للحب حروب أيضآ ( روايات ليبية )

حلقة 15🔥

رواية 《#للحب_حروب_أيضا》

قصة سمية &مراد

15

مراد:سميه ربيع وسليمان ومحمد توفو وكنت حنكون انا ميت معاهم بس ربس نجاني
-هييييييء يناعلي كيف توفو ووو بعيد السو عليك حبيبي
مراد:حطوني في راس لانوف وهما مروحين دارو حادث توفو
-ياحول الله مساكين الله يرحمهم ..وين انت توا ؟
مراد:انا في راس لانوف مش عارف كيف حنرد بنغازي بنمشي للعزا
-حبيبي ماتزعلش روحك هضا امر ربي والله حتى نا وجعوني
مراد:تدكري ياحبيبي ربيع كان مسميك ست الحبايب عشان يقولي سميه اتحبك اكثر من امك ..تدكري وهو يغني فيها وانا نكلم فيك تقعدي تقوليلي قوليله يسكت صوته شين ..تدكري كيف كان ديمه يوصي فيا عليك ..تدكري سليمان لما نكلمك وهو حدايه ف السياره كان ديمه يحطلي اغنية سمحه بيش نكلمك وتسمعيها ومحمد الي ديمه مصبي معايا تدكريهم ماتو ياقلبي ماتو وسيبوني بروحي
كنت تبكي بقوه بشهقه قطعتلي قلبي
محمد وسليمان وربيع كانو اقرب ناس لك كانو ديمه يوصوك عليا ويقولولك هدي تحبك بس انت الي ماتستاهلش كانو ديمه يصبو معايا ضدك وجعوني بكل لأني عارفتك قاعد تتعدب بفراقهم
حاولت انهديك ونهون عليك لين قتلي بنمشي انصلي العصر
فرحت لما قتلي هكي
زعمك موتة اصحابك تتعظ بيها يامراد زعمك ربي يهديك
جا الليل وكلمتك كان حالك احسن من الصبح كنت كيف الطفل البريء كنت اتهبل بكل رغم حزنك
شويه وجتكم خالتك سكرت وبعدها بساعه دزيتلي مسج (حبيبي راجل خالتي ع الفجر مسقد بنغازي بنمشي معاه انحبك وماتنشغليش عليا ..تصبحي ع خير ياقلبي )
رقدت وانا مطمنه مش عارفه ليش ردتلي راحتي بعد الخوف مش عارفه ليش حسيت اني رديت انحبك بجنون

