الهاربه

الفصل الخامس

《5》

كانت ليلى واقفه في المطبخ تدور شنو تاكل .. فتحت الثلاجه مالقت شي .. ليها ايام ماكلت.. الحوش مافيه شي . وماتقدرش تطلع بروحها لانه وسام يقفل في الحوش عليها ولانها خايفه البلاد غريبه عليها و ماتعرف حد ...

ليلى: ضروري ندير حل لروحي .. اني لو استمريت هكي حنموت من الحسره و القهر .. ضروري نروح و نمشي لماما ..
قعمزت ليلى ع الكرسي و هي تفكر و تدور في حل..

ليلى : علاش ما نهرب ؟؟.. بس كيف ؟؟.. لالا مستحيل مش حنقدر نهرب .. وين بنمشي كان هربت هني بلاد غريبه و ناس منفتحه اكيد مش حيديرو فيا خير .. حنقعد في الشارع لين نلقى روحي قعدت بنت ليل .. لالا مش حنهرب خلاص .. تو ندور حل تاني ..
قعدت اتفكر و اتفكر .. لين سمعت صوت الباب ينفتح .. عرفت انه وسام جي .. وقفت تبي تخش للدار .. بس وسام وصل للمطبخ قبل ماتطلع منه ..

وقف وسام قعد يشبحلها بشوق .. ليه ايام ماشافهاش ..
و ليلى تشبحله بخوف ...
وسام : و اخيراااا شفت عيونك ..
ليلى بصوت مرعوش : بعد عن الباب نبي نخش للدار..
وسام : قداش ليك ماكليتيش .. شوفي اهو جايب بيتزا و حاجات ..
ليلى : مانبي منك شي .. بعد عن الباب نبي نرقد..
ليلى تشم في البيتزا و خاطرها فيها ..بس كابرت .. قربت من الباب و وسام كان مقابلها..
وسام : خلينا نتكلموو ..
ليلى سكتت ونزلت راسها.. كانت تبي تسايره على قد ماتقدر باش مايعصب و يدير فيها شي ..
وسام : اني مستعد نسمعك و نسمع كل شروطك ونكون زي ماتبي ..بس..
رفعت ليلى راسها ليه..
كمل وسام : الشرب و المخدرات مانقدرش نسيبهم..

ليلى فتحت عيونها على وسعهم و هي مصدومه و متفاجئه ..
وسام : ايه .. اني مدمن .. و ماعندكش حل الا انك ترضي بالامر الواقع .. و تسمعي كلامي .. عشان نعيشو حياتنا بكل راحه ومن غير مشاكل ...
ليلى بصوت عالي : انت تحكي من جدك ؟؟.. اني .. اني مانقدرش نكمل حياتي معاك .. اني الشرب ومش موافقه عليه .. ترجع تقولي انك مدمن مخدرات ..
وسام بصوت اعلى : ايه .. و حتقدري تعيشي معايا ..لانه ماعندك حل تاني ..
ليلى بصوت مترجي : طلقني .. و خليني نروح .. ارجوك يا وسام .. و كل واحد فينا يمشي في حاله ..
وسام : مستحيل.. طلاق لا .. اني حبيتك ..و نبيك معايا عمري كله .. مانقدر بلاك ..
ليلى وهي تبكي: باهي كان تحبني ارجع لعقلك .. بطل شرب و تعالج من الادمان .. ربي يتوب عليك و نكملو حياتنا من دون مشاكل ..
وسام حط يديه على ودانه : اسسسس .. لالااا لااا .. مانقدرش نبطل شي .. هادي حياتي و نبي نكملها هكي..و حتعيشي معايا وغصبا عنك ..
ليلى : لااا ياوسام .. ارجووك فكر ..اني مستعده نقعد معاك خطوه خطوه لين تتعالج لين تقعد احسن و افضل ..
وسام حط يده على رقبة ليلى و ضغط عليها بكل قوته .. لين حست انه النفس بيهرب عليها ..
وسام : معادش تعاوديه الكلام اهواا .. اقسم بالله نقتلك ...نقتلك ..