للحب حروب أيضآ ( روايات ليبية )

حلقة 9🔥

رواية(#للحب_حروب_أيضا)

قصة سمية & مراد

"9"

عدن شهرين ونحنا متفارقين يوم عن يوم نحساب روحي ناخد ع قلتك بس كنت نكدب ع روحي ،نتظاهر بالراحه بس كله وهم ..
مش عارفه كيف مرن عليا الشهرين
جا الصيام وندكرها يوم الكبيره دزيتلي ع الفيس (كل عام وانتي بخير )
رديت عليك :وانت بخير
بعد قريب 10 دقايق جاني منك مسج اخرى
مراد :سومه كيف حالك
-تمام كيف حالك انت
مراد:عايش والحمدلله ع كل حال
-باهي الحمدلله
مراد:الفجر ادن عندكم بنشرب اميه نلحق
-اها اذن توا ..
مراد:باهي سلام توا تصبحي ع خير وردي بالك ع روحك
-انشالله
حكيت معاك بجفاف بس حروفك ردت فيا الروح رغم اني عارفه انك توا محتاجني وانك في اكثر حالات ضعفك بس ماعطيتكش وجه ،كنت متأكده اني لو فتحت معاك موضوع ان انردو لبعضنا حتوافق ع طول وتضعف
بس الضعف احيانا مش مذله بس احيانا يتحول لهزيمه وانا كنت انظن نفسي قويه ومانبيش نخسر الحرب الي حطيتني فيها نبيك انت الي ترد وتحايل مش انا
سكرت الفيس وانا نلعن ف اليوم الي عرفتك فيه صليت الفجر ودعيت ربي يطلعني من تلي انا فيه ويقربني له وينسيني مراد
فعلا مشى شهر رمضان وانا كل يوم احسن من قبل
نكدب لو قلت نسبت بس ع الاقل تغيرت وتحولت لفكرة انك حترد اترد لأنك مانقدرش تعيش بدوني ..تعاملت بالغرور مع الفراق بيش مانخسرش نفسي وانكمل بقوه وتحدي
جا العيد و بديت انعيش ونتأقلم غصب عني عشان نقتنع بمقولة الدنيا مانوقفش ع حد
ف الفتره هدي من تول يوم الصيام لعند بعد العيد بشهر مانندريش ع اخبارك
مدايرني اوف لاين ع الفيس ومسكر عليا بوستات صفحتك وهضا كله مابيتش نحدفك بيش انعدب ضميرك ببوستاتي وكلامي ع الفيس
يوم ورا يوم لين جا يوم خلاص قررت نطوي الماضي وننساك يامراد عشان انعيش حياتي ..صح مش حنرد كيف قبل بس اهو نضحك ع قلبي بكلمتين
ندكرها نزلت شعر ع الفيس كنت انا مألفته
(خلاص انتهى وماعاد لحبه رده ..نسيته مدفون مع الأموات انعده
نقوى علي حبه وبقوتي انصده ..الي بنيته معاه اليوم بكرا انهده....)
نزلت البوست وسكرت الفيس ..
ع الساعه قريب 10 ف الليل فتحت الفيس وانا كلي ثقه ان خلاص كل شي انتهى بعد 4شهور فراق وخلاص معش حنكونو لبعضنا ..وكلي ثقه اني قويه ومعش انفكر فيك
بس ديمه الظنون كدابه ..
فتحت الاشعارات لقيت تعليق منك ع بوست
فتحت البوست لقيته الشعر متاعي وانت معلقلي عليه
(كدابه لا انتي نسيتيني ولا انا نقدر ننساك ..انتي حب حياتي وانا حب حياتك ..سامحيني ياعمري انا جاي اليوم انقولك اسف وانصلح غلطتي ..انحبك يانور حياتي )
تميت نقرى ف الكومنت وانا مش مستوعبه نعاود ف الحروف بصدمه مسكتني العبره فرحت حسيت بالانتصار تميت نقرى ودموعي ينزلن ..بس فجأه وجعتني روحي حسيت اني ضعيفه اني لعبه في يدك
كانن خواتي معايا ف الدار وانا مقعمزه ع المكتب متاعي مصدومه وعيوني في فوني
-ياربي شن يبي مني هضا بس مش كل شي انتهى ليش جاي يدمرني من جديد ليش
امنيه :وطي صوتك كنك شن في
-حقي شوفي هضا
اميمه : شن في
امنيه :هضا مراد بيردلها الحقير..حي دازلك مسج
مسحت دموعي وخدست منها الفون فتحت المسج (عارف روحي قسيت عليك وعارف روحي مانستاهلش ..بس والله ماقدرت انعيش بدونك اقسم بالله انت حياتي انحبك ياسميه
سامحيني والله انتي الانسان الوحيد في حياتي الي تخافي عليا وتحبيني اكثر حتى من امي ..ضعت بلاك ياسميه
لو مارديتيش عليا حنسكنلك )
حطيت التليفون وتميت نبكي شويه ودزلي (حبيبتي وراس عبيتي ردي عليا )
مابيتش انرد اشويه ولقيتك اترن
ماتعلمش شن صار فيا لما شفت رقمك ايرن عليا بعد 4شهور فراق ماتعلمش كيف احساسي انا بروحي عجزت نوصفه قلبي يوجع فيا و نبضاتي تزيج نرعش وصقعانه تخلط عليا كل شي
اميمه :هو الي يرن
-اها
