مراهقون و لكن

١٩

"كن جابراً كطفل صغير يعاني من متلازمة داون أسماهُ والداه (سليم)....؟!! "
ــــــــــــــــــــــــــــــــــــــــــــــــ
#في جانب أخر....
على صوت رئبال وهو بقول لأمو:أنا ما داير زول يكتر معاي كلام كتير مدرسة ما ماشيها ودا أخر كلامي يا حجة عليك الله أقفلي السيرة دي هسي لأني ما طايق روحي والله،،خلود شالت ليهو يدو وختتها في رأسها وقالت ليهو:حلفتك وحياتي عندك كان ما مشيت ما راضية عنك لي يوم الدين يا رئبال أنت زول ممتحن وعلمي كفاية الدروس الإتأخرت عليك ما تعاند يا ولدي الله يرضى عليك
_امي عليك الله ما تلخبطي الكيمان رضاك دا بالدنيا ومافيها وأنا ما بقدر علي غضبك لكن شنو قلت ليك هسي ما جاهز وما مستعد انزل وأقرأ كلها حكاية كم أسبوع وأوعدك أني حانزل اصلا السنة دي مجهجة ومتأخرين فعشان كدا حيجرو في المقرر عشان يخلصو سرعة الأفضل انو اجيب لي أساتذة يقروني في البيت وأكسر حنك المدرسة وأمتحن منزلي وأنا متأكد حأجيب نسبة كبيرة والله أها قلتي شنو؟؟
_شنو شنو؟؟منزلي!!لالاما ينفع تنزل المدرسة تقرأ زيك زي اي طالب هو قاليك المنزلي دا بقروهو ساي علي كيفهم لا دا عملو عشان ظروف ما سبهللي ساي يعني لو الزول  كان من ذوي الأحتياجات او زول شغال بالصباح وبرجع البيت يقرأ براهو لكن انت عندك شنو؟؟عشان أبوك بقى مافي داير تفرض رايك علي وتعمل فيها كبير هووي يا رئبال كان ابوك مات أنا لسع حية وكلمتى تمشى عليك زي الما حصل حاجة شفت يلا هسي كلمتين عندي ما بزيدهم المدرسة الأحد وخلصنا
_أووووففف طيب يا حجة الأحد الأحد خلاص حاضر ومشى وهو ما شايف قدامو من الزعل،،في اللحظة دي سديم جاء خاشي وقال:في شنو أصواتكم مالا عالية كدا؟؟،،خلود عاينت لرئبال البركب السلم بسرعة وقالت ليهو:شوف صحبك المجنون دا قال ما عايز ينزل المدرسة وعايز يقرأ منزلي ليييه وعشان شنو قال..هو قايل نفسو كبر وبقدر يقرر قرارات زي دي وأنا حية والله دي قلة ادب اولاد جديدة دي ،،سديم قال ليها:لا غلطان وستين ألف كمان والله أنا امشى أهديهو لأنو غضبان شديد وممكن يعمل في نفسو حاجة،،طلع ليهو فوق ولقاهو قاعد مكشر وبهز في رجلينو،،قعد جمبو وقال ليهو:شوف يا رئبال انا ما حأتكلم معاك في حتة أنك ما عايز تنزل المدرسة لكن كلامك بالطريقة دي مع أمك ما صح وفي النهاية هي امك لو قالت ليك امشي في النار تمش وأنت ساكت يلا هسي امشي أعتزر ليها وبوس رأسها وتعال لي نتفاهم في الجزئية بتاعت أنك عايز تمتحن منزلي،،رئبال كان غضبان وما طايق زول لدرجة لزاهو وقال ليهو بدون ما يفكر في كلامو:أنت مالك ومالنا دي حاجة بيني وبين أمي ما يخصك فاهم،،أم زي باقي الناس ما عندك كمان بتدخل في حاجاتنا،،سديم كان بعاين ليهو بصدمة وما مصدق البيحصل قدامو،،مسح دمعتو النزلت غصبا عنو ومشى بسرعة وقلبو مكسور من كلام صحبو البوجع،،رئبال حسى بالندم وقال وهو بخبط جبهتو:اخخخ شكلي زودتها بكلامي،،قبل وراهو لقى
لنى مربعة يدينها وبتعاين ليهو بغضب،،قال ليها بزهج:مالك أنتي كمان،،جات عليهو وقالت ليهو:بتبالغ يا رئبال دا شنو كلامك الجارح دا هو ما بيدو أنو أبوهو أو أمو يموتو حرام عليك ياخي دا صحبك وود عمتك أمشي أعتذر ليهو حالا قبل ما أكلم ليك ماما وهي بتعرف تتصرف معاك كيف
_بالجد ما عارف نفسي قلت ليهو كدا كيف تتفكري هو حيسامحني؟؟
_أيوا طبعا دا ما أي زول دا سديم صحبك المستحيل تفارقو وهو أكيد حينسى الحصل وتستمرو عادي يلا امشي أعتذر ليهو ولماما وكدا انت حتكون اخوي العسل المافي زيو،،رئبال باسها في خدها وقال ليها:
