BEK DEN AWOR
Rob ku despues di tur e tráfiko a logra yega porfin ta tape ku un paraplü, protehiendo e di e áwaseru ku ainda ta kayendo duru i ta mesklando ku su lágrimanan.
Rob tin difikultat pa konsolá su amigu. E lágrima nan ta kuminsá sali pa despues bira hinter un riu di tristesa ku ta kore for di su wowo bèrdè nan. Apesar ku e mes tin hopi doló e ta keda kara para ku su bon amigu Jamal pa e sa ku e no ta e so.
Rob ta sintié pisa pas e santana ta trese mas rekuerdo di Nathaly bek. Mizeria ta gusta kompania nan ta bisa i e dos amigu nan aworakí ta para den un union di tristesa. Kada unu ku nan propio motibu pa pena den e áwaseru.
Áwaseru ta stòp i e solo ta sali i bria ku un furia.
E kayente di solo ta seka tur kaminda di tal manera ku si bo bisa un hende ku awa a kaba di kai nan lo bisa bo ta ganá. E rayonan di solo ta duna nan un forsa i tambe mustra nan ku ni maske kon difísil e tormenta ta, solo lo sali atrobe.
Nan ta brasa otro na skouder i kana bai e pickup. Kaminda no tatin lugá pa stashoná awor ta blo bashí. E soledat pafó ta kuadra loke nan ta sinti den nan kurason.
Nan ta sinta den outo i kore bai kas di e kliente. Nan ta yega mèldu na e bewaker ku nan tin un afsprak i e bewaker ta bisa nan "bon bini na Blue Bay, ta e kas e di tres na man drechi despues di e seru. Pasa un bon dia"
Nan ta yam'é danki pa despues yega kaminda e bewaker a splika nan. Nan ta check riba e papel i mira ku e adrès ta kuadra.
Ta un kas grandi ku asina un kura. E kura ta den hopi mal estado manera kos ku nan basta aña sin limpia.
Nan no a ni baha for di outo i e kliente ta kana rabia bin pafó.. E mener hulandes ta rabia paso nan ta un par di ora lat. E hòmber ta duna nan un predikashi di kon importante ta pa tene bo mes na afsprak.
E hòmber tin rason, pero e no sa e kos ku nan a kaba di pasa aden. Sin forsa pa diskutí nan ta pidi despensa i ofresé un deskuento. Nan ta baha nan hèrmènt nan for di e pickup i manos a la obra.
Rob i Jamal ta trahando duru sin kansa manera robòt. Úniko manera pa nan no kòrda riba tristesa i yora ta tene nan mes aktivo ku nan trabou.
Tin un kònteiner buta dilanti e kura pa nan tira sushi aden. Nan ta keda bai bini i hisa e sushinan fásil manera ta Lego nan ta i benta aden.
E Mener hulandes ta bin pafó bin wak kon leu nan ta i ta keda spanta. Nan ta kasi kla kaba. orguyoso di a tuma e bon desishon di a kontrakta Jamal i Rob pe trabou e mener ta kana bai den e banda di e kas. E ta primi un remote i e porta di e garashi ta habri. Paden e tin vários outo klásiko. E ta purba start esun favorito di dje i e outo ta start un ratu i paga bek. E zonido bestial ku e motor ta saka ta hala e atenshon di Jamal i Rob.
Jamal ta mira kon Rob ta wòrdu distraí un tiki. E ta mira kon Rob ta keda lur wak.
"bai wak no? "Jamal ta bis'é.
Rob ta kontesta "Nos tin ku kaba promé"
"Kla nos ta aki, te e blachi nan aki so mi mester hinka den saku i nos ta kla"
Rob tabata asina konsentrá ku e no a ripara mes ku enbèrdat nan a kaba. E ta kana hala mas serka di e mener Hulandes ku ta kabes bou di tapa mashin. Pa no spanta e mener e ta para na e porta di e garashi i bisa "bon tardi atrobe mener mi tin mag di drenta?"
E mener ku a haña un apresio nobo pa nan for di ora e a mira kon duru i nechi nan a traha ta kontesta. "klaro, pasa numa."
Rob ta drenta i bisa "Bunita outo"
YOU ARE READING
Kenepa
Mystery / ThrillerEsaki no ta un historia di amor. E ta un amor su historia.