للحب حروب أيضآ ( روايات ليبية )

حلقة 18🔥

رواية [#للحب_حروب_أيضا]

قصة سمية&مراد

18

رقدت وتاني يوم ع طول مشيت لبابا وخديت منه جنيه رصيد
رنيت ع مراد  ورد عليا
-الو
مراد:ايوا شنجو غريبه رانه عليا توا
-بنسألك كنه سراج
مراد:كنه؟
-تي امس انت منزل بوست انه ف العنايه
مراد:هههههههه اها تي لا انا امس ناسي ايميلي مفتوح هو فتحه بروحه ونزل البوست بروحه قاعد مافيه حتى فستري بصيره
-تدوي من جدك
مراد:وحق ربي هي .انا فتحت الفيس امبدري انفجعت تهزب وخدا طريحه ومسحت البوست وعدت ع حالها
-خزي والله بارد وانا الي خفت عليه ودرت قصه تي شن خطر عليه باهي
مراد:بيقيس غلا اصدقاءه هههههه
-يناعلي وخلاص
مراد:تي انا ابي يناعلي .احم خلاااص ماتودريش صيامنا نحكو بعد الفطور
-اوكي سلم توا
سكرت وواخيرا تريحت
مشى شهر الصيام ونحنا جونا تمام وجا العد وكانت امورنا تمام بس بعد العيد فجأه مراد تغير رد يسكر اشر من قبل واهتمامه نقص وبديت انا نتعب من جديد
بس كنت نصبر لأني كالعاده ضعيفه معاه
بدت تركبني الغيره زادن البنات في صفحته وزادت تعليقاتهن الصامطه قعدت نسحن في روحي وكل مانضيف بنت هو ضايفها يقولي سكنتيلي وزاقبتيلي
ليت بدا ايخشلي ع اسطوانه جديده هي اني نطلع معاه في سياره
مراد:وشن فيها انتي حبيبتي وانا انحبك
-لو اتحبني ماتديرش فيا هكي
مراد:تي وشن درتلك انا الزح
-الي تطلب فيه مني شي يمسني ولو تخاف عليا ماتطلبش هكي
مراد:تي انتي ماتحبينيش كان اتحبيني ماتديريش هكي
-بس الحب مش هكي
مراد:تي وكني انا صحابي كلهم يطلعن معاهم حبيباتهم وانا حبيبتي ماتبينيش
-اهدينا الي تحكي عليهن مش بنات ناس..وانت لو بتفسر رفضي بجوك فسره بس الي تطلب فيه مستحيل
مراد:خلاص معناها ماتزعليش مني يوم مانخونك
-كان ترضاها في حبنا امشي خونني ..بس اعرف ان يوم ماتخونني حيكون كل شي انتهى بيننا
مراد:تي انحبك ياعبيه والله مانقدر انخونك
-بس افطن لكلامك يامراد راك رديت اتوجع فيا وانا متحمله
مراد:ماهو انتي راسك يابس
-انا مجنونه بيك وانحبك وخايفه عليك مش راسي يابس
مراد:تي ياريتك مجنونه كان مجنونه راك درتي للي قتلك عليه وطلعتي معايا
-مراد الرصيد بيفصل سلام
حسيت وقتها اني رخيصه فعلا في عينه ..للدرجه هدي وصلت معاك انك تبيني انكون كيف العاهرات
انك تسمي شي كيف هضا حب ..عمره ماكان هكي وحتى الحب الطاهر جنونه طاهر ..جنونه في الحلال مش غضب ربي
صبرت ايام وهو ساكنلي وانا فايتته لين جا يوم تمى داير روحه يعاقب فيا ومعش يرن عليا ويعامل فيا بجفاف عشان ماسمعتش كلامه ..معش قدرت نتحمل ويومها نضت من الصبح حاسه انه اليوم حيصير شي يقلب حياتي للأبد
كنت طول اليوم ندكر في كلامه وماسكتني العبره ..مش مصدقه ان مراد وصلت معاه لهالدرجه
نرن عليه طول اليوم مايردش كان جوي معفن ومش طايقه روحي
عدا اليوم كالعاده وف العشيه جنا بنات عمتي بيباتن عندنا وفروخ وهرجه كنت مش متحمله اي شي وقلبي يوجع فيا بكل ومش طايقه حتى روحي لأني تعبيت دل من مراد وقل قيمه بمافيه الكفايه الي تحملته انا مافيش بنت تقدر تتحمله والي شفته انا مافيش بنت ترضى بيه
بس انا كبدت عليه وقعدت ع العهد الي هو قطع اوراقه من زمان وتحول الحب عنده لتسليه لدرجة وصلت بيه انه يحسبني كيف العاهرات الي يطلعن ف السيارات
والي زادني يومها شفته معلق ع بوست حقير بكل منزلته بنت في قروب وكاتبلها لنقانك طرف اتهبلي
