للحب حروب أيضآ ( روايات ليبية )

حلقة 2🔥

رواية (#للحب_حروب_أيضا)

قصة سمية&مراد

"2"

وجا اليوم الي اتفقنا انه يكون عيد الحب في علاقتنا
يومها اتفقنا اننا نتلاقو في الجامعه..كنت ندور عليك بين الناس وقتها قتلي انك لابس جاكه سوده جلد وجينز..
قعدت انبحت في كل مكان بعدها شفت واحد  نفس المواصفات الي قتلي عليهن ، بعد شفته انفجعت ﻷني تقززت من منظره ودعيت ربي ماتكونش إنت ﻷني في كل الحالات حنرضى بيك
بعد 10دقايق طلعت انت من ورا مبنى كنت انصبي عنده ديمه انراجي في رنه من بابا بيش نطلعله
جيت صبيت قدامي وانت مبتسم ، كنت نحساب روحي قويه قدامك ومانعدلش ولا نتحشم ، بس تأكدت يومها من إن ادعاء القوة بحد ذاته ضعف..
لما شفتك مش عارفه شن صارلي ، مصبي قدامي لكن كأنك حلم قاعد يتوغل في اعماقي..حسيت حبك بدا ينبض في عروقي ويجري مع دمي ، كأني انضربت بسهم ملاك العشق ..الي يضرب الناس بسهمه بيش يطيحو ف الحب، صح تشبيه عبيط وخيالي بس    أي حد جرب شعوري حيحس بصدق كلامي.
مراد:كيف حالك ياروحي
-تمام كيف حالك انت
مراد:بشوفتك..اسعد واحد في الدنيا
-نجك
مراد:سميه انحبك
اااه يامراد لو تعلم شن صار فيا لما شفتك وسمعتك تقولها حسيت بدوخه وقشعريره ركبتني ودقات قلبي تخبط بقوه وبجنون، معش عرفت انفسر حالتي ، مافهمتش شي غير اني خلاص استسلمت وطحت في حبك ..وقتها تأكدت من اني كبدت عليك يامراد، وعرفت ان هكي يكون الي اسمه حب ♥
كنت قدامي راجل بس لمست فيك طفل حنون رقيق ، مافهمتش شن التركيبه الغريبه الي عندك ..خاصة لما طلعت دخانك وولعت سبسي.
ماننكرش اني نعشق الراجل الي يدخن بس وقتها غرت عليك من سبسي يلمس شفايفك، وخفت عليك من انه يضرك وياخدك مني
-مراد طفيه فكنا منه
مراد:كيف ماتحبيش الي يدخن
-لا ماقلتش هكي
صدمتني بردك حسيت كأنك قريت افكاري لما رفعت حاجبك و قلتلي :حبيبي تغيري عليا منه
انصدمت ..كان خاطري انقولك اها انغير بجنون بس سكتت رفعت حواجبي الاثنين وخديت طرف شفايفي السفليه بسنوني وابتسمت :عليك ثقه من قال انغير عليك
ضحكت ضحكه عمري ماننساها وقلتلي :حبيتها منك حركتك الي توا وراس حبيبي عاوديها
تحشمت بكل ﻷنها حركه عفويه ماقصدتهش وديمه اندير فيها ماكنتش نحسابك مركز مع كل تفاصيلي.
ع طاري الحواجب ندكر مره صار موقف ضحكك مني بكل
مراد:صقع عليك ماتعرفيش اتديريها
-مراد بطل صماطه
مراد:ريتي انا نعرف نرفع حاجب واحد وانتي لا بحتي بحتي كيف هههههه
-بارد منظرك سمح وانت رافع حاجبك وحق ربي تحقك بنت غيري مدايرها انوريك
مراد:ههههههههههه حتى غيرتك عبيه (دلع غبيه ) كيفك
-صامط
مراد:المهم ماتعرفيش اتديريها
-اها نعرف ..وقتها درت حركة غباء صح مسكت حاجب بصوابعي بيش مايرتفعش والحاجب التاني رفعته
مراد:وووووووو هههههههههه حي ع ام العباء ههههههه
-اسكت الناس يبحتو فينا
مراد: تي وحق ربي غبيه ههههخههه انحبك يامغوليه ياهو حبيبتي مغوليه ونعشقها .