NOS TIN UN PROBLEMA
Danique ta den shelu. Jamal a kambi'é por kompletu. E a bira un persona hopi mas alegre i ta apresiá mas tur loke e tin. Hasta e a kuminsá mira e kria nan manera hende pareu ku n'e i ta yuda nan ku vários kos den kas.
E mama mes ta hopi kontentu i sorprendí ku e kambio positivo di su yu. E ta hari tur ora i bisa e yu ku si ta voodoo òf no esaki nan a hasi pe, e mester tabata unu bastante fuerte.
Tinho si no ta masha di akuerdo ku e relashon pero no ta laga su malkontentu ta i bira riparabel.
Tinho ta hala e atenshon di Danique i Jamal. E ta splika nan ku si enbèrdat nan ta serio nan mester kasa ku otro. E no ta di akuerdo ku e relashon pero ku si e lo respetá si ta esaki ta deseo di nan tur dos. No tin nada ku ta hasi Jamal mas kontentu ku e palabra nan aki. E no por warda pa malkriá i kompartí bida ku su reina.
E a yega kas bèl Sol mes ora i kont'é e detayes nan. Nan a papia mas ku 2 ora na telefon. Despues di 3 ora Sol a bis'é bo ta realisá ku nos a papia pa mas ku 3 ora i tur e ora ey bo a keda papia di Danique so? I kon master e ta? Bo ta realisá ku mi tambe konosé?.
Jamal ta keda ketu i Sol ta bis'é "mi ta felis di tende kon kontentu bo ta. Mi a sinti falta di mi ruman ora e ta felis."
Jamal ta bira verlegen na telefon i ta keda hari so. Sol tambe ta hari kuné i nan ta yama otro ayó.
Danique tambe ta felis. Nunka un hende a stim'é asina tantu pa e persona ku e ta sin importá kiko e tin. Tur lokual ku e a kere semper ta amor no tabata nada kompará ku loke e tin aktualmente. Kontentu e ta papia ku su mama i splik'é kon e kier kasa, ki kolo di trahe i tur e otro detaye nan.
Den tur e felisidat ey e mama ta trese un bon punto dilanti "ora bo kasa unda bo ta bai biba? Bo sa kon Tinho ta pensa. Ku tur hòmber mester traha pa nan propio rikesa meskos ku n'e."
"Mi no tin kunes" Danique ta kontesta. "mi stim'é i e stimami, sobra nos ta wak kon ta bai"
E mama ta keda wak e preokupá pero ta pensa ku enbèrdat amor ta importante i ku nunka e no a mira su yu asina felis. E no ke kibra e felisidat aki. E mama ta dun'é un konseho. "dikon bo no ta bai biba ku Jamal un par di luna promé bosnan kasa."
E mama konosé su yu mas mihó ku tur hende. E sa kon malkriá e yu ta. Aunke e a mira hopi kambio positivo e sa tambe ku semper e yu a biba un bida di luho i no ta kompletamente konvensí ku e yu lo ta kla pa un bida normal sin luho i kosnan ekstrabagante.
Danique ta gusta e idea di bai biba ku Jamal. E ta mira hinter e asuntu fásil, e ta mira djis e ángulo ku nan lo por ta huntu i hasi sex hinter dia. E dos kosnan ku mas e gusta.
E promé dia apénas nan tabata kome òf hasi algu. Nan alimento tabata otro i nan pasatiempo tabata hasi amor.
Apesar ku no tabatin niun klase di luho Danique tabata hopi felis, kual a impreshoná hasta su mes mama. E no por a kere ku Danique a sobreviví esaki pa 3 luna kaba sin reklamá.
Konvensí ku e bida aki no ta un reto difísil, nan a kuminsá traha plannan pa porfin kasa. Orguyoso nan a konta Tinho i e mama. Tinho ta kontentu tòg paso e ta bai haña un yu di kriansa ku ta traha duru. Un bon persona pa kuida e hòfi, dia e no tei mas e ta pensa.
Sinta na mesa e grupo di Tinho, Mama, Jamal i Danique ta bebe un bríndis pa selebrá e okashon. Danique tin hopi ratu sin bebe i e biña ta smak straño. E ta sinti ku su stoma ta bòltu i ta kore bai den wc. E ta yega nèt na ora promé e saka tur kos. E mama ta bini su tras i bisé: Ta lokual ku mi ta kere?...mi ta bai bira Oma ?.
Spanta Danique ta bira wak e bisa "no no, no ni papia di dje mama."
E mama felis ta kontesta "ami no a bisa nada, ta bo kurpa mes ta papiando".