مرت الايام ووجعك ع اصحابك بدا يقل مش نسيان بس تناسي  وبدينا سمستر جديد كان جونا كل يوم احسن من الي قبله
تمى جونا كيف بدايتنا جو يهبل
وكأن علاقتنا مرض سرطان
تعرف ليش ؟
لأن مريض السرطان في أيامه الأخيره ترد صحته وعافيته وضحكته وحبه للحياه
وأنا هضا الي كان صاير معايا
بدينا قرايه وولما جينا عند امتحانات صار الي ماكانش في الحسبان ..توقفت قرايتنا ...تدكر ليش
بدت عملية الكرامه
ندكر يوم عملية الكرامه كان اول يوم في عزا قريبنا كنا في حوشنا نسمعو في الضرب
يومها اتصلت بيك قبل صلاة الجمعه
مراد:ايوا حبي
-اهلين حبيبي ..شن في برا
مراد:تي قالو حفتر بدا عمليته العسكريه
-اها يستر الله ها درت حمامك بتمشي للجمعه
مراد:اها توا بنمشي
-باهي ربي يتقبل حبيبي
سكرت وطلعت انضم ف الحوش بعدها بدا الضرب يكثر ونحقو ف الدخاخين تميت خايفه وفي عقلي مراد وبس ..ماصدقت بابا روح من الصلاه معناها الصلاه كملت مشيت رنيت عبيه
مراد:ايوا
-روحت من الصلاه
مراد:اها توا كيف طلعت
-حبيبي بالله علبك ع الحوش دغري ماتمشي لاهنا ولاهنا
مراد:حاضر حاضر
-حبيبي ماتمشينش بالله عليك
مراد:حاضر ياقلبي والله بنروح نتغدى ونرقد
-ايوا نجيلي الي يسمع الكلام
مراد:انحبك ياقلبي ..هيا توا بنسكر وصلت للحوش
-باهي سلام
مراد:اسمعي
-نعم
مراد:انتو منطقتكم مقصوده وخطيره ماتطلعيش للسطاح ولا لجنان وماتجيش شور الرواشن اوكي
-حاضر حبيبي
مراد:في امان الله ياعمري
سكرت وحسيت روحي مطمنه رغم الضرب القوي الي برا
حطينا الغدا تغدينا وبابا قرر ياخدني انا وخواتي ونمشو للعزا في عز الدلف لان ماما قاعده ف العزا
لبسنا ومشينا وخدينا معانا دبش بحيث ان لو صار اي شي وماقدرنش انروحو انباتو
مشينا في الطريق والجو رعب رصاص من هنا ودخان من هنا لين وصلنا في مكان فيه الانصار جت الطياره و ضربت قدامنا وناضو الدنيا تتطاير ورصاص ومضاد طيران
موقف عمري ماننساه كان بينا وبين الموت دقيقه بس ربي نجانا
مشينا نجرو بالسياره والدنيا دخاخين ونحنا نتعايطو ونشهدو ع اساس انها هدي لحظة الموت وخلاص كل شي انتهى
مش عارفه ليش اول حد خطر في بالي لحظتها انت يامراد وماما
لاني من اليوم ابي قبلها ماشفتهش ..وانت لأنك كنت اتوصي فيا عليا واجد
وصلنا للعزا واول ماخشينا اضبطت ماما وتميت نبكي بعدها جو كلهم تمو ايحمدولنا ع سلامتنا
خشيت حولت عبايتي واول شي درته رنيت عليك لافكرت في حد يفطنلي ولاخفت ماما تسمعني اتهزبني
رديت عليا وصوتك كيف واعي من النوم
مراد:ايوا ياقلبي
ضعفت لما سمعت صوتك تميت منهاره ونبكي
مراد:حبيبي كنك احكي شن في سميه كنك
-مراد كنت حتفقدني
مراد:شنو تي شن تخرفي ربي مايكتبها شن في
حكيتلك وانا نحطيلك مسكاتك العبره
قتلك :مراد تخيل متت شن كان حيصيرلك
رديت عليا وصوتك يرعش من عبرتك :والله والله انكان ماتسكتي توا انسكر معش تقولي هكي
-بس رد عليا
مراد:نكدب لو انقولك حنموت وراك بس والله حنتعدب حنكره حياتي تي انتي حياتي ..اسمعي هي كلمه وحه معش تردي لحوشكم ع الاقل الاسبوع هضا
-اصلا هضا الي حيصير
شويه وجن صبايا يسلمن سكرت ..وثلاث ايام العزا ماقدرتش انكلمك
وبعد روحت حوشنا كان ع المغرب رنيت عليك رديت عليا هدرزنا بعدها سكرنا
لميت ادبشي ودرت حمام ورقدت ..نضت في الليل متوقعه نلقى منك رنه بس مافي شي
استغربت ورنيت عليك مارديتش 
قلت بلكي مش فاضي بس الوقت تأخر وانت مزلت مارنيت لين ع الساعه 3ف الليل وانا ساهره ع التليفزيون رنيت عليا
رديت عليك كان صوتك باين انك واخد شي
-ايوا وينك
مراد:انحبك
-حتى انا بس وين انرن عليك ماتردش شغلتني
مراد:كنت برا والتليفون مش معايا ..تي ارجي الباب يدق
-يدق توا ؟
مراد:هضا ولد عمتي وصل من الخمس توا
-اها به سلام
سكرت ورقدت تاني يوم انرن عليك من الصبح ماتردش استغربت وانشغلت بكل لين ف الليل رنيت عليك برقمي الاخر رد عليا سراج خوك
-ايوا وينك انت كنك ماترد
سراج:سومه انا سراج مراد مسيب تليفونه من الصبح وماروحش لتوا
-شنو وينه ماسألتش عليه
سراج:سألت عليه صاحبه قالي عندي
-اها به كان روح قولله سميه رنت
سراج:حاضر انشالله
-سلام
سكرت وانا مش خاش راسي كلام سراج ..مراد مستحيل ينسى فونه ومع هكي قلت بلكي عادي تصير
تاني يوم رنيت وسراج مايردش ولا مراد يرد ومره خارج التغطيه ومره مقفل لين خلاص معش قدرت نتحمل
4ايام وانا ع الحال هضا كانت مزالت قرايتي ماوقفتش وامتحانات الجزئي قريب يبدن
خديت مدكراتي وخشيت للصالون نقرى نتظاهر بالقرايه وانا مقهوره منك ومشغوله عليك ومقهوره من سراج ليش ديمه هكي مايطمننيش
فتحت الفيس لعل وعسى نلقى منك مسج يطمنني
ولقيت الي يشغلني اكثر ويدمرني
صفحه تنزل في اخبار بنغازي منزله بوست (العثور على جثة الشاب مراد سالم ورفاقه مقتولين مجهولين الهويه في سيارتهم عند مشروع الصفصفه ) ......

يتبع
تقييمكم