رواية [#للحب_حروب_أيضا]
قصة سمية & مراد
17
-ايوا
مراد:اشتقتلك ياعبيه
-قبل مل شي وين كنت مختفي
مراد:كنت في مصر
-من جدك انت !!!
مراد:والله في مصر
اول ماقالي في مصر انهرت وتعصبت لدرجه عمري ماوصلتلها
-انا شنو يعني مش ماليه عينك ولا شنو تي انت نوتتني كرهتني في الدنيا ..شن درتلك انا شن درتلك بيش هكي يكون جزائي ..ليش يامراد هكي حرام والله حرام الي تدير فيه
مراد:تي غير اهدي اطفي شويه كنك الزح انفصلتي
-ليك الحق تسأل ماهو مش انت الي تعدبت ومش انت الي بكيت ليل مع نهار ومش انت الي تدمرت ومش انت الي كرهت معيشتك ومش انت الي ..تي ليش الدوه انت لو تفهم مادرتش فيا هكي
مراد:تي حد يستقبل حد هكي ..تي ليش هضا كله
-انقولك ليش للني عشت 3اسابيع ع اساس انك ميت وتخيب لو قالولك سميه ماتت بس مش اكيد تخيل كيف تقعد لو كنت اتحبني كيف ماانا انحبك راك حسيت بيا
مراد:تي ينعن جد متت الزح من قالها لك فهمين
حكيتله كل شي صار تما يتأسف ويضحك بلامبالاة ويهزب لأني درت هضا كله وهو مايستاهلش
-قسما بالله عمري ماحنسامحك ع الموقف هضا لين انموت
مراد:تي كنك ياعبيه انحبك الزح
-مانحبكش وكداب ماتحبنيش لو تحبني مادرتش هكي
مراد:تي انحبك غصب عنك ..والله كانت مشيه اتهبل عديت غيرت جو وروحت
-اقسم بالله انكان ماتسكت انسكر في وجك توا ..تي شن البرود هضا والله ماتحبني ولا عمرك حبيتني وانا شن مصبرني عليك وع ذلك ليا غير اني انحبك وعندي امل انك تسقم ..بس والله مافي منك فايده ..اقسم بالله لو تجيبلي سيرة ع مصر هدي ماعاد تسمع صوتي
مراد:تي شن كلامك هضا الزح انا مانندريش حتى ع روحي كيف مشيت كنت سكران وماوعيت لروحي الا وانا في مصر
-انقولك حاجه الكلام معاك عقيم ..بنطلع انقعمز مع هلي انا سلام
مراد:باهي ياسميه براحتك ..سلام
كنت وقتها قريب ننفجر للدرجه هدي عندك البرود يامراد ..انا نتعدب وانت متصل مبرد وبكل استفزاز اتقولي اشتقتلك
بس لاني عاهدت ربي انه لو رد بخير حنرضى بكل شي منه كتمتها كالعاده في قلبي وسكتت
خديت فوني وطلعت قعمزت مع هلي
ردتلي الروح وحسيت روحي تحاييت من جديد رغم استفزازك ليا يامراد بس تريحت
قعدت مع هلي وهدرزنا وتعشينابعدها خشو هلي رقدو وقعدت انا ع التليفزيون
لا عندي نيه انكلمه ولا عندي نيه حتى انرن عليه
تميت نتفرج ع التليفزيون لعند الساعه قريب 4 ع الفجر تليفوني رن لقيته مراد
-ايوا
مراد:كنك معايا انتي
-تسأل يامراد من جدك
مراد:والله استغربت من استقبالك ليا لين حكيت لولد عمتي وانا مستغرب منك ..يعني ليا واجد عليك هكي تستقبليني
-اها هكي واكثر المفؤوض بس حنان الأم الي عندي ماخلنيش انعاقبك
مراد:نجيلي احلى ام وحق ربي رايفت عليك بكل
-مارايفتش
مراد:كدابه
-ليش يامراد اتدير فيا هكي مدامك اتحبني
مراد:اقسم بالله ماحد يندري عليا حتى هلي وسراج مايندرو عليا انا اصلا مانيش واعي حتى لروحي كيف مشيت
-يامراد انت كلمتني وقتلي ولد عمتي برا جا من الخمس وبنسكر كيف مش واعي لروحك
مراد:انا كلمتك ؟؟؟؟
-والله كلمتني يعني تزيد الطين بلا حتى انا مش واعيلي والله حرام عليك نفسك
مراد:خلاص ياحبي عاد ساد قسيتي عليا واجد را والله مرايف عليك
