TUR MAINTA ORA MI LANTA MI TA TENDE PARA NAN TA KANTA.
Siguiente dia Rob ta lanta den su apartamentu ku ainda ta brua. E ta purba manda un app pa Nathaly pero ta mira ku e no ta mira e profile picture mas kual ta un señal ku e ta blòkiá. E ta purba bel i ta haña e mensahe di UTS: "E number ku bo a yama a keda restringí kode ####.
Desapuntá e ta keda wak e desaster ku tin rònt di dje ku ta manera un refleho di su bida aktual. E ta hala un rosea grandi sin sa unda start i kuminsá piki e paña nan.
Nathaly no a sali for di kamber for di ayera nochi ku e a yega. E tristesa i e angustia ku e ta sinti ta buta ku e no kier ni kome ni hasi nada. E ta keda ku su telefon tene ta wak e foto nan di e ku Rob miéntras e lágrima nan ta karisia su kara bini abou. E ta sinti su mes e muhé di mas estúpido na mundu pa a namorá di un hòmber manera Rob. Maske kuantu e bringa pa haña rabia riba Rob e no por i juist esaki ta hasié mas doló. E tin gana di odi'é ya asina e transishon pa lubid'é ta bai fásil.
Hopi bes e tin ku stòp su mes pa e no bèl Rob "No, no buska su drechi, bo no ta sinti falta di dje, bo por biba sin dje" Tur e frase nan aki e ta uza pa purba motivá su mes desishonnan.
E ta rabia ku e telefon i bent'é un banda. E ta kulpa e telefon di ta tent'é i dun'é gana di bèl Rob. Ni 1 sekònde despues e ta kué e mesun telefon bras'é paso e ta sinti ku ta e telefon ta su úniko kompaño pa por bèl i tende di Rob.
Demotivá sin hasi nada e ta subi facebook i buska e potrèt di e ku Rob na de Visserij ku e turista nan. E ta bai den e comment nan i mira e emoticon di e kara ku ta saka di Ashanty Sloop. E ta click riba e nòmber di Shanty i primi pa mand'é un mensahe. Bringando den su mente kiko e skirbi e ta keda type algu i veeg e. Despues e ta pensa "ay ki mas mi tin di pèrdè?"
-Bon dia Ashanty –
Nathaly ta kansa di warda di benta e telefon un banda.
Manera pa malu e telefon ta zona asina e bent'é. Pura e ta kue bek.
Shanty-Heeey Chicaaaaaa long time, konta konta-
Nathaly-mi ta bon, ki abo ku Rob su relashon ta?-
Shanty -kua Rob bo kemen?-
Nathaly- bo sa bon bon kua Rob mi kemen no hunga wega ku mi, mi no tin beis-
Ashanty -Pa di promé no ta ami ku bo, i di dos ki mi relashon ku n'e ta no ta kai bou di bo-
Nathaly - awèl bon ayó- I fada yena ku nervio e ta keda wak e telefon. Si e tatin Ashanty su dilanti aworakí lo e a strangule sigur i e desgrasiado di Rob ey tambe.
Pensando e diferente manera nan ku e lo por hasi Rob doló bek e telefon ta tril den su man spant'é. Ta un mensahe a drenta.
Shanty - Sorri Chica. mi tin hopi ratu sin tende di bo. I porfin mi ta kontentu di tende di bo i bo ta bin interogámi? pa esei so mi ta sirbi ?. Semper bo tabata un bon amiga pa mi i den tur e tempu mi no a topa niun hende manera bo. Mi sa ku bo no ta di akuerdo ku mi manera di biba. Pero si mi ta respetá i apresiá ainda e bon amistat ku nos tatin. Manera nos lema tabata semper ku otro, sin sekreto ta????-
-Nos dekreto- Nathaly ta type bek. -bo tin rason, sòri ku mi a aserkábu di e manera ònbeskòp aki. Mi tambe ta sinti falta di bo den mi bida. Mare kosnan ta otro. T'abo mi por a konta tur kos. Mi ta sinti falta di un hende asina.- I e ta kuminsá yora
-nada un kambia bo por kontami ami ainda. Mandami bo number mi ta bèl bo, mi ke tende bo stèm, porfabor- Ashanty ta type
Nathaly ta mand'é su number i e ta bèl mes ora. Ashanty ta tende na stèm di su amiga ku tin algu robes. Nan ta kuminsá papia di Rob i Ashanty ta kont'é tur kos. Kiko presis Rob ta hasi i ku nan tatin enkuentro nan seksual.
