الساعة عشرة ونص الصبح، كنت واقف في البلكونة الي بتطل على الشارع الي في الاوضة، قهوة كبيرة واضح من تفاصيلها قد ايه قديمة، الشارع ضيق نسبياً، الناس بسيطة رغم الضغوطات في ابتسامة على وشهم، للحظات سرحت بتفكيري، انا هعطل نفسي يومين كمان، يومين في مكان انا معرفوش، مكان انا معرفش اي حد فيه غير الحج توفيق و .. وفجر
فجر !
البنت الوحيدة الي مش قادر افهمها، مش قادر أحدد إحساسي الي جوايا من ناحيتها، منجذب ليها بطريقة غريبة أول مرة في حياتي أحس بقرب زي دا مع انها بعيدة، مش فاهم ليه علاقتها بيا سيئة كدا، ليه كلامها صعب كدا مع انها ضعيفة لازم تظهر قوتها، تقريباً كدا زي ما بيقولوا ان الي بتفكر فيه بيطلع قدام عنيك، أهي كانت داخلة الشارع و في ايدها شنطة سودا كبيرة وبتتقدم في هدوء لكن من وراها لمحت راجل وقفها في الشارع
_ ست الحسن
_ فجر : اصطبحنا واصطبح الملك لله
_ خسارتك في البهدلة يا عم الناس
_ وسع يا رشدي انا مش فضيالك
_ طب بس متتقلش علينا يا جميل
_ وسع يا رشدي بقلك و الا و حياة امي اصرخ و الم عليك الحارة
_ حارة !!! انتي ناسية أني كبير الحارة يا .. يا مرات كبير الحارة و لا ايه
_ ربنا يهديك
_ تعالي هنا
_ انت اتجننت يا جدع أنت ولا ايه انت ازاي تمسك ايدي كدا
_ لا دا احنا لازم نتكلم بقا
= طب متخلي كلامك مع الرجالة ، ولا انت مبتتكشفش عليهم
_ مين الشبح
= ايدك الحلوة دي جمبك
_ ايه
= بقلك ايدك الحلوة دي جمبك
_ معلش اصلي واقع على ودني وانا صغير
قربت منه جامد
_ ايدك جمبك بدل ما اقطعهالك سمعت كدا ؟
= لا مسمعتش
_ اه طب خد دي تسمعك
في لحظة كنت مسددلة ضربة بقبضة ايدي في وشه لكن قبل ما استوعب لقيته رديهالي لحظية وبدأت الخناقة الي انتهت بإن رجالة المنطقة خلصوا ما بينا ، وقفت في قلب الشارع ووشي كله حاسس انه بيجيب دم ، ولقيت فجر بتجري ناحيتي و بتسندني
_ ويطلع مين القمر دا كمان
كانت جملة طلعت من رشدي والي اتأكدت وقتها ان من بعدها هتبتدي مواضيع كتير
*************
_ عمر : اااااااه خفي ايدك شوية
_ فجر : بطل عياط شبه العيال الجرح لازم يتداس عليه
_ عمر : طيب براحة مش كدا
_ فجر : بتاخد مسكنات
_ عمر : لأ
سكتنا للحظات و هي بتمرر القطنة على الجروح الي في وشي، سرحت في ملامحها لدقايق قبل ما أسألها ..
_ عمر : هو انتي في سنة كام
_ فجر : وانت مالك انت
_ عمر : آسف
وقفت وهي بتبتعد وبتحط للمطهر بهدوء
_ فجر : اعتقد انت عارف كل التعليمات بما انك دكتور مش محتاجة اتعب نفسي
وقامت تمشي وقفلت الباب وراها ، وانا رغم دبشها وغضبها الغير مبرر وكلامها الي عامل زي السم الا اني كنت مبسوط
***************
_ سلام عليكوا
= وعليكووو مسلاااام جاي في وقتك يا حج توفيق و الله
_ خير يا رشدي يا بني في حاجة ؟
= في ان الست فجر دماغها ناشفة اوي يا سيد الناس
_ وانا اعمل ايه في حاجة زي دي
= تلينها يا حج مش معقول تصدني كل مرة اقابلها فيها كدا
_ فجر ! انت شفتها فين و لا كلمتها امتا
= الله جرا ايه يا حج احنا مالنا اتقلبنا كدا ليه و لا ابن العز الي عندكوا نساكوا مين رشدي الخليلي
_ ابن العز ؟
= الدنجوان الي اتحمق اوي لست الحسن
_ عمر ؟!
