للحب حروب أيضآ ( روايات ليبية )

حلقة 12🔥

رواية 《#للحب_حروب_أيضا》

قصة : سمية & مراد
12
قعدت نسمع في اﻷغنية ونبكي مش فاهمه شن صار ولا ليش دار هكي
قعدت في عقلي انقول زعمك مقلب ؟زعمك ايميله مسروق بس شن عرفه الي سارقه باسمي ؟
زعمك هضا سراج ويبيني نسيب مراد
لا انا لازم ندوي معاه لازم نفهم ليش دار هكي ووين كان وشن سبب غيبته
فكره تجيبني وفكره تشيلني لين شويه وجاني مسج من مراد
مراد:سميه انا يوم ماكلمتك وقتلك شويه امي في انتظار كلمتها بعدها جوني سليمان وربيع اصحابي طلعت معاهم مشينا للفيلا .. سهرنا ورديت للشرب روحت للحوش سكران تميت نعيط في وسط الشارع ودرت هرجه خداني خالي كتفني وطلبلي كتيبة انصار الشريعه جو خدوني من يومها وانا محبوس عندهم وربي هداني ع يدهم ومعش انفكر ف الضلاله والحب مره اخرى لو لنا نصيب ربي حيجمعنا س..ولو مالنش نصيب نبقو اصحاب
-باهي ومن الي ردت عليا يومها
مراد:هدي خالتي سعاد هي الي خدت مني تليفوني
-انقولك حاجه تستاهل كل الي صارلك ..وياسيدي ربي يزيدك هدايه بس ليش اتدير فيا هكي شن ذنبي انا ليش ديمه اتفكر في روحك ..وانا الي خايفه عليك ونراجي في اي شي يطمني عليك حياتي تمت جحيم بسباك ، فقدت قرايتي وفقدت روحي بسباك ليش درت فيا هكي انا شن دنب بس
مراد:سميه انا والله انحبك بس الشي هضا عند ربي حرام ادعي ربي يجمعنا ..وسامحيني والله ماكنت نبي يصيرلك هكي
-انشالله خير وربي يصبرني وخلاص
سكرت الفيس وانا مش مستوعبه ان هضا مراد مصدومه من كلامه يعني انا الي كنت انساعد فيه ع غضب ربي
وقتها ماكانش في حرب وماكانش في قلوب متفرقه باسم السياسه كانت بنغازي تعاني بس ع الساكت وكانت كتيبة انصار الشريعه مزالت موجوده وعشان هكي خال مراد حطه فيها ع أمل ان ربي يهديه حسب مافي عقله
خطر عليا سراج ليش ماقالي ان مراد محبوس وليش كان يتهرب مني
تاني يوم فتحت الفيس لقيت سراج فاتح فيس
-سراج ليش ماقتلي ان مراد كاين محبوس
سراج :ﻷن هو قالي ماتقوللهش
-باهي ليش هو صارله هكي
سراج:اسمعي ياسميه هن كلمتين لو حتبعي قلبك وتقعدي ع حبك لمراد حتموتي منقهره من افعاله مراد خويا وعارفه هو صح يحبك ويموت فيك بس يحب روحه اكثر ويحب الشرب والحشيش اكثر حتى من هله ..لو جا يوم وقالك سيبت اعرفي انه كداب ﻷن حتى لما امي قالتله غاضبه عليك ماعدلش وعدا شرب وتهيالي انتي مش هبله بيش انا الي انقولك ان الي مافيشي خير في امه مافيشي خير في حد ..وانتي حره
-انشالله خير ياسراج
سكرت وبكيت لين طاح سعدي
ويوم ورا يوم وشهر ورا شهر وانا انحق فيك قدامي ومش قادره انقرب درت حد وشرخ كبير بيناتنا يامراد ..تميت نحكي معاك كيف ماتبي كصديق وفي قلبي الف كلمة انحبك ..كنت انشوف بوستاتك ع الفراق ونتعدب ..كنت ديمه انجي نكتبلك مدامك اتعاني من فراقي ليش سيبتني ونجي بندزها بعدها نمحاها
ندكر في يوم في الليل شفتك منزل ع الفيس (يشعر بالمرض الشديد)
حسيت كأنه موس رشق في قلبي كأني أم ولدها مريض وخايفه عليه من غير مانفكر لا في كرامه ولا كبرياء مشيت دزيتلك
-مراد كنك شن فيك شن اتحس
مراد:لا ماتعدليش شوية دلع بس
-مراد انا تعبانه بجد
مراد:كنك احكيلي
-تعبي ماينحكش تعبي تحس بيه بس
