رواية (#للحب_حروب_أيضا)
قصة سمية & مراد
ما قبل الاخيرة 19
اول يوم بيعدي عليا..وانا لوحدي انا لوحدي ..صحيت عيني لقيتني بنادي بنادي بألبي وروحي ..بنادي عليه
كده برضو تسيبني وازاي تمشي وما تكلمناش..عايز اغمض واحلم اني اليوم دا ماجاش..مش قادر اصدق ياعيني اني مش حشوفو تاني بجد واحشني اخدو في حضني ويرجعلي تاني..لسه ححاول اغلب يأسي..لسه ححاول اكدب نفسي..لسه ححاول اصدق اني فارقت عينيك
اول يوم بيعدي عليا وانا لوحدي....
يومها من اول مانضت وانا في فمي الاغنيه هدي انسلي بيها روحي بيش مانبكيش
قعدت كيف الهبله كل ماندكرك ناخد نفس قوي ونقول لروحي ماتبكيش انتي اقوى خلاص كل شي انتهى شن حيفيد البكا كل شي عدا
.3سنين عدت ع الفاضي خلاص انهيه من حياتك هو مايستحقش
قعدت نمسك في روحي بالسيف بيش نتعود وانعيش كنت نتعدب من جوا براكين والعه في قلبي بس الضحكه مافارقتنيش وقتها عشت ايامي بوجهين بشخصيتين قريب جاني انفصام
قعد تليفوني امسكر فتره والفيس معش فتحته لين قدرت نتقوى ع روحي شويه ع الأقل ناري تبرد
قعدت حوالي شهر وانا هكي نحاول بأي طريقه اني نقعد قويه ..اصراري ع التظاهر بالقوه والنسيان فعلا قواني
بس تميت انسانه سيئه بكل اهملت علاقتي بربي حتى صلاتي نأهر فيها ولا نجمعها ..تميت انضيف في عرم شباب ع الفيس وحدفت مراد ..مراد الي عمري مافكرت يصير شي كيف هضا وعمري ماتوقعت نحدفه حدفته وضفت شباب غيره الي كويس والي قليل الادب والي في حاله
قعدن خواتي مستغربات من تغيري المفاجيء تميت نضحك ومش معدله ع حد ومانعدلش حتى ع هلي ديمه بروحي ووجي ف النت وخلاص
تميت عايشه عيشة حيوانات مش راضيه ع روحي بس بيش ننسى تكبرت ع روحي وخسرت روحي
سميه الطيبه المسكينه البريئه انتهت تميت وحده سيئه بكل ماتعني الكلمه
مراد وقتها امتحى من حياتي مش بسهوله ..ماامتحى الا لما محاني من الوجود تميت انسانه اخرى لو يردلها مراد مايعرفهش
في يوم دويت مع فاطمه صاحبتي ع الفون كانت تهدريزه طويله غيرتلي فيها تفكيري
فاطمه:باهي ياحنه معش رن عليك التيس مراد
-لا حتى ع الفيس حدفته
فاطمه :الله ع الدنيا ..قدرتي تنسيه
-مراد حولني لانسانه حقيره مش قادره نطلع منها ..مزلت نرايف عليه ندير في حاجات كنت انقول مستحيل انديرهن بابا قايللنا مش مسامحكن وغاضب عليكن كان ضفتن شباب مشيت ضفت عرم وماعدلتش ..صلاتي رايحه نهمل فيها انا معش نعرف روحي والله تعبت
فاطمه:شن نظام انا مش عارفني انا تهت مني هضا..تعرفي كان انا مكانك شن اندير ؟؟
-شنو ياام العريف
فاطمه :انكبد ع واحد اخر ونقهره..اصلا البنت ماينسيهش حب فاشل الا حب اخر
-لا مانبي حد اخرى ناقصني انا
فاطمه:تي والله هبله
-بعدك في واحد ع الفيس اسمه جابر نعرفه ليا شهر امبدي يخشلي ع جو الحب والغرام هههههه
فاطمه:تي اهو جاك لعندك من بنغازي هو ؟
-لا من الابيار ..يهبل بكل مواليد 88
فاطمه:تي امسكي فيه بيديك واسنانك خير من البلبول لاخر
-ههههههههه تي فكينا من سيرته ..بلا حب بلا وجع قلب
فاطمه :يصير خير وجك توا محمد يرن عليا
-سلام ياسوسه
سكرت من فاطمه وقعدت انفكر في كلامها كل مانفكر اني ممكن انحب غير مراد قلبي يوجعني لاني مستحيل حنحب غيره بس نبي ننساه
