الهاربه

الفصل الرابع عشر

《14》

كانت الساعه 9صبح لما علي رن على سلوى .. استمر يضرب عليها لين ناضت من نومها ..
خدت تليفونها و ناضت من جنب وجدي ..وخشت للدار التانيه ..
سلوى بصوت ناعس : خيرك من الصبح تتصل .. اهبلت انت..
علي : ايه هبلت .. و اني في راس الشارع توا كان ماتطلعيلي اقسم بالله نجيك لحوشكم و انديرلك فضيحه هكي كبرها ..
سلوى : ماتهددنيش ..
علي : لا بنهددك .. خلاص معاد عندي صبر نبي نشوفك و تواا ..
سلوى : لاا ..
علي : مش حنديرلك شي .. حنقعمزو في السياره و بسس نبي نشوفك و نهدرز عليك بس ..
سلوى سكتت ..
علي : خلاص امالا .. جايك للحوش .. اهو نازل اني ..
سلوى : انت من جدك ؟؟ ..
علي : ايه .. سلام ..

سلوى قلبها يدق و خايفه انه يديرها .. طلعت برا فتحت الباب بتتأكد من كلامه .. القاته نازل من سيارته و جاي على رجليه لحوشها ..
سلوى خشت ترعش .. تصلت بيه ..

سلوى : انت شنو تدير ..
علي : يلا قريب بنوصلك ..
سلوى : خلاص خلاص ارجع للسياره .. دقايق و نجيك ..
علي : 5دقاايق .. ماتجيش اقسم بالله بنجيك للحوش..
سلوى : به .. دقايق و نجي ..

سكرت سلوى و رجع علي لسيارته و على وجهه بسمة النصر .. و سلوى قلبها بيطلع من مكانه ..
خشت للدار لبست عبايتها و وشاح .. شافت لوجدي القاته راقد .. و طلعت ... غطت وجهها بالوشاح ..
شافها واحد من الجيران طلعت و ركبت في سياره ..

ولع علي السياره مشى بسرعه ..
سلوى : حي عليا .. زعما شافني حد..
علي : لااا .. مافي حد شافك صبح بكري من بيدورك..
سلوى : باهي بسرعه مانبي نتأخر وين بنمشو ..
علي : استراحتي ..
سلوى : استراحة شنو مش قلت بنهدرزو بس .. نزلني نزلني توا ..
قعدت سلوى تخبط ع الروشن ..
علي تلفت للسيارات لاحظو انها تخبط ..
علي : خلاص اسس يا مجنونه .. توا نمشو للبحر ..
سلوى هدت و قعمزت تشبحله بخوف و قلق ..
..................................
ناضت ليلى من الصبح و هي متحمسه و فرحانه انها بتقابل امها لبست وجهزت روحها .. وصل مصعب و مختار و الين القوها واقفه تراجي فيهم قدام الفندق ..
مختار : صباح الخيرر .. للدرجه هادي متحمسه..
صبحت عليهم ليلى ..
ليلى : اكيد ياعمي .. مش مصدقه اني بنشوف ماما ..
مصعب : مش قادر حتى نفكر انك بتغيبي عنا ..
الين باست ليلى : حتى اني .. بنستاحشك بالله ماتطوليش ..
ليلى : يصير خير ..

ركبو في السياره و طوووول ع المطار .. ودعوها بالدموع و انه على امل انها ترجعلهم .. لما بعدت عنهم رجعلها مصعب و ناداها .. تلفتتلا ليلى ..
ليلى : نعم ..
مصعب : اول ماتوصلي كلميني .. رقمي عندك ..
ليلى : اكيد..
مصعب قعد يشبحلها بنظره كلها حنيه : خايف عليك . حاس روحي ضروري نكون معاك .. مش عارف كيف بنخليك تمشي بروحك ..
ليلى : عادي يا مصعب .. ضروري نكون بروحي و نواجههم ..وانت .. انت حتكون معايا في كل لحظه في قلبي و عقلي ..
مصعب فرح بكلامها : ااخخ يا ليلى .. كان تعرفي بسس ..
ليلى : شنو ..
مصعب : حبيتك يا ليلى من قلبي .. مستحيل نعيش من غيرك .. ايام و نلحقك ..
ليلى قعدت تشبحلا و هو يشبحلها كانت تظراتهم حلوه تعبر عن اللي في داخلهم ..
ليلى : حي الطياره تو تفوتني ..
مصعب مد اصبعه قدامها يستفز فيها : يلا بسرعه ..
ليلى : مصععععععب .. خيرك ..
مصعب : ههههههه .. يلا في امان الله ..