للحب حروب أيضآ ( روايات ليبية )

حلقة 8🔥

رواية (#للحب_حروب_أيضا)

قصة سمية & مراد

"8"

سكرت من المكالمه وانا مصدومه كنت متوقعه هكي حيصير بس استبعدتها كانت المذكره قدامي نبي نقرى للإمتحان ؛درت روحي مش معدله وقريت وانا مصدومه مانزلتش مني ولا دمعه بس كنت مخنووووقه ومش فاهمه شي قلبي يوجعني مع كل نبضه
قريت بلا تركيز ودرت روحي كملت بسرعه قفلت فوني وطلعت قعمزت مع هلي
مش عارفه ليش قفلت فوني وانا عارفتك مش حترن بس حتى وجود تليفوني قدامي كان يوجعني
طلعت قعمزت مع هلي ونتظاهر اني مافي شي وعادي لين جت الساعه 11ف اليل خشيت انا وخواتي للدار
امنيه :مستغربه فيك مش معدله
اميمه :كنها
امنيه:هي ومراد سيبو بعضهم
اميمه:افتكيتي
كنت ساكته ونسمع فيهم لين عيوني تعبن دموع قعدت ماسكتني العبره وبيني وبين نفسي مصدومه ونقول لروحي خليك قويه ماتبكيش هو اختار فراقك خلاص ارقدي بكرا عندك امتحان
حطيت راسي ع المخده ومادويتش ولا كلمه كنت ساكته وقلبي يبكي كنت تعبااااانه ماحد يقدر يوصف شعوري يامراد كنت ميته حيه مش مستوعبه شي
مش عارفه شن صارلي ماوعيتش الا ع رنة صاحبتي اتنوض فيا ع الامتحان
صبيت صليت ولبست وشالني بابا للجامعه ..خشيت للامتحان انبحت ف الورقه مش فاهمه شي سلمت الورقه فاضيه وطلعت وماراجيتش حتى صحباتي
طلعت من الكليه مشيت لمكان الي كنا ديمه نتقابلو فيه قعمزت ووقتها معش قدرت نمسك دموعي بكيت لين طاح سعدي
لا عدلت ع الناس الي ينظرولي بتعجب ليش نبكي ولا عدلت ع الامتحان الي ماحليتش فيه
كان وجع قلبي مظلم الدنيا في عيوني
شويه ورنت عليا سحر صاحبتي
سحر :ايوا وينك
-تعالي ورا الاداره ف مكاني ديمه
سحر :تبكي انتي ؟؟
-غير تعالن بس
جن سحر وفاطمه صحباتي
فاطمه :هيييء كنك تبكي
-كل شي انتهى
سحر :كيف
فاطمه:ماتقوليش سيبتو بعضكم
اول ماسمعت كلمتها انهرت بكا معش قدرت نمسك روحي
سحر:شن صارلكم كنا انقولو اكثر اتنين يحبو بعضهم
-انا بروحي مش فاهمه شي
فاطمه: كنك طلعتي طول من الامتحان
-قريت بلا تركيز امس
سحر : امتى صار هكي وليش
حكيت لصحباتي كل شي وانقهرن وانصدمن منك يامراد دعن عليك ومع كل دعوه قلبي يتقطع مانبيهنش يدعن عليك
كنت ياما انشوف منك وانحاول بأي طريقه انسمح صورتك قدام كل الي يعرفو بعلاقتنا عشان ماحد يكرهك
ماكنتش نحكي لحد انت كيف تغيرت وشن اتدير فيا ..حاولت ندكر سيئاتك بيش نكرهك بس متقدرتش ندكرلك كل شي سمح حتى سيئاتك مع حب قلبي لك تمن حسنات
اااااه يامراد شن الذنب الي درته ف حياتي بيش هكي تكون
ظلام .. ظلم ..قهر..تعب .. كل شي سلبي مسكني من يدي الي توجعني ومعش طلقني
روحت للحوش عيوني منفخات من البكا رقدت ع طول
ولما نضت فتحت فوني وفتحت النت كان شييين بدونك قريت مسجاتنا بوستاتك خشيت ع معلوماتي مزال الحاله الاجتماعيه مرتبطه بايميلك
