رحلتنا الي عفَافَ🌿💙

قصص "الحب في الحلال🌸3"

تقول احدى الفتيات
انا كنت بدرس فـ احدى كليات القمة
مش هاقول انى كنت ملتزمة بس كان حجابى كويس (جيب وبلوزات وطرح طويلة) واخلاقى عاليه ومش باتكلم مع اولاد الا فـ حدود الدراسة وبس
كنا فـ البكالوريوس لما كنت امين اللجنة الثقافية باتحاد طلاب كليتى
وكان هو رئيس اتحاد طلاب كليتى ودفعتى
فكان بيعملنا اجتماعات دورية طبعا علشان نتناقش فـ ميزانية الاتحاد والخطط وغيره
مؤدب ومحترم اخلاقه عاليه معاملته كويسة وكنت باحس انه بيعاملنى بطريقة خاصة
ودة اللى خلانى مع الوقت احس ان قلبى اتعلق بيه فكنت باحبه بجنون بس فـ قلبى وملمحتش ولا بينت دة
وكل ما الاقيه بيتكلم مع واحدة من امناء الاتحاد فـ الاجتماعات كنت بغير عليه لدرجة انى كان بيهون عليا امسكها اضربها
وكنت بادعيله فـ صلاتى ان يكون من نصيبى
وفـ اخر اجتماع لينا قال خلاص دة اخر اجتماع نشوف وشكم بخير
وقال تشرفونى فـ خطوبتى
انا اتصدمت من الخبر
وعمالة اعيط فـ اوضتى واقول
اومال ليه كان بيعاملنى بطريقة خاصة اه يعنى كان معجب وبس اكمنى انا البنوتة اللى كنت احسن من الامناء البناويت باخلاقى وحجابى
وادركت مع الوقت ان (من تعجل بشىء قبل اوانه عوقب بحرمانه)
وانا اتعجلت وفتحت قلبى وخلاص علشان ضعفت وكنت بعيدة عن ربنا
اتعلمت الدرس كويس وعرفت انى معلقش قلبى باى حد غير ربنا وزوجى اللى هيتجوزنى وبعدت عن اى شىء حرام والتزمت اكتر واكتر وكنت بادعى دايما (اللهم زدنى تعلقا وحبا واقبالا عليك يا الله) والحمد لله بقيت ملتزمة و لبست الاسدال
واتخرجت واشتغلت ولله الحمد
احيانا كنت كل ما افكر فـ الذنب دة انى علقت قلبى بحد احس بنغصة فـ قلبى فاجرى عـ سجادة الصلاة واعيط وافضفض فـ سجودى وادعى ربنا انه يغفر لى ذنبى دة وانه يرزقنى بزوج صالح
والحمد لله كنت بارتاح بعديها
بس كان فـ حاجة غريبة
كل ما يتقدملى عريس كويس وفيه كل المواصفات اللى باتمناها مكنتش بارتاح له وبارفضه مش عارفة ليه
لغاية ما اتقدملى زوجى الحالى
ولما دخلت الاوضة اللى قاعد فيها مع اهلى علشان اشوفه
افاجأ بانه يبقى المعيد بتاعى
اللى عمره ما كلمنى وكان بيدينا نظرى العملى وبس وعمره ما بص لى وكان بيتجنبنى فـ كل مكان
وقال قدامى وقدام اهلى انه بيحبنى جدا بس عف نفسه عنى علشان متعلقش بيه لغاية ما يقدر يتحمل تكاليف الجواز وكان بيدعيلى فـ كل صلاة ان ربنا يجمعه بيا فـ الحلال و ان ربنا يحفظنى من كل سوء وشر
انا بصاله مش قادرة اصدق اللى باسمعه ووافقت طبعا
وبعد ما اهلى اتفقوا معاه عـ التفاصيل ومشى
جريت عـ اوضتى وسجدت سجدة شكر لربنا و قعدت اعيط بس المرة دى من الفرحة
لان ربنا بعد عنى حد مش بيقدرنى و قرب لى حد بيقدرنى وكمان متدين وبيحبنى جدا
وقولتها بنفس عميق احبك ربى
#والحمد لله اتجوزنا وعايشين حياتنا فـ سعادة وفرح