وفعلا بديت نحكي مع جابر اكثر ونتعرفو اكثر لييين قالي انه حبني ..ويبيني اندزله صورتي
تصدق يامراد دزيتله صورتي وانت 3سنين تحايل عليا مابيتش ندزلك
للدرجه هدي خليتني سيئه للدرجه هدي تميت نكلم في جابر والحق كان شخص كويييس بكل ومحترم كان مصبي معايا
تميت نكدب وانقوله انحبك وكلام حب وانا كدابه مانحبش تميت نكذب ع روحي ونكذب ع الناس ونتظاهر اني نسيتك يامراد وحبيت غيرك وانا اكبر كدابه شهر واثنين وانا مع جابر هضا وكان يحاول يحسسني بالحب بأي طريقه ولانك مش في حياتي تميت انحاول انحبه لين تعودت عليه وتما جابر شي مهم في حياتي نتيجة التعود مش الحب
لين جا شهر اكتوبر وانا مع جابر وجوه معايا تمام ومعيشني في اهتمام وحب ماشفتش حتى منك يامراد
اخي ع الدنيا يعني الشخص الي يحبك ماتحبش والشخص الي تحبه مايحبكش
تميت نلهى وفعلا جابر قدر يطلعني من جرحي بديت ننساك يامراد وتمى جابر هو رقم واحد في حياتي
ممكن لو يسمعني حد يقولي انتي ماحبيتيشي لانك قدرتي تنسيه انا مانسيتش مراد بس نسيت جرحه ليا وماتعقدتش منه وعرفت غيره ع امل اني انعيش كويس
ندكر في يوم كان عندنا مناسبه لبست وطلعت مع هلي وكنت انخدرز مع جابر ع النت من حوشنا لعند ماوصلت لمكان المناسبه
قتله اني وصلت وبنسكر وهو قالي انه بيطلع مع صحابه بعدها سكرت النت
تميت نهدرز مع بنات العيله ونتراقصو ع الديجي وجوي فوق الريح كنت حاطه فوني ع الطاوله بعدها نادت عليا مرات خالي
--سميه تليفونك يرن
-خليه توا انكمل رقص وانجي انشوفه
--ههههههههه عطاك ربي ياحنه
-هههههههههه تي خلينا انعيشو حياتنا
رقصت لييين طاب خاطري وجيت بنغير الاغنيه غيرتها وقعمزت شويه مسكت فوني انشوف من الي ران عليا لقيته مسج من مراد
اول ماشفت الرقم انصدمت واتقهرت لأنك كأنك مخلوق بيش اتخرب سعادتي يامراد
ف الوقت الي ماصدقت فيه نسيتك وماصدقت تأقلمت مع غيرك وماصدقت تريحت في حياتي ولقيت الشخص الي يعوضني انت طلعتلي بيش اتخرب كل حياتي
فتحت المسج وانا قلبي يدق ومقهوره ومصدومه نسيت كل الي قاعدين وتدكرتك حتى جابر المسكين الي كل شويه بيش مايحسسنيش انه مشغول عني يايرن عليا يايدزلي مسج
اكثر شخص اهتم بيا وماتغيرش عليا وليا معاه 3شهور وكان يبيني بالحلال فعلا نسيته وتدكرتك انت يامراد انت الي ضوقتني جميع انواع العداب
فتحت المسج لقيتك كاتب فيه (كل عام وانتي بألف خير ..سامحيني )
ضحكت ضحكة هزوه ع مسجك ..جاي تواوبعد 4شهور من فراقنا تقولي سامحيني يامراد ..تحسابني الهبله الي زمان تنسى وتسامح كيف الهبله بسهوله
حدفت المسج ونضت كملت باقي رقصي وجوي بعدها روحت كلمت جابر ع الارضي وهدرزت معاه للفجر بس كانت في قلبي غصه نحكي مع جابر وعقلي في مراد
تميت حقيره خاينه في تفكيري كرهتني في روحي وفي حياتي يامراد ..خليتني نعيش اسيرة عداب الضمير
يوم ورا يوم وانا رديت اسوأ من قبل وخاصة لما حال بنغازي بدا يسوء وبدا الضرب في منطقتنا وجيراننا اطلعو كلهم قرر بابا يطلع من بنغازي
وبهكي بدت حالتي تسوء اكثر واكثر
بس كان جابر يحسابني تعبانه ع سبا بنطلع من بنغازي وكان يصبر فيا ..
