PAR DI AÑA ANTERIOR.
12 or di mèrdia i solo ta stret stret riba kabes. E ta nèt mei mei den shelu manera un djarason ku ta kòrta siman den dos. E solo ta kimando manera ta nervio e tin riba mundu. Un drùpel di soda ta kore na kara di Emmanuel.
Ta manera kos ku e awa di soda lo evaporá promé ku e yega suela di e kalor ku ta hasiendo.
Emmanuel un hòmber ku un kolo di kueru hopi skur i un kurpa fuerte ta trahando duru den un hòfi. Ki ora e mira un hende straño òf un outo ta pasando e ta wanta su rosea aden di spantu. E ta ilegal na Kòrsou I kualke moveshon straño ta hasié nervioso ku e miedu ku nan lo deporte bek na su pais di orígen, Haiti.
E ta orguyoso di unda e ta. Pero na su pais e no por a konfia mas den un mihó futuro. E situashon tabata malu kaba pero despues di e temblor i e di tantísimo orkan kaminda e a pèrdè tur su famianan asta e kosnan básiko manera papel di wc a bira un luho.
Ku tur e sèn ku e a logra sera hasiendo diferente labornan e a tuma e kurashi di bini Kòrsou en buska di un mihó futuro.
Despues di Hustle aki aya e a bin topa ku Agostinjo de Abrue ku ta doño di e Hòfi grandi kaminda e ta laborando. E trabou ta duru i e pago ta tiki pero e bida ku e tin ta hopi mas mihó ku loke e tabatin na Haiti.
Tinjo manera nan ta yama Agostinjo di kariño ta un hòmber fuerte di karakter. Fin di luna semper e tin mal beis pasombra e tin ku paga e trahadónan. E mes tambe a bini Kòrsou di Portugal pa un mihó futuro. Apesar ku e mes tambe a lucha i traha duru pa yega kaminda e ta, e no tin komprenshon pa nada.
Ku hopi sakrifisio i sodo di su frenta e a logra konstruí su imperio na Kòrsou. E ta doño di su mes supermerkado nan. Banda di esei su hòfi mes tambe ta proveé otro supermerkado nan ku fruta I berdura.
Emmanuel tin un par di aña na Kòrsou kaba. Kos ta bayendo bon kuné. E ta sintié na kas i ta dominá e idioma. Su aksènt so ta red'é i mustra di unda e a bini.
E ta un hòmber hopi humilde i tin apresio pa tur kos. Nunka e no tabatin hopi p'esei esun tiki ku e tin e a apresiá i kuida semper.
Emmanuel tabata spar su pida sèn semper sin hasi masha kos pa dibertishon. E tabatin miedu di bai kaya pa nan no mester gar'é.
Pero dia e a hasi aña si e otro kompatriota nan ku tabata traha den e hòfi a konvens'é pa sali pa sikiera bebe algu. E no tin masha eksperensia kon aktua paso nunka e no sa sali. Su kashi paña tambe no tin masha opshon. Ta nèt un karson bon i un kamisa e tin ku e sa bisti bai misa kuné ratu ratu. Sobra ta poko paña kibra e tin ku e ta traha aden.
Un tiki nervioso e a kana yega un snek. Tin bastante hende presente i den background bo ta tende bachata ta toka i zonido di piedra nan di dominó ku ta dal riba mesa. Bebe si e no ta bebe paso e no tin kustumber di hasié i e tin miedu kiko e alkohòl lo hasi kuné.
E chèns ta grandi ku e ambiente aki ku lo kaba te lat.
Den un grupo nan tur ta sinta hari. Na e momentu aki e ta sintié bon. E no tin nodi di wòri masha ku wòrdu gara. Na e orario nan aki i ku e kantidat di hende ku tin lo ta difísil pa nan bin tira un kontròl.
Tur hende ta gosando na nan mes manera. Nan ta grupo di hòmber ku ta traha duru den hòfi i pa hopi di nan e manera di relahá i saka tenshon ta sex. Pa e motibu aki tambe nan ta gusta bini espesífikamente ,e snek aki.
Papiando un tiki nechi i ku sèn den bo saku bo lo por satisfasé bo mes sigur ku un di e dama nan ku ta laborá na e senk aki, mas ku klaro pa un preis.
Emmanuel si no ta drei e style aki. E lo ke un relashon serio un dia i ta warda su mes pa e persona korekto.
Asina e ta bisa tur hende. Pero e realidat ta ku simplemente e tin miedu i no ke kumpra amor òf manera hopi lo yam'é, Satisfakshon pa sèn. E ke algu di bèrdat.