-وقدرت تبعد كل دا وتغيب عليا ..ويهون عليك تعمل كدا ياحبيبي فيا .. وانت الي عارف قد ايه انا محتجالك..واني بموت لو عدا يوم من غير لقاك ..لو حبيبي ياحبيبي ليه تسيب دموع في عيني..لو ناسيني قول ناسيني ورووووح
مراد:صوتك يهبل وليا زمان عليه بس الاغنيه شينه ..والله عمري ماقصدت انتعبك ولا انزل دموعك ..اسف ياعمري
-مش مسامحتك
مراد:متأكده
-لا
مراد:عارفك اصلا
-بس معش تعاودها سادني تعب بالله عليك ساد حال البلاد وقرايتنا الي توقفت
مراد:حاضر ياعمري
-وين قاعد انت صوت ريح
مراد:قاعد قدام الحوش
-باهي انحبك
مراد:ااااه ياقلبي ليا زمان ماسمعتها ..تي حي علي امه
-كنك
مراد :تي ينعن بوه الزح اسكر الباب عليا ومامعايش مفتاح
-ههههههههه احسسسسن تستاهل خليك بات ف الشارع
مراد:مشمته ياعبيه خزي .خليك معايا نزقب م البلكوني
-القروده راقدين توا را ما في الا انت واعي
مراد:والقرد حبيبته شنو ياقردتي
-هههههههههه نجيلي قردي ياربي
مراد:ينعن بو رومانسيتك الزح ههههههههه
سكتت وتميت نسمع في صوت خربشه بعدها صوتك دار صدا مراد:زقبت ونزلت حتى للسقيفه لوطه وتوا بنخش لفراشي ف المربوعه تي نجيلي جداي مفرشتلي
-مش قتلك قرد
مراد:امتى بس انتي الي تفرشيلي
-ع حالك هضا شكلها لا في فراشات ولا حتى كراسي بلاستك
مراد:هههههههههه تي كنك انتي الزح انشالله مانتهنى لين ناخدك
-اممممم انشالله !
مراد:مسرع الفجر يأذن
-نطلب منك طلب
مراد:عيوني وكلي ملكك
-امشي صلي في الجامع
مراد:حاضر ياقلبي والله نمشي توا انصلي
-انحبك
مراد:انموت فيك ياعمري سامحيني يااحن واغلى قلب عندي
-مسامحتك ياروحي خلاص هيا بيش تلحق تصلي
مراد:هي بندير حمام ونمشي انصلي
-تصبح ع خير ياقلبي
مراد:وانتي من اهله انحبك واجد عرم هلبا بكل
-من قدي انا
مراد:اسمعي
-نعم
مراد:ادعيلي وندعيلك انكونو لبعضنا
-انشالله حبيبي
مراد:سلام
سكرت منك ولا كأني عشت عداب من فراقك ونسيت كل شي وبديت من جديد
بديت وياريتني مابديت
مرت الايام ونحنا جونا تمام بدا الصيام وكان الضرب كل يوم اشر من الي قبله بس انت الي كنت محلي حياتي ومزينلي ايامي ومحسسني بالأمان والهدوء رغم الحرب واصوات الصواريخ الي تخوف
كنت يوميا بعد الفطور انكلمك وتقولي ماتكلمينيش وانا صايم وبعد الفطور باانرن عليك ياترن انت
كان احلى صيام رغم كل شي لانك معايا
في يوم ماكانش عندي رصيد ماصدقت اميمه اختي عطتني شفرتها نفتح بيها بيش نشوف ايميلي لاني ليا كم يوم مافتحتش وكانت حوالي الساعه 5يعني الفجر مأدن ومانقدرش انكلمك
لقيتك منزل خبر (ادعو لخويا سراج طاح علينا وتوا قاعد في غيبوبه ف العنايه بين الحياة والموت)
حسيت قلبي وجعني لأن لو سراج صارله شي انت احتمال تنجن لأنك متعلق بيه بكللل
قعدت مش عارفه شن اندير واميمه تبي شفرتها عطيتها لها وانا ماعنديش رصيد بكل
قعدت نحرق ومشغوله نبي نوصلك مش قادره وماعرفتش نرقد
ومشكلتي اني من ضعفي وقت نوحل نقعد نبكي
زعمك صح سراج تعبان زعمك حيصيرله شي انشالله ربي مايكتبها ويقهرك ع خوك يامراد
سلمت امري لله و بعد محاولات رقدت وتاني يوم ....
يتبع ..
تقييمكم 😍
أنت تقرأ
للحب حروب أيضآ ( روايات ليبية )
Roman d'amourالاسم يكفي فا حتي في الحب يجب خوض معارك للحصول عليه
