Kenepa

ACT 17

MA TRESE BEK

Siguiente dia bon trempan Rob ta para riba parkeerplats wardando Nathaly kaba. Despues di basta un ratu e ta mira konvoi pasa i poko ratu despues e ta mira Nathaly ta kana bini.

E ta baha for di outo bai kontr'é na kaminda.

"ki a pasa" Nathaly ta puntra preokupá? "E herida a habri? Doló bo tin?"

"No mi ta bon no preokupá. Bo a lubidá bo telefon den mi outo".

Nathaly ta hala un rosea grandi di alivio "daaaaankiiii, bo sa kon preokupá mi tabata? Mi no por a kòrda unda mi a lag'é..mi a kere mi a pèrdè den bus òf e a kai na kaminda. Danki danki."

"Mi ta bèl mi mama un bes aki bis'é ku mi a hañ'é. Un biaha mas hopi danki"

Rob ta hasi familiar i puntra "unda nos ta lùnch awe?"

"ken a bisabu ku mi kier lùnch ku bo?" Nathaly ta puntra hariendo.

"Lagami puntra esun korekto anto." Rob ta buk dilanti na altura di barika di Nathaly i bisa "Abo tin gana di kome piska kòrá awe? Mi sa di un otro lugá banda di WTC ku tambe ta bende bon kos di laman. Ku su funchi hasi ku keshi di smèlt i cole slaw i..."

E barika di Nathaly ta gruña dun'é bèrgwensa.

"Mi ta tuma esei komo un si" Rob ta bisa.

Nathaly ta hari i bisa "esei ta lo ménos ku mi por pe apresio ku bo a trese mi telefon bek. Pero ami ta paga e biaha aki si"

E ta smile ku Rob. E sonrisa aki so tin n'e loko kaba.

"Awèl mi ta bin wak bo banda di 12 or." Nan ta duna otro man te mas aki ratu. Rob ta keda atmir'é ora e ta kana bai paden. "e dama aki ta perfekto e ta pensa den su mes"

Nathaly ta bira wak e i grita ku un smile "hey ki bo ta wak?"

"ki tin di NO wak" Rob ta kontesta'

Nathaly ta djis hari i drenta paden lihé i skonde su timides.

Rob ta sali di einan bai dal un pela i despues bai kas bai baña. E ta baña kasi un ora largu pa asina e ta perfekto n'e momentu ku e topa Nathaly. E ta sintié infantil manera un mucha chikí ku a namorá pa promé biaha. E mes no sa kiko ta pasando e. Pero e no a sinti nunka asina aki pa un persona. Muchu ménos den tiki tempu manera awor .

E ta yega para warda Nathaly for di 11:30.

Nathaly tambe ta blo keda wak pafó ki ora e ta mira Rob yega. E ta bira kontentu ora e mira kon trempan Rob a yega. E ta sintié bon ku un hende tin tantu interes asina den dje. "kalma bo mes chica" e ta bisa su mes.

Falta mei ora mas so pe baha ku pouze pero e ta sinti manera falta hopi ora. Porfin 12 or ta bati i e ta bai den baño sinta riba pochi sin nada di hasi. E kier mata tempu pa no mustra manera e tin hopi gana. Pero e no por wanta mas i ta bula sali 12:03.

E ta purba di tapa su entusiasmo i traha un kara mas serio drenta sinta serka Rob.

"konta ku bo Mener? Bo tin hopi ratu wardando? Sòri si mi a tarda, mi tatin par di kos di kaba."

"Bon dia Yùfrou , ayno nèt ma yegá" Rob ta bis'é "bo ta kla? Ban kome"

Nan ta yega De Visserij i bestèl kuminda i sinta kombersá. Nan felisidat ku nan tin ku otro ta kontagioso. Hasta e turista nan ku ta sinta banda di nan ta puntra nan kuantu tempu nan tin kasa òf ta date. Pa no hasi e ambiente straño nan ta gaña bisa nan tin 2 aña ta date.