= اسمالله عليييك
_ انا مش فايقلك يا رشدي السعادي
= الا ايجار الشقة دي فين ؟
_ ........
= بقالك فترة يعني بتضرب عالايجار وانا عامل نفسي مش واخد بالي
_ استغفر الله العظيم و انا هبخث حقك ليه يا ابني، الحكاية شوية مشاكل و هندفعهولك دوغري
= يووووه يا عم توفيق ما تخدش على خاطرم مني كدا، انا بقولك بس عشان سمعتك الناس هتقول ايه اما تشوف راجل غريب في شقتك يا راجل يا طيب و انت عندك بت وحدانيه و زي القمر كدا ، احنا بردو هنبقي أهل و لازم نخاف على سمعة بعض ...... ولا ايه
_ ...........
= ساكت ليه مبتتكلمش ؟
_ انا تعبان و مش فايق للكلام دا
= اوماله الزن عالودان أمر من السحر يا ... هه يا حج
******************
_ حمدلله عاسلامة يا بابا
= الله يسلمك يا فجر، استني تعالى عايزك في كلمتين
_ خير يا بابا في حاجة ؟
= انتي قابلتي رشدي انهردا
_ ايوه وانا راجعة من السوق، خير يا بابا عملك حاجة
= لسه منشف دماغه
_ يعني ايه
= يعني هيرميني انا و انتِ في الشارع لو ..
_ كمل يا بابا لو متجوزتهوش
= بس انتِ متقلقيش يا بنتي، انا داير أدور على مُكنة نعيشو فيها بدل الزل الي شايفينه هنا
_ خير يا بابا ان شاء الله ، احطلك الاكل ؟
= ابقي نادي لعمر
_ و انا مالي انا يا بابا ناديله انت
= يا بنتي انا لسه هغير هدومي صحيه يا فجر خبطي عليه
_ يوووه
**********
جريت اقفل الباب بسرعة قبل ما حد ياخد باله، انا في الحقيقة مكنتش اقصد خالص اني أسمع حاجة من الي قالوها لكن انا منت معدي صدفة وغصب عني شدني الكلام، في وسط دوامت تفكيري سمعت الباب بيخبط و صوتها جاي من وراه
_ يلا عشان تتغدى
= مش عايز
_ أحسن
قلبي واجعني عليها، و غصب عني حاسس بنار جوايا ، أكونش بغير عليها، طب و هغير ازاي و انا مبحبهاش، طب ايه الي عرفني مش يمكن بحبها، لا لا مستحيل ، بس الغيرة اثبات خفي لمشاعر بنحاول نداريها يعني الخلاصة اني وقعت ؟
_ متأكد انك مش عايز تاكل
= .........
_ انت يا جدت انت
= جاي
*********************
واحنا عاسفرة ساد صمت مهيب، كل واحد مشغول في تفكيره اما انا فضلت أتأملها باختلاس، بتاكل بهدوء و بذهن شارد تماما عنيها مليانة بدموع حبيسة و هالة الحزن حواليها، بصيت في طبقي و انا بدوري بفكر ، ليه انا حاسس ناحيتها بالمسؤولية كدا، ليه حاسس انها بتاعتي و اني لازم احافظ عليها و ان الاسرة الصغيرة دي أسرتي الي مكنتش اعرفها و لا انخيل تني انتمي في يوم ليها ، خلصنا الاكل وىحت قعدت مع الحج توفيق في البلكونة الكبيرة للشقة
_ توفيق : ثواني اخلي فجر تعملك الشاي بتاعك يا بني
_ عمر : لا لا يا حج انا مش عايز تسلم
_ توفيق : ......
_ عمر ؛ ......
_ توفيق : في حاجة يا بني ؟ عايز تقول حاجة ؟
_ عمر : انا لا ، لا خالص لا ... ااا
_ توفيق : فجر عملت حاجة ؟
_ عمر : حجااات
_ توفيق : ايه ؟
_ عمر : اقصد في الحقيقة يا حج توفيق أنا ..
_ توفيق : انت ايه يا بني وقعت قلبي
_ عمر : أنا عايز اتقدم للآنسة فجر
*********************
#الضيف
#نانسي_أشرف
#يتبع