مراد:سميه ماتعبيلش قلبي بالله عليك
-ماتعدلش
مراد:باهي انقولك حاجه اتضحك
-شنو
مراد: امبدري ع العشا قاعدين نتعشو مرات باتي قالت حاجه اتضحك ضحكت لين انطلعلك من خشمي بصيره طبت في باتي
كنت متنكده بس ضحكت لانك تضحك رغم ان الي قلته مايضحكش بس درت روحي نضحك وهدرزنا يومها
ندكر نزلت بوست
(لايرويدونا ومن ثم يعودون ﻷوطاننا
عجبا لعقولهم الفارغة وعجبا لقلوبهم التي لا تحسن الاختيار)
دزيتلي انت
مراد:باهي به صار انا عقلي فارغ
-ومن قالك البوست شورك
مراد:اها عارف مش شوري
-انت عارف ان كل بوست انزله شورك
رديت عليا برد حسيته استحقار لكرامتي قتلي : تاكلي تن وهريسه
رديت عليك باستفزازك :تاكل انت كتكات
مراد:كتكات مره وحده يااناري علينا وخلاص
-مراد تبي حاجه عندي جامعه بنرقد
مراد:تصبحي ع خير
سكرت وبكيت لين رقدت قعدت مقهوره كيف هضا كان حبيبي معقوله هكي نهايتنا معقوله هكي يدير فيا مراد معقوله انا ساكته وصابره انا هبله للدرجه هدي ؟كيف انا سمحتله يعاملني هكي ..مراد يعامل فيا بجوه كيف ماهو يبي
بس اقسم بالله اقسم بالله اقسم بالله حيجيك يوم تردلي تبيك كيف كل مره يامراد والأيام بينا ...
تميت نتحمل وتدزلي نرد عليك وانا مش فاهمه شن اخرة التعب هضا ..شن اخرة المعامله هدي والجفاف الي بينا
زعمك حنردو يامراد ؟زعمك حنقدر نتحمل منك اكثر ؟بس ﻷمتى الذل هضا ليش انا هكي تميت مدمنه زيك ليش ادمنتك ودمرتني كيف مادمرك الحشيش والشرب
من شهر 11لشهر 3وانت اتعامل فيا بجفاف ومش قادر تبعد عني وانا كيف الهبله انرد ونستقبلك بنفس القلب الكبير والحب الاكبر ومافيش يوم جا عاملتك فيه بسوء ولا حاولت نفتح معاك اي موضوع قديم وتميت نعامل فيك كصديق قدامك وكحبيب في قلبي
هبله وغبيه وحماره عارفه روحي بس انا انحبك نعشقك مانقدرش انعيش بلاك عندي عدايك اهون من فراقك
ندكر اني حكيتلك ع اني سيبت قرايتي هزبتني وقتلي نبيك عشام خاطري اتردي وفعلا رديت سجلت وكان مزال اسبوعين ع بداية القرايه فقررنا انسافرو لعمتي زياره
سافرنا وغيرت جو شويه وجا يوم مرواحتنا كان في حرب ف اجدابيا
ايام قصة جضران والنفط الاولى قبل الكرامه
المهم بابا اصر انا انروحو بنغازي والاعمار بيد الله
وتيت دبشي وفتحت النت اول مافتحت جاني مسج منك
مراد:من بدري وانا ندعي انشالله تفتحي محتاجك بكل
كلمة محتاجك لما قريتها قلبي وجعني حسيت بيك وخفت عليك
-كنك احكيلي شن في
مراد:مضايق بكل متعارك مع خوالي وبكرا بنمشي انسجل في الداخلي ونعيش في مساكن الجامعه
-كنك ليش باهي
مراد:تي درهولي كبدي ياسميه وصلت بخالي خالد يضربني كف مانيش صغير انا الزح
-مراد انت رديت تشرب ؟
مراد:لالا مستحيل
اول ماشفت ردك هكي عرفتك تكدب حسيت بكدبك بس مشيتك وقتلك باهي الحمدلله
-حي بكرا مروحه بنغازي
مراد:شنوووووو تي كنكم انتم الطريق خطيره را
-بابا مصر يروح
مراد:تي اقنعوه الزح
-انت عارف بابا وحاكيتلك من قبل مش بالساهل اقناعه ..قال خايف اتأزم الحرب ونحصل هنا
مراد:باهي نطلب منك طلب
-شنو اطلب
مراد:بكرا اول ماتوصلي ديريلي رنه ولا نسيتي رقمي
-انشالله لا مانسيتش
بعدها ادن الفجر وسكرت انت وانا خشيت رقدت ونضت تاني يوم اسقدنا شور بنغازي و ......يتبع