت ع صوره وانا نتفرج
انصدمت من الي شفته
مراد اها مراد مراد ايرن عليا بلا وعي صبيت نجري خشيت لداري نين ماما وانا مصبيه وبنمشي لداري قالت كنها هدي اسمالله
خشيت للدار سكرت عليا ورديت
انا :ايوا ..... يتبع

تقييمكن