صحيت بصوت بقول "ضعو أحزمة الأمان ..الطائره على وشك الهبوط"،،عرفتا انو خلاص وصلنا،،ختيت الحزام واستعدلتا في قعدتي،،،الطياره نزلت وبعد مسافه قمنا احنا نزلنا ،،عملتا اجراءتي..وشلتا شنطي ،،بقيت م عارفه اعمل شنو،،قمتا فتحتا تلفوني وطبعا اي مطار بكون فيهو واي فاي،،جريت واي فاي ودخلتا الواتس رسلتا لناس الشركه،،م ردو لي سريع،،تقريبا نص ساعه انا واقفه،،بعدها قال لي واقفه وين انتي؟،،،قمتا وصفتا ليهو باللائحات غايتو،،بعد مسافه قال لي ارفعي راسك وانا ح ارفع يدي لو شفتي زول رافع يدو تعالي تجاهو،،فعلا بقيت بتلفت عشان اشوفو،،،بعد مساافه لمحتو من بعيد،،مشيت ناحيتو،،وقمتا رسلتا ليهو رساله فيها ايموجي،،طوالي تلفونو نور وجاتو الرساله ،،مشيت ليهو قلتا ليهو السلام عليكم انا امنيه،،سلم علي بحراره وزي كأنو بعرفني،،قال لي كيفك وكيف الاهل؟؟قلتا ليهو كويسين الحمدلله وانت كيف؟،،قال لي مف عوجه الحمدلله❤️وتاني قال لي واجهتي صعوبه في الجيه؟،،قلتا ليهو لالا ابدا،،قال لي طبعا السكن جمب الشركه والأكل والشراب علينا،،ح نديك يومين راحه وترتبي.امورك وبعد بكره تنزلي طوالي،،قلتا ليهو بس عايزه شريحه ،،قال لي ارح هسى.بطلعا ليك،،ركبنا تاكس،،ومشى طلع لي الشريحه وبعدها مشينا ووقفنا جمب حته كلها عمارات،،،قال لي انزلي،،نزلتا وهو شال شنطتي..طلعنا لحد م وصلنا جمب باب وفيهو رقم فوق..سلمني المفتاح وقال لي د شقتك..
قلتا ليهو تمام تسلم كتيير،،قال لي لحظه تلفونك ،،قمتا اديتو ليهو،،ركب لي الشريحه وفتحو(م فيهو رمز)،،وسجل رقمو ب حسام شركه،،قعدتا اضحك قلتا ليهو شركه د عندها كم معنى عندنا ف السودان😂😂😂😂،،قال لي كيف؟؟قلتا ليهو لمن يقول ليك الزول د شركه معناها لامي ناس كتار زابطين..وبرضو معناها الزول د مشرك لكم زول كدا وعندها معاني تاني،،قعد يضحك قال لي بس هنا بمعنى اني تبع ناس الشركه والشغل م عندو علاقه بالبتقولو د😂،،قلتا ليهو تمامم..قبل م يمشي قمتا قلتا ليهو لحظهه،،قام وقف وقال لي ماالك؟،،قلتا ليهو انت كيف بتتكلم سوداني؟؟،،انت موش إماراتي؟قعد يضحك وقال لي عندك قوه ملاحظه كويسه ،،انا اصلي من السودان بس قريت واشتغلتا هنا ،، وزاتو الناس الإيماراتيين البعرفهم بتكلمو انجليزي ،،الا انتي بس من لهجتك عرفتك سودانيه واتكلمتا معاك سوداني،،يلايلا بطلي كلام كتير وامشي خشي وارتاحي..ولو احتجتي لشي اتصلي علي..ومشى..
بقيت متحيره..دخلتا الشقه ماشاء الله تبارك الله سمحهه لمن عواره❤️❤️❤️ومرتبه ونظييفه وفيها ريحه حلوه ❤️،،فيها غرفتين وصالون كبير ومطبخ وحمام وبلكونه..
وفيها شاشات ومكيفات ومكتبه وحتى التلاجه لقيتا ملياااانهه مف شي ناقص،،للشاي د قاعد ،،قلتا والله يبختي😂❤️
مشيت الغرفه ورتبتا هدومي ف الدولاب ،،ولقيت انو خاتين تسريحه سمحه والفرشه والمشط والكريم حق الشعر والجسم وكلو خاتينو😂❤️،،شلتا لي بجامه من الدولاب ودخلتا الحمام،،حاجات كدا زاتو اول مره اشوفا😂(الم بتشوفو في بيت ابوك بخلعك)،،والصابون والشامبو وحاجات تانيه م فهمتها شنو😂😂،،المهم استحميت وغسلتا شعري وطلعتا مشيت المطبخ،،م فهمتا اي شي من الاكل د،،عملتا بيض ومعاهو زيتون وختيت النوتيلا😂،،اكلتا تماااااااااامم،،وغسلتا يديني ومشيت الغرفه عشان ارقد شوية،،اتذكرتا تلفوني،،شلتو واتصلتا علي حنين وطمنتها اني كويسه واستفسرت مني حاجات كتيره،،بعدها قالت لي انتبهي لنفسك كويس وانا كل يوم بضرب ليك،،قفلتا منها وضربتا لي توته،،وهي م قصرت جررررت معاي الونسه وحكيت ليها من اول شي لحد اخر شي😂،،بعدها سالتها من امي وابوي كيف؟قالت لي كويسين ،،واماني امبارح مشت المستشفى عشان بتها د عيت (م وريتكم اماني جابت بت وكبرت وعمرها 3سنين تقريبا وسمتها دان )قلتا ليها سجمي مالا؟قالت لي لالا كويسه بس شكلو نزلة عادية لكن اختك خوافه،،قلتا ليها ايواا تمام يلا قدي انا عايزه انوم،،قفلتا منها وعاينتا حولي كدا لقيت لي كبس،،شلتا شاحني ودخلتو فيهو وختيت تلفوني ف الشاحن..
فتحتا المكيف..بلاايي بارد بروود قربتا انوم وانا واقفه🤣💜رقدتا ف السرير ولييين كدا زي الكأنو جواهو موية م قطن🤣😂،،رقدتا واتغطيت ونمتتا نووم م عارفه زاتو مر كم من الزمن..
صحيت لقيت الواطه مضلمه..لقيت ف ساعه معلقه ف حيطه الغرفه كانت 2:00..قلتا لاحولا د كلو نوم؟..
مشيت شغلتا التلفزيون وبقيت بقلب ف القنوات ساي..لمن زهجتا قفلتو وطلعتا البلكونه،،بحاجه جميييلة شديييد بتشوف الشوارع د كلها وبليل بتكون جميلة شديد💜💜💜بس الانوار ظاهره وم بتحس انوو الوقت اتاخر ،،الناس كلها حايمه،،،،لقيت ف كرسي النوع حق زماان داك بتهزز معاك د..وجمبو ف تلاجه صغيره..
قعدتا ف الكرسي وبقيت بتهزز فتحتا التلاجه،،لقيت عصاير كتيييره وشكولاتات،،انا قلتا د شنو ي ربي؟ديل جايين ياكلونا ولا نشتغل؟..
شلتا لي شكولاتا وعصير وبقيت بتهزز وبعاين ف المنظر الجميل د..وباكل