غيرتها وقلبي يتقطع عجزت شن انخليها سيبتها فاضيه بس ماقدرتش نمسح مسجاتك نقراهن ونعاود
متعجبه من الفرق بين مراد القديم ومراد الي في الايام الاخيره
كنت ديمه تقولي يابكايه مش عارفه امتى ادموعك ينزحن
عارف امتى يامراد حيوقفن ؟
لما حنحب غيرك وهضا مستحيل حتى لو جان نصيبي مش حنحبه كيفك
انت كل شي في حياتي
كنت انقولك هكي بس شن انقول توا
مرت الأيام وانا مزلت ع حالتي نفس ماانا مش طايقه حد
وماكملت امتحاناتي الا بطلوع الروح
ماندويش حزينه كل تفكري فيك نبكي وخلاص
والي كان يقهر فيا انك ماحدفتنيش ع الفيس وكل ما انزل بوست نلقى لايك منك
كلهم معايا ويصبرو فيا بس ماكانش حد يجي مكانك
معش تميت نسمع في اغاني ﻷنهن ايتعبن فيالين مره حتني امنيه اختي
امنيه :حي حطي ع مزيكا اسمعي الاغنيه تهبل خطرت عليا قصتك
-هاكي الريموت حطي عليه
حطت عليها وسمعتها وياما صار فيا
(نزلت من البيت ف المطر .. وماهمهاش برد الشتاء..بقالو كم  يوم مختفي مش فاهمه ليه بيعمل كده..نزلت وراحت على مكان كانو فيه تملي بيسهرو..اول ماشافها في سلامو بان ان مشاعرو اتغيرو..وقال كلام ماكانتش عارفه اتجمعو..متفاجأه بيه مدهوله قاعده بتسمعو..اصل الكلام دا يبقى دايما اخرو بعد..فعلا قوام ظنونها جت في محلها..ورفع عينه وبقسوه وبرود قالها:معلش اسف احنا لازم ننسى بعض .....)
سمعتها ﻷخرها وانا قلبي يتقطع ودموعي شلالات
فعلا كان برودك يوم ماقلتها يقتل بس عارفه انك مش بوعيك
امنيه :ووووه ع الدموع ياريتني ماسمعتها لك
-عادي تعودت
امنيه : ولامتى بتقعدي  هكي
-مانظنيش انرد كيف قبل خلاص
امنيه :هضا كله عشان واحد مايستاهلش ومايحبكش
-مراد ايحبني بس ظروفه حكمت فيه
امنيه :مزلتي اتدافعي عليه .. هضا واحد حقير
-مني غيري الموضوع
امنيه :لنقنك هبله ياوخيتي ..ربي يهديك وخلاص
-انشالله..بنرقد انا بكرا بنوض بدري نمشي انشوف النتيجه
امنيه :تصبحي ع خير
رقدت وتاني يوم نضت مشيت للجامعه لقيت روحي مش مصفيه ماده ..هي نفس الماده الي ماحليتش فيها يوم ماسيبنا بعضنا
كانت اكثر كلمه تقهرني لما يسألني البنات
شنجو مراد ؟
كنت نتعب وانا نطلع في كلمة سيبنا بعضنا فنظطر انقوللهم انشالله كويس وانغير الموضوع
ماكانش في شي في تفكيري غيرك يامراد
انراجي فيك امتى اتردلي وامتى اتقوللي سامحيني
عذبتني وااااجد..كنت كل يوم انشوف دكرياتي معاك كأنها فيلم مايبيش يطفى
فيلم سمح بس يعدبني ..ماحاولتش انردك ليا ﻷني مش حنقدر انعاني من حاجتين الخدلان والظلم ..خدلتني دمرتني نهيتني من الوجود
مش مبالغه والله وع قولتهم مايحس بالنار الا الي يواطيها
اكيد واجد كيفي وواجد بنات اضعف مني
صح انا ضعيفه كنت نرضى بالاهانه وعفست ع كرامتي وانا ساكته
بس المره هدي ماقدرتش نرد ..وراجيتك انت اترد
شهرين وانا انراجي ونسأل في روحي
زعمك خلاص هدي النهايه ولا مزال في عداب وحب في حياتي اخرى ؟

يتبع ..

تقييمكم ♥