رواية 《#للحب_حروب_أيضا》
قصة سمية & مراد
13
روحت لبنغازي والحمدلله ربي وصلنا طيبين ..قعدت في حيره اندزله مسج ولاانفوته
درت حمام وخشيت فراشي ومن التعب رقدت
نضت ع مسج منك
(شن صار فيكم وصلتو ولامزال)
رديت عليك بمسج (وصلنا امبدري شويه الحمدلله)
دزيتلي بعدها مسج (خزي نحسابه صاروخ ايجي يطرشقك :-D الحمدلله ع سلامتك ياعبيه )
عبيه !!!!مراد رد يقولي ياعبيه ليا زمان ماسمعتها ولا قريتها منك يامراد
كلمة شينه وانحبها منك وكأنك تقولي انحبك
حتى في مغازلتك ليا كنت اتهين فيا يامراد
كنت حاسه ان في شي حيجيني منك يردنا وكنت انراجي فيك بس نقول لا خلاص نحنا اصحاب وخوت بس
يومها نضت صليت المغرب ودرت قهوه وقعمزت ع التليفزيون
هدرزت مع هلي بعدها خشيت رقدت بيش انوض نمشي للجامعه
تاني يوم مشيت ولقيت الجامعه مزال مابدو واجلوها للاسبوع الي بعده
روحت ومشى اليوم كالعاده
ف الليل قيس الساعه 11 كنت مقعمزه ع سريري فاتحه النت وانهدرز مع امنيه اختي شويه بحتت في تليفوني لقيته يرن
تميت انبحت في الرقم ومصدومه هضا رقم مراد ؟؟؟؟
نرد ولالا ياربي شن ندير شن يبي من هضا
رديت عليك
حطيتلي اغنية التلاوي (حبي القديم كان ادكرته )
تميت نسمع فيها ونبكي بعدها سكرت معش قدرت نتحمل
رديت رنيت عليا
-ايوا
وكانت الصدمه انك سكران
وين الي ربي هداه ومعش يفكر في الحب ؟مش كنت انا سبب في غضب ربي عليك؟ليش يامراد شن ردك ليا
وقتها قتلي وصوتك تقيييل وهرجه وضحك وشتيمه حقيره احداك :تي كنك سكرتي الزح
-شن تبي مني يامراد
مراد:اسمعي باقي الاغنيه
-مانبيش نسمع شي شن تبي
مراد:تي كنك ياسميه وراس حبي سيمو اسمعيني انا انحبك مزلت نبيك وحق ربي فاقد بكل توا بس انتي الوحيده الي مدكرها سومه عبيتي انحبك وسامحيني سومه
-كملت دوتك
مراد:ادوي نسمع فيك
-تصبح ع خير يامراد
مراد:وراس حبيبي ماتسكري سميه اسمعيني
فجاه ناضت صوت هرجه قويه احداك وشتيمه معش قدرت نتحملها قتلي :سميه سكري توت
سكرت واستحقرتك واستحقرت روحي الي دارت فيا هكي استحقرت الايام الي خلتني نوصل للمهزله هدي
بس رغم هكي مزلت في نظري كيف ماانت
مشكلتي يامراد اني ديمه حاطتلك في بالي فكرة انك مسكين ومظلوم من الدنيا واني حرام انسيبك وحيجي يوم تسقم ونبقو لبعضنا كيف ماتواعدنا في البدايه
رغم ان لدعاتك ليا في الواقع المفروض اتوعيني بس كنت كأني فاقده عايشه ﻷني انحبك
واجدين قالولي هضا حقير يلعب بيك بس كنت ديمه ضدهم ومعاك انت
بعد سكرت من المكالمه
امنيه:ليش رديتي عليه
-نبي انشوفه شن يبي
امنيه : خليك باهي حتردي تضعفي وترديله ويزيد ايعدبك
-لا مستحيل
امنيه توا اتشوفي ..ياما وقضناك منه وماتسمعيش هضا واحد مش كويس وصوته سكران صح
-اها
امنيه:تي كنك انتي كيف تسمحيله يكلمك الحقير هضا
-خلاص بالله عليك ماتزيديها عليا
امنيه :خليك باهي والله حيضيعك
كان انقولك قديش انجرحت منك حتقول انا مش راجل
فعلا لأنك حلفتلي من قبل انك يوم ماتبكيني حتكون مش راجل
رقدت يومها من كثر البكا والقهره والتعب
وتاني يوم كنت مقعمزه ع التليفزيون جت لقطه في مسلسل يقولو فيها بمعنى ان الشخص السكران اول شخص يدكره هو اكثر شخص يحبه
سمعتها تميت نبكي يعني حتى وقت حبك ليا اتعدبني ليش ليش مصر اتهينني يامراد ليش تدير فيا هكي وكأنك شخص خش لحياتي لتعديبي وبس
مر اليوم عادي وتاني يوم ف القايله رنيت عليا
مراد:كيف حالك
-ماشي الحال .. ليش رنيت عليا اول امس
مراد:سامحيني كنت سكران وتعبان ومشتاقلك
-والمطلوب
مراد:سميه خلاص سادنا فراق انا انحبك ومشتاقلك بكل سميه خلينا انردو لحبنا
شن تتوقعو مني المره هدي رديت ولالا ؟
انراجي في توقعاتكن في التعليقات ♥
يتبع ...
تقييمكم
أنت تقرأ
للحب حروب أيضآ ( روايات ليبية )
Romanceالاسم يكفي فا حتي في الحب يجب خوض معارك للحصول عليه
