للحب حروب أيضآ ( روايات ليبية )

حلقة 6🔥

رواية (#للحب_حروب_أيضا)
قصة سميه ومراد
"6"
كلمه منك اتنسيني الحاضر والماضي..بسمه منك هذا حلمي ومرادي..لما تكون قريب انحس بالفرحه معاه..خلوني مع الحبيب انا ماعندي سواه..ياريت ياالدنيا ماتزيدي اللوم عليا خليني انعيش مع حبيبي شويه..من غيرو مابغيت حبيبي انا من بعدو..هو الي بغيت وبقيت على وعدو..
عجبتني اﻷغنيه لما سمعتها ﻷنها وصفتلي شعوري وقتها
تميت نقرى ف المسج ومش مستوعبه شي كيف كيف مراد يقوللي هكي بسهوله كل شي يمشي ا
كنت مصدومه دموعي ينزلن بلا مانحس انفنص نقرى كلمه ونرد انعاود بيش نتأكد الكلام هضا منك ولا انا تهيالي .
كانن مقعمزات حدايه خواتي تمن يهزن فيا ويقولنلي شن في كنك احكي ..تميت نقرالهمطن ف المسج ونبكي
امنيه:اصلا نحنا وقضناك منه من قبل ماسمعتينش ..
-شن اندير قولنلي بس شن اندير مش مستوعبه بنموت ليش يامراد هكي ليش
اميمه:حقير هضا مايستاهل دموعك
امنيه:ماترديش عليه خلاص انهيها هالعلاقه
-شن بالساهل هو واعره را انا قاعده نتعدب مش مستوعبه شي حاسه روحي في كابوس
تميت نبكي ماعرفتش شن انرد عليك ..وكنت انت وقتها اوف لاين وتليفونك مقفل ..دزيتلك (كيف ماتبي يامراد ربي يهنيك)
وسكرت الفيس وعزقت فوني ..حسيت بقلبي يوجع فيا بكل نرعش مع بعضي انفنص ومش مصدقه دموعي ينزلن بس مش حاسه اني نبكي ..كل دكرياتي وحركاتك وكلامك تميت ندكر فيهن وقتها
صبيت خشيت لداري قفلت فوني ورقدت غطيت وجي وبكيت لين رقدت
تاني يوم نضت ماعندش نيه في شي كل شويه نبكي حتى قدام هلي لين بابا فطنلي
بابا:سميه كنك ليا ايام انحس فيك مش تمام واليوم زايده بكل ودمعتك باينه ف عيونك
-شي يابابا مضايقه بكل
بابا:كنك ياامي شن في
اول ماسألني معش قدرت نمسك روحي تميت نبكي قدامه بشهقه تضبطني حسيت اني هضا الي محتاجته حد يضبطني ونبكي قالي وقتها كلام عمري ماننساه
بابا:انا مانندريش عليش تبكي بس ياامي الرسول عليه الصلاة والسلام قال (انما الصبر ف الصدمة الاولى) امشي صلي ركعتين وفضفضي لربك خلاص ياامي معش تبكي
حسيت روحي تطمنت في حضن بابا تريحت حسيت روحي معايا حد ومش وحيده بدونك كيف ماكنت نحساب ..ماقدرتش نحكي لماما لأني ادكرت كلامها لما قالتلي (حيحبك سنه اثنين ولاثلاثه وحتجيني تبكي من وجع الفراق)
خشيت صليت ودعيت ربي (يارب انت عارف اني انحبه يارب لو كان راحته في بعده عني صبرني ..ولو هو يتعدب بدوني ردنا لبعضنا )
كملت صلاتي وطلعت قعمزت مع خواتي ع التليفزيون
اميمه:وااااو ع وجك كيف تي سادك بكا
-غيري الموضوع ماصدقت سكتت
امنيه :تي ياغبيه غيري فكينا منه الفيلم هضا
سمعت كلمة غبيه قلبي رد وجعني ودموعي تمن شلالات
امنيه :كنك اسمالله مش كنتي ساكته توا
-وراس امك خليني في حالي
صبيت ركبت فوق اسطاح
السطاح الي كنت ديمه نركب انكلمك فيه وكنت ديمه اتهزب فيا لما تسألني شن لابسه وانتي فوق سطاح ولما انقولك اتهزبني لأنك ع قولتك ماتبيش حد يشوفني غيرك
تميت انبحت في كل تركينه وانا مش مستوعبه
تدكرت كلماتك (عبيه .. سموحتي..مشعوده ..ام فرج ..روحي ..قلبي ..هب شقلب !.. خت فت !.. اميرتي.....)
كلماتك كلهن مرن عليا
اااه يا قلبي بنموت من تعبي
جا في بالي ليش ليش نسكت انشوف حبي يضيع مني ونسكت ..ليش لازم ندوي معاه انشوف ليش دار هكي ..مستحيل يتحمل بدوني عارفته يحبني لازم نحكي معاه ...وتحملت ان اليوم يمشي عليا بدونه بعداب وبكا وقهر ربي مايضوقه لحد ..وف الليل فتحت فيس دزيتلك مسج وربي يعلم بحالي كيف كتبته وتحملت اني اندل روحي بس لو مادرتش هكي كنت حنموت (انت قتلي انك معش تبيني وانك تغيرت وانك انسان سيء
بنسألك سؤال رغم الي درته في امك وتعبتها عمرها تخلت عنك وسيباتك ؟كيف جاي تبيني نسكت بسهوله وتنهي كل شي عادي
ياحمار افهم انا انحبك انموت بدونك كيف تطلب مني هكي كيف تقدر تفكر في شي كيف هكي ؛مراد تدكر لما قتلي انا لو جيتك يوم وقتلك سيبيني حتسيبيني ..رديت عليك اهم شي كرامتي زعلت مني وقتها
انا نكدب والله نكدب ينعن بو الكرامه الي تفرقنا ..لا يامراد كل شي الا فراقك ..والله راضيه بيك كيف ماكنت خلينا انكملو حياتنا كيف ماخططنا ..انحبك يامجنوني )
بعد كتبت الكلام هضا حسيت روحي تريحت بعدها رقدت
تاني يوم اول مانضت فتحت فيس لقيت مسج منك
(اولا انا ماقتلكش معش نبيك انا انحبك ياحبيبة الحمار بس مش حتتحملي حتكرهيني ياسميه والله انا تميت واحد ماتعرفيش صدقيمي خايف عليك مني
-كيف تخاف عليا من روحي ..نكرهك ؟تدكر انت لما قتلي لو سيبتيني حنكرهك كيف توا تبيني انسيبك واتخيرني بين فراقك او كرهك ..انا انحبك افهم
مراد:خلاص انسي كل شي وخلينا نعيشو وكيف مايصير يصير
-ايوا هك يابارد
مراد:ياعبيه شن درتي فيا اول مره نقعد ضعيف مع حد هكي
-والله زعلانه منك
مراد:الا زعلك ياروحي بس مزال مش حنقدر انكلمك
-عادي نحكو ع الفيس