شكرا ليك يا لني طمنتيني شديد يااااخ نهبك وربي،، لنى أبتسمت وقالت:بلا نهبك معاك دي حركة منك عشان ما أكلم ماما،،نكش ليها شعرها وفحط،،هي همست مع نفسها:حلوين حلا ياخ وهم سوا الله يخليهم لي وما يحرمني منهم يا رب،،أما بهناك سديم كان في الجنينة وبحاول يحبس دموعو،،هو ما بيدو انو يبقى يتيم الأبوين بس يسوي شنو دا نصيبو أنو يعيش وحيد،،في اللحظة دي حسى بالضياع والوهن وهو بدونهم،،أتمنى لو كانو حيين كانو حيكونو أسعد عيلة،،اتذكر وسن هي برضها زيو عايشة بدون أهلها،،مع ناس ما بقربو ليها ومتحملينها بعد دا كلو ،،أحاسيسو كلها إتجمعت في شكل دموع وكان عايز يستسلم للبكى بس رئبال جاهو وملامحو بتدل علي الأسف،،قعد في المرجحانية جمبو وقال:أأ أنا أسف جرحتك بكلامي من غير قصد بس وربي كنت غضبان ولقيتك اقرب زول لي وإتفشيت فيك،،معليش أمسحها لي في وشى،،سديم قبل منو وهو ساكت،،رئبال حكى شعرو وقال:
سديم سديموه دودو ياخ ما تفصلها وتفكها حبة قلنا ليك أسفين ما تطلع زيت أبو أهلنا يا جن
_أنت ما غلطت في كلامك انا ما لي حق أتدخل بيناتكم أنا مجرد زول يتيم وعالة ما اكتر بي،،رئبال قال ليهو:أنا غلطت سامحني أرجوك وبقى يكفت في نفسو وقال ليهو: لو ما سامحتني ما حأوقف ضرب يهودا كلمتك وزاد في الضرب زيادة لمن خدو حمر،،سديم مسكو من يدو وقال ليهو:خلاص سامحتك بس ما تعيدها تاني اوكي؟؟
_أنا لو عدتها تاني أبقى أهبل وعوير في زول بزعل ليهو ود وجيه وسان أصلي زي دا والله إلا كان مسطول،،سديم ضحك طوالي،،رئبال قال ليهو:أيوا كدا فرفش ياخ وورينا سنوناتك الشينات ديل بالله هههههه
_تتذكر يا رئبال لمن كنا شفع صغار وقت نتشاكل وتاني نرجع نتصالح كنا بنقول شعار كدا كان ألفناهو زمان
_أيوا أيوا بتذكر كنا بنقول..(لو فجرو بركان رئبال وسديم أصحاب مهما كان) ههههه
_أي بس دا ياهو زاتو ههه،،فجأة سكت وملامح وشو إتغيرت وصوتو أتبح وقال:عارف يا رئبال هي أتغيرت شديد من أخر مرة شفتها فيها بالرغم من أثار الضرب والحرق ووزنها النزل شديد بس كانت جميلة زي،،زي أمي بالضبط
_منو هي؟
_وسن،،أختي وسن كان نفسي أحضنها وأبكي معاها وأعاتبها علي غيابها والعملتو دا بس ما قدرت كل الكنتو شايفو أمي وأبوي يوم جنازتهم لييه بس يا رئبال مكتوب على العذاب طوال حياتي ياتو ذنب أرتكبتو عشان أتعاقب كدا ما عارف مرات بحس اني قربت أكفر من كترت التفكير
_أستغفر ربك يا زول كلو شئ لخير وأنا متأكد أنك حتسامحها وحتعيشو سوا وأمك وأبوك حينبسطو منكم كتير وهم بشوفكم مع بعض،،
إتنهد وقال:إن شاء الله الأمور تتصلح يا رب اها حننزل يوم الأحد المدرسة جهزت حاجاتك؟؟
_لا وما عندي نفس أنزل زاتو ياخ لكن نسوي شنو الحجة حكمتنا خلاص
_طيب نرتب حاجاتنا بعدين هسي في فيلم ظابط حيبدا فيmbc2عايز تحضرو؟؟
_أوووبااا طيب يلا بينا
ـــــــــــــــــــــــــــــــــــــــــــــــــــــــــ
سامر كان طالع من الحمام بعد ما أخد ليهو دش كدا قعد في السرير وهو بدعك في جبهتو الكانت مألماه شديد،،بلع المسكن الجابتو ليهو أختو قبل ما يدخل الحمام،،إتسطح علي السرير وغمض عيونو...ذاكرتو رجعت لورا،،للمحل العاش فيهو أحلى أيامو وقابل هناك #حلومرو
#flash_back
#قبل_كم_سنة
كان طالع من بوابة كليتهم وهو بتكلم بالتلفون مع صحبو مهيب المستنيهو قريب من محل المواصلات،،ما كان شايف البت الحنطية الشعرها طويل الكانت جاية بإتجاهو وهو ما جايب ليها خبر،،عاين لرباط جزمتو لقاهو ما مربوط كويس،،أثناء ما بربط كدا لمح الفريم بتاعو واقع في الواطة مد يدو عشان يشيلو في يد ناعمة لمستو وكانت بتحاول تشيل الفريم منو،،هو طوالي زح يدو ورفع رأسو وطاااخ خبط البت في فكها،،البت مسكت فكها بألم وطوالي إنفصمت فيهو:يا حيوان أنت بترفع رأسك ساي وبعدين دي القلاس بتاعتي بتمد يدك وبتشيلها مني ليييه؟؟دا شنو الأولاد التافهين ديل،،سامر عاين ليها بسخرية وقال وهو بقلد صوتها:وبعدين دي القلاس بتاعتي..يا بتنا أنتي حوصة ولا حاجة؟؟الفريم دا for boys أمشