معذور يا موطني
معذور يا موطني حتى بنشيدك حزن
ما ردنا منك خبز ولا ردنا منك حلم
بس ردنا منك وطن
مبروك يا موطني بيك اليتامى غفت
معذور جفك بطأ .. صار التقاطع حظن
ردت اسألك موطني أهل الكراسي عرف
يقربولك من الجذر بيكم قرابة دما
اضحك علية بعذر
زين العمايم شكو شو بالسياسة بطت
جانت قبل للفقر هسة على خيرك سطت
بجروحك شكد الي وغنيتلك موطني موطني
وبكاعك شكد غرب استشهد وانصلب
وادري الوطن مو الي
يمتى على ناسك تحس مو دمنا شك الظرف
وهدومنا مركعة بللها صوت القصف
يمتى تحس موطني وتلبس قلائد فرح
وتندار بيك الشمس تعمي لي عين الجرح
:::::::::::::::::::::::::::::::::::::::
هينة عليك ولدك طايحة بليلك ولا لمظن فوانيسك
يمتى تهزك الشيبة وتشيل الطاح ونرجع محابيسك
يبو عكال الثكيل الكاع توجعني ليش الفوك
صدرك يشتهيه الموت وانت بجرحك تذلني
خذو منك الف نجمة وسبعمية حلم كادود لمتونك
خذو منك كلادة وشاب والحنة انجفت وانطمت عيونك
كافي الوادم انذلت يبو النهرين
كافي عيونك تدور الشاب الزين
كافي ملوحتك اذت شواطيهم
جم شمعة خنكهة الريح وانكلبت صوانيهم
يالبيك العشك ممنوع اليستشهد بدارك فصلة ضبة شموع
بيك العاشكة بلاية سهر ذبلت
كاعك خض بطنها بجم سبع حبلت
بناتك لبسن الفضة وشعرهن شاب
بناتك حظرن للنوك الف سجة وخدرهن طاب
تماثيلك حجن هزهن نحيب الناس
متى تفك قيدهن وتحرك السياب
يا سولة وطن ما يفتهم صبحه
اميزة من المتن جي بي اثر تابوت
واشم عطاب كلبة الياكل بجرحه
يالجفك شعرضة ووجهك مراية
بشبابك أسست بالمكبرة ولاية
وحجاية ..ذليل ..يخاف ..شابع موت
طشوها على وجهك لم الحجاية
يمتى تثور مو يبست الكصة بكصة الناطور
يمتى تثور سلاحك زنجر وركضو على الشاجور
يبن فدعة الزلم بشاربك سلعة الزلمة يهد كبل ربعة
خذو منك جفوف وماي كوم الزم هواهم لازم تكطعة
كوم احفر كبر وتلمس اطفالي
من يفز ضميرك تلكة جتالي
الوطن بي ماي للعطشان
الوطن يتمرجح وخدران
يمتى تفز شواربنا ويمتى نسكت البطران ؟؟؟
سجاد الغريب
