_ أوف يا ربي ايه بس الحظ دا، طب انا هعمل ايه دلوقت
نزلت من العربية واقف في قلب شارع معرفش بيودي فين او نهايته ايه
_ حتى المكان مفيهوش إشارة هعمل ايه انا .. ايه دا .. يا آنسة يا مدام .. يا أستاذة
التفتت ليا كانت لابسة عباية سودا ووشاح اسود عنيها واسعة كحيلة وملامحها بجمال هادي، للحظات إتخدت مش عارف ليه اتلجمت وقفت ابصلها بامعان لحد ما تنحنحت .
_ خير يا أستاذ في حاجة ؟
_ انا .. انا مش .. مش من هنا و العربية عطلت في ميكانيكي قريب من هنا
_ لا للأسف مفيش حد قريب من هنا
_ طيب انا هعمل ايه دلوقتي
_ هتبات و الصباح رباح
_ ايوه المشكلة هنا
_ فجر يا بنتي
_ ايوه يا بابا
قرب منا راجل ستيني بابتسامة بشوشة
_ كل دا تأخير يا فجر
_ الصيدلية كانت بعيدة
التفت ليا وابتسم
_ أي خدمة يا بني
_ انا ..
لكن هي اتكلمت
_ عربيته عطلت في الشارع و بيدور على ميكانكي
_ ايوه يا ابني بس دا بعيد اوي عن هنا و كمان هو ممعهوش حتى تليفون نتصلوا عليه
سكت بفكر لكن هو كسر الصمت
_ تعالى يا بني بات عندنا الليلة
= ايه ؟!!!
كان صوتها الي لخص زهولي بعرضه
= بابا ! حضرتك بتقول ايه ؟
_ يا بنتي مينفعش دا يعتبر ضيف في شارعنا
= تقوم مدخله بيتنا يا بابا ! الناس هتقول علينا ايه وحضرتك مدخل راجل غريب شقتك و بنتك الوحيدة!
_ يقولوا الي يقلوه أنا مش هسيبه يبات في الشارع
وقرب مني في هدوء
_ انت إسمك ايه يا ابني
= عمر إسمي عمر
_ طيب يا عمر تقبل تبقى ضيف عندي الليلادي
رفعت عيني ناحيتها مستني ردها او انفعال وشها الا انها بعدت نظرها عننا بالكامل رجعت بنظري ليه وأومت بابتسامة خفيفة
وصلنا البيت، كان أثاثه بسيط كنبة كبيرة في منتصف الصالة وحواليها كراسي و نور هادي ، الجو دافي وغصب عني حسسني بالانتماء
_ معلش بقا يا بني الشقة مش قد المقام
_ ازاي بس دي كلها دفا أنا حبيتها جدا
= فجر : طااب الحمدلله إننا نولنا الرضا
_ فجر ! خشي اعملي العشا
= وهعمله معانا دا كمان و لا ايه
_ فجر !
برمت شفتاها بغضب طفولي اما انا حاولت اداري ضحكتي .
_ قولي يا بني انت شغال فين و ايه الي رماك علينا هنا
= أنا مهندس بشتغل في الموقع الي قريب من هنا، اتصلوا بيا و قالوا محتاجينك حالا فطلعت سايق العربية لكن الشارع كان زحمة فقلت اخد طريق مختصر من هنا لكن العربية عطلت و مفيش اشارة هنا و لا اي وسيلة اوصل بيها لحد
_طيب يا ابني خير ان شاء الله انت تبات عندنا الليلة و بكرا يحلها الحلال