لما حكيت معاك هكي تأكدت من اني غبيه دليت روحي ومن يومها خسرت كرامتي وخلاص بدا عهد جديد في حبنا
عهد يسود فيه الظلم واللامبالاة والاستحقار والتعب
يوم مادزيتلك المسج كتبت ع روحي الموت ياريتني ماكتبته وياريتمي سيبتك ع الأقل عشت ع عداب واحد مش ع صدمات خلتني نتبلد
فعلا تميت سيء بكل بعد ردينافعلا تغيرت واجد بس مزلت حنون ومزلت انحس منك شوية حب وهضا الي ع سباه تحملت واستمريت ..ع الاقل عداب معاك افضل من عداب العيشه بدونك
اسبوعين ونحنا نحكو ع الفيس لين جا يوم جمعه وانا فاتحه الفيس ف العشيه لقيتك ترن عليا
الله عليك وع صوتك وكلامك وقتها ماستوعبتش حسيتك رديت مراد الي نعرفه مراد الي يحبني حسيت اللهفه والحب من صوتك حسيت بمراد الي فيا حيا بعد كان مريض وتعبان
مراد:اااه ياربي ليا زمان ع صوتك حسيت روحي توا وعيت مشتاااقلك ياقلبي
-تبي تسيبني صح
مراد:والله انا غبي وحمار ومانفهم بس والله خفت عليك
-تي كيف تخاف عليا منك يامجنون
مراد:انحبك ياعبيتي
-انموت فيك
مراد:قولي يارب
-يارب
مراد:قولي حاضر
-ههههه حاضر
مراد:يناعلي من حرف الراء تي قالك نسيبك والله مانقدر ..تي انحبك
-انموت فيك
ومن هنا بدينا من جديد بعد فراق يوم بس ..
تأكدت ان مافيش نهايه بيننا وانا مانعيشوش بلا بعضنا بس
كلمة تأكدت مع القدر جريمه
ايام وانا وياك جونا تمام..لين بديت اتكلم فيا وانت سكران وتدوي في دوه مش مفهومه ..ماكانش عاجبني حالي بس متحمله ﻷني انا الي جبته لروحي
ندويلك ديمه ونفهمك ان هكي غلط وحرام بس لا حياة لمن تنادي
لين في مره قتلي :اسنعي ياسميه انا فهمتك انك حتتعبي معايا بس قلتيلي حنتحمل عشانك ..ماتجيش توا تقولي كلام اخر
-مراد انا خايفه عليك من ربي
مراد:بيني وبين ربي
-مراد انت راضي ع روحك كنك تميت هكي
مراد:ماتلومينيش ﻷني حدرتك
-تي افهم انا انحبك وخايفه عليك
مراد:وانا انموت فيك بس ماعندي مانديرلك
-حرام عليك نفسك وانا وحبنا
مراد:اسمعي تشربي قازوزة ليم
-توا تستستفز فيا انت
مراد:تي شن بنديرلك الزح انتي ناويتيها عركه اليوم
-مش ناويه ع شي يامراد سلام
مراد:لا ماتسكريش وانتي زعلانه
-انا مش زعلانه منك انا زعلانه عليك
مراد:لا ماتزعلي ولت تحطي في بالك بكل ..انا فوق فوق الريح
-اها ماهو مش منك
مراد:تي ينعن ام النكد الزح ..اهو الرصيد فصل سلام ..انموت فيك
سكرت وانت رايق وانا خاطري نضربك نقتلك خاطري نحبسك في مكان ماتشوف حد ولا حد يشوفك
كنت انا نتعدب وانت تتعدب وبمجرد ماتتعب تشرب ولا تحشش بيش تنسى
ديمه حاط اللوم ع الدنيا لأنها خلاتك هكي رغم ان الدنيا ماليهش اي دنب
انت الي درت كل شي في روحك وبإرادتك
دمرت روحك ودمرتني معاك وبدا العداب يصب عليا في كل يوم وانا متحمله
لين بدينا سمستر جديد ..
وحتعرفو بكرا شن مزال حيصيرلي مع مراد،

يتبع ...

تقييمكن ♥