انا وقتها حسيت روحي خلاص قرفت جديات وقررت اني نعفس ع قلبي وتكون اليوم هي النهايه بيناتنا لأني مادمت ساكتتله هكي حيتمادى
كنت انقول هكي في عقلي وقلبي يقولي اسكتي توا يسكتك بكلمتين وترضي كيف كل مره
جا الليل وهو رن عليا
-ايوا وينك خارج التغطيه ومقفل طول اليوم
مراد:ماعنديش نيه نشحنه التليفون كاين طافي
-اها يعني مافيش وحده قاعده ترن عليك كيف الهبله وانت منسفط عليها
مراد:تي قتلك طافي شحن خلاص
-اها طافي شحت ولا منسجم ع النت مع الطرف الي تهبل
مراد:وانتي عليش زلقبتيلي الزح معش تزقبي لأمي
-يعني يامراد غيرتي عليك تمت زاقبتلك
مراد:اها زاقبتيلي وبعدين تعالي هنا عليش اتضيفي فيها ابتهال
-والله انا حبيبتك وليا الحق انغير عليك
مراد:لا مش حبيبتي وماليكش الحق لو حبيبتي اتديري الي انا نبيه
وفجأه الخط انقطع بيننا والضي انقطع ولما الضي يقطع تعدي التغطيه صبيت ع الروشن بيش انحصل تغطيه ورنيت عليه
-ايوا
مراد:تي ها
-ها ؟؟وصلت لهكي هي
مراد:توا انتي شن تبي من الاخير بتقلبيها نكد ع امي
-انت الي شن تبي يامراد
مراد:تي نبيك معش تزقبيلي الزح ..الو الو مانسمعش فيك
-ايوا يامراد نسمع فيك بس انا حبيبتك ومن حقي
مراد:اسمعي ياسميه انا انحبك وانموت فيك بس مش انتي الي نتمناها
-شنو بعد هضا كله مش انا الي تتمناها
مراد:اها انا انقولك حاجه اتقوليلي لا شن نبي فيك كان ماتسمعيش كلامي
-يعني بعد قريب 3سنين تقولي مش انتي للي نتمناها ..اوكي يامراد انشالله اتحصل الي اتمناها وكل واحد يعدي في طريق
مراد:تي فيش اتخرفي انتي
اول ماقالي هكي عرفت انه حيستعطفني وحنرد عشان هكي سكرت في وجه رن اخرى قفلت فوني
كان الضي مقطوع والدنيا ظلام والدنيا دلف وصواريخ برا
ما عرفتش انعاني من الصوت الدلف والظلام الي نحق فيه ولا من صوت دقات قلبي والوجع والظلام الي انحس فيهفي روحي
تعبت معش قدرت نتحمل اكثر خلاص قررت النهايه يوم مانحس ان مراد مال لبنات غيري وهضا الي كنت انقوله فيه من بداية علاقتنا
طلعت قعمزت مع هلي وتظاهرت بالقوه كنا انحقو في الصواريخ قدامنا والدنيا ظلام بنغازي كلها ظلام والطيران الليلي بدا كان لأول مره الضي يقص ع بنغازي كلها
تميت نتظاهر بالقوه وطلعت قعمزت مع هلي بس اميمه وامتيه خواتي فهمنني ..خشن للدار ونادن عليا
خشيت وراهن
اميمه :منك شن في
رفعت يدي تظاهرا بالتعجب وماقدرتش ننطق شي غير اني قلتلهن :كللل شي انتهى
اميمه:احسن والله افتكيتي
امنيه:بسهوله هكي انحس فيك مش معدله
-تعبت خلاص معش نقدر نتحمل..هيا نطلعو مع بنات اعميمه عيب بروحهن قاعدات
كان الجو رعب وانا قلبي يتقطع ونفسي مضايق وحتى نبضاتي توجع فيا
يعني 3سنين يعدن هكي بالساهل بعركه هبله بيننا
هي هبله وتافهه بس كلمته وجعتني وبعدين انا تحملت واجد وبقراري ماظلمش هضا نتيجة افعاله فيا خلاص قلبي انجرح بما فيه الكفايه ولو اي وحده مكاني كانت حتدير هكي من اول مره زعلها ..بس انا الي هبله
كنت ندوي في عقلي ونتظاهر بالفرحه ببنات عمتي ونهدرز معاهن بضحكه وقلبي يتقطع
بدا الضرب يقوى وخفنا من الجنان تطب فينا شي حاجه ..خشينا جوا قعدنا انهدرزو وانا دموعي في عيتي ومتكبره ع روحي مانبيش انزلهن
لين الساعه 5الفجر درت روحي بنخش اندير حمام ..خشيت للحمام وبكيييت لين معش قدرت انصبي طلعت قريب اغمى عليا خشيت دغري لفراشي ورقدت .....

يتبع

تقييمكم 😍