...
كانوا واقفين اربعتهم قدام قبر ابوهم،
ريان الي ما وقف صياح من سمع الخبر، كان صعب عليه يفارق ابوه بعد ما كان كل شي بالنسبة له ..
الوقت بدأ ينتهي ولازم يروحون، انتهت صلاتهم عليه و دعائهم له و الناس بدت تروح و الشمس بدت تغيب و عياله لا زالوا واقفين عند قبره.
رياض: لازم نرجع ..
راشد: يله رعد ريان
رعد الي كان يبكي بصمت تبع رياض الي كان اول واحد يترك قبر ابوه وراه، اما راشد انتظر ريان الي كان جلس عند قبر ابوه ويبكي بألم وضيق.
راشد ما حب شكل ريان كذا، هو اكثر واحد انهار و صار يبكي .. يعرف حب ريان لأبوه مستحيل يوصل مثلهم ابداً، عميق حيل و دافي حيل..
كان بيعطيه مساحته بس تفاجئ ان ريان دخل في نوبة صراخ وصار يحاول يبعد التراب الي يدفن ابوه تحته..
توسعت عيونه و راح يمسك ريان ويبعده عن القبر بقوة.
راشد: ريان انهبلت ما يجوز تفتح قبره
ريان صرخ بأعلى صوته: ما ماات، ابوي باقي حي تحت ...
راشد: ريان ابوي راح، لا تسوي شي تندم عليه بعدين
ريان الي اختفى كل هدوءه كل هالسنين وصار يصارخ بكلمات عشوائية و يحاول يبعد راشد الي صار ثوبه كله تراب من حركة ريان.
رياض التفت لما سمع صراخ اخوانه وشاف راشد يصارع انه يمسك ريان الي يحاول يتحرر منه،
ركض لهم اما رعد كان ما فيه حيل حتى انه يلتفت لهم .. بس سحب نفسه لـ داخل السيارة و سكر الباب قبل ما يبكي من جديد.
...
سحب رياض ريان عن راشد و قبل ما يسوي ريان شي جاه كف قوي من رياض و ثبته وهو ماسك فكه بقوه.
رياض: ما تفهم ان ابوي مات .؟ بزر انت تحاول تطلعه من قبره و تصارخ وتصيح مثل الحريم.؟ اذا كان ابوي يهمك لهدرجة ودعه و ارجع السيارة .. لان صراخ وهبالك ما راح يرجعه للحياة.
ريان الي ناظر في رياض بصدمة، تفاجئ كيف الدموع متجمعه بعينه رغم كل هذا ما نزلت ...
رياض: دقيقة وحده والقاك في السيارة
تركه رياض بقوة وراح للسيارة اما راشد وقف و قعد يبعد التراب عن ملابسه وهو يتابع ريان الي كان منزل راسه و يشهق شهقات خفيفه زي الطفل.
راشد: خلنا نرجع ريان
مسك يد اخوه و سحبه بشويش وشافه يلاحقه بصمت بدون ما يرفع راسه او حتى ينطق بأي حرف.