امنيه : ماترديش ياسميه هضا مايستاهلكش
ما سمعتش الكلام ورديت عليك ..
ااااه يامراد قديش كنت مشتاقه لصوتك ..حسيت كأني حييت من جديد..بحة صوتك وخنقة كلامك قتلني خلني نرد الضعيفه الغبيه من جديد
مراد:الو
-ايوا
مراد:شنجوك
-الحمدلله
مراد:وراس حبيبي مانبكي والله مانستاهل دموعك سميه اسمعيني والله مانتحملك تبكي
-انت قريب بكيتني دم وتقولي مانتحملش بكاك
مراد:اسف والله اسف
وقتها تميت انت تبكي وتخلطت دموعي بدموعك حتى لو ع الفون
مراد:تعرفي لو مارديتيش عليا كنت حنسكنلك ..سميه انحبك والله انحبك
-امباه
مراد:سميه ماتقسيش عليا قوليها ليا طلعيها ماتطغيش ع حبنا وراس عبيتي تقوليها
-عبيتك تعبت يامراد تدمرت حرام عليك
مراد:سادنا اعتاب انا نبيك اتطمنيني بحبك بس ..اقسملك بالله ومانبالغ قريب انجنيت بدونك ..يوميا نركب للسطاح انبحت ف السما ونذكرك ..معش عندي نيه في شي ..تعبت بدونك كنت خايف انردلك تخدليني بس قلبي عارفك حنونه وحتسامحيني ياحبيبتي وامي ودنيتي كلها .. ماتسيبينش خليك معايا سميه ورتس حبيبتي سموحتي عبيتي خليك معايا
وقتها انهرت بكل من كلامك تميت نبكي بحرقة قلب بين اني حنخسر حربي وبين اني انحبك ..بس حبك يامراد كان اكبر من كل شي
قتلك وانا نشهق من بكايا وماحوتك بيش ندوي :تي انحبك ياحمار ياغبي انحبك لو نلقى نقتلك بيش نتريح ..افهمني ضعت بدونك بس انت قسيت عليا ..يامراد انت انا ليش اتدير هكي ليش اتدمرنا انا كنت صابره وندويلك لأني خايفه عليك ..بس انت ضعيف ماتحبش حد يواجهك بغلطك ..بس كيف ماقلت انا انعامل فيك بحنان امك وخوف زوجتك ..واحترام بنتك ..عشان هكي مانقدرش انسيبك
مراد:قولي والله يعني مسامحتيني حنردو لبعضنا ..
-عمري مانسيتك بيش انردلك
مراد:وحق ربي انحبك ..شويه خليك معايا ... هاكي وحده بتكلمك
-من ؟
ولاء (اخته الصغيره عمرها 5 سنين ) :الو
-ايوا ياشمحه
ولاء :كيف حالك
مراد:قوليلها مراد يحببببببك
ولاء :يادي يحببببببك
-هههههههه نجك ليا انتي ويادي
مراد : خلاص هيا عدي شوفي جدي يضبح
-كيف انت في بنغازي
مراد:اها امس جينا ومعايا امي وخواتي ..سراج قعد غادي
-باهي تمام
مراد:كان يقولي انك تسألي عليا
-اها
مراد:انحس فيك مزلتي مش صافيه عليا
-لا غير مصدومه شويه بس
مراد:وليش
-مش مستوعبه انا ردينا لبعضنا كنت نحسابها خلاص النهايه
مراد:بنقولك شي ..نحنا الاثنين مافيش بيناتنا نهايه
-انشالله يامراد
مراد:حبيبي رصيدي بيفصل وتوا ليل مافيش محلات فاتحه نفتحو النت انكملو هدرزتنا
-اوكي باهي
مراد:انحبك
- حتى نا
مش عارفه ليش قلت حتى نا كنت مزلت واجعتني روحي
بس والله لحظتها كأني فعلا حييت من جديد
نسيت خواتي الي هزبنني ونسيت كل شي
فتحت النت وحكينا ولا كأنه صار أي شي
كان احلى يوم في حياتي رديت فيه مراد الي انحبه
حكينا وحكينا وردينا لعهد عشقنا ونسينا كل شي صار
هدرزنا لين ادن الفجر ونعسنا اتفقنا انصلو ونرقدو وتاني يوم انهدرزو
نضت تاني يوم كأني نحلم مش مستوعبه شي فرحاااانه واخيرا رديت يامراد واخيرا ردتلي فرحتي وضحكتي
رنيت عليك بيش نعاود ايام ماكنت انوض فيك الصبح
مراد:صباح الخير ياعمري ناعلي انا ليا زمان ماسمعت صوتك ع الصبح
-وانا ليا زمان ماسمعت بحة صوتك اول ماتنوض
مراد:انحبك ياروحي
-انموت فيك ..هيا بطل كسل صبي صلي وافطر وبعدها نحكو ع النت
مراد:اوكي حبيبي سلام انحبك
-انموت فيك
نضت نشيطه بكل صليت وفطرت وضميت الحوش بعدها قعمزت ع التليفزيون فتحت النت لقيتك فاتح ودازلي مسج
واخييييرا رديت مراد الي يحبني ويهتم بيا بجد كنت اسعد وحده من فرحتي ضحكتي ماتوقفش بكل
عشت معاك احلى ايام وكان مزال ع عيد ميلادي اسبوع بس
وانت اول من عيدت عليا ..بجد كنت فرحانه بيك لدرجه ماتنوصفش
وكنت خايفه يصير شي يكسر فرحتي ..
اتوقعن فرحتي دامت ولا .. ؟

يتبع ...