لين جا اليوم الي كتبت ع روحي العداب بطلعتي من بنغازي حسيت روحي فقدت كل شي
قرايتي وحوشي وهلي وناسي ودكرياتي كل شي ..سيبت كل حاجتي وكل شي كان يدكرني بمراد سيبته ف الحوش وطلعت
تعبت بكل رغم ان كان جابر معايا بس ماكنتش حاسه انه معايا
ومراد من بعد هضكي المسج معش نندري عليه
لين في يوم جتني صاحبتي ساره نعرفها ع الفيس دزتلي ع الخاص
ساره :سيمو شنجوك
-تمام ماشي الحال
ساره:اسمعي را مراد دزلي توا يسأل عليك
-مراد ؟؟وشن يبي انشاءالله
ساره:ايه قالي اني بنسألك ع سميه..قتله اني بنسكر تواومره تانيه نحكو
-اها باه خليه معش تعدلي عليه مادمرلي حياتي الا هو
سكرت ساره وقعدت انا نحكي مع جابر ع النت كنت نحكي معاه ونحكي ع مراد من وراه
يوم ورا يوم لين كنت مره مسيبه فوني ف الدولاب ورقدت لأن جابر ماسك في توكه ومايقدرش ايكلمني درت فوني سايلنت وحطيته ف الدولاب
تاني يوم نضت بنرن ع جابر لقيت مراد ران عليا ف الليل 4مرات
انفجعت بس حمدت ربي اني ما كنتش احدا التليفون بيش مانردش عليه
وكانت هدي المره الثالثه الي يحاول فيها انه يتواصل معايا وربي يبعدني عنه
في يوم حسيت خواتي يودودن وفي حاجه مايبنش يحكنلي عليها تميت انراجي فيهن هن يحكنلي بس ماحكنش
لين سألتهن
-انتن شن الي داساته عليا
اميمه:شنو
-انا نسأل فيكن
امنيه:مراد دز يسأل عليك في اميمه
-وشن رديتي عليه
اميمه :وانتي شن دخلك ..بس تصدقي وجعني ..حسيته يحبك صح
-جابر يرن
درت روحي ماعدلتش وانا من جوا نحرق نبي نعرف شن حكت اميمه مع مراد
كلمت جابر ودرت روحي ماعدلتش بس انا تميت معش طايقه جابر
لا عاد اهتميت بيه ولا عاد تميت انعامل فيه كيف قبل وكله بسبا مراد
مستخسر فيا انكون متريحه في حياتي ساد اني طالعه من حوشي ومقهوره ع بنغازي ..ساد ماعداب الضمير من الي قاعده اندير فيه من ورا جابر اني انفكر في غيره وهو مخلص ليا ومابش يسيبني رغم كل ظروفي
كنت عايشه حياتي كلها في عداب وتعب
لين في يوم كنت مقعمزه فاتحه النت انهدرز مع جابر ع النت جاني مسج
مراد:مساء الخير سيمو
تميت مركزه ف المسج ومصدومه ..خايفه لو رديت معناها انخون في جابر وفي نفس الوقت مانقدرش مانردش
وللأسف نقصت من روحي ومن كرامتي ومن ثقة جابر فيا ورديت عليك يامراد
-مساء النور
مراد:كيف حالك وشن دايره
-الحمدلله بخير كيف حالك انت
مراد:ماشي حالي ..نطلب منك طلب
-نعم
مراد:سامحيني بالله عليك تسامحيني
-انسى يامراد المهم شنجو هلك
مراد:تمام كلهم ..اميمه قالتلي طلعتو من بنغازي
-اها طلعنا وانت وين ؟
مراد:انا في راس لانوف ..
-اها دزيتلي مسج ورنيت عليا وسألت عليا ساره واميمه ..كنت تبي حاجه
مراد:عارف المعايده ع عيد الاضحى جاتك متأخره لاني كنت بايع فوني واول ماجبت تليفون دزيتلك ..وبالنسبه للرنات كنت فاقد ومانندريش ع روحي كيف رنيت الا تاني يوم شفت تليفوني لقيت روحي ران عليا ..وبالنسبه لسؤالي عليك كنت نبي نطمن عليك ياعبيه
-هه مزلت مدكر انت معش تميت الغبيه الي تعرفها
مراد:كان قدرت ننسى راني مادزيتلك توا
-بس انا نسيت
مراد:كدابه نعرفك من حروفك ..مزلتي العبيه المشعوده جيابة العجاج حبيبتي وروحي
-اوكي مراد تصبح ع خير
سكرت محادثتك وانا خاطري انقولك انحبك بس جاني مسج من جابر وانا نحكي معاه ع الفيس (تعرفي انك اكثر انسانه عندي فيها ثقه وانحبك اكثر من روحي ردي بالك اتسيبيني او تتغيري عليا)
مسج جابر هضا خلاني انحس باني حقيره ومانستاهلش حبه ليا وانا قاعده نحكي مع الشخص الي عدبني وانفضله عن الشخص الي حببني في حياتي وصبى معايا
قعد كل شويه مراد يدزلي ويسأل عليا وانا انصد فيه لين معش قدرت نتحمل تميت نهمل في جابر لدرجة انه بدا يشك فيا ويقولي انتي متغيره عليا وانتي معش تحبيني وانا فعلا تميت معش متحمله انمثل اكثر
تمى يستكرد فيا ومعش يرن عليا بيش يعاقبني وانا انقول احسن
لين في يوم انرن عليه مايردش كم مره مايردش
في الليل لقيته فاتح وايشات
-جابر انت معش تبيني
جابر:انتي الي اسلوبك رايح متغير ورايحه معش تحبيني
-لا تهيالك
جابر:انتي اتقولي هكي وعارفه انك تكدبي..اسمعي كل واحد يعدي في طريق لأني تحملت معاملتك الشينه بما فيه الكفايه وتعبت من اسلوبك وطريقتك معايا..عشت معاك ايام سمحه ماننكرش بس ربي يهنيك مع غيري......
يتبع
تقييمكم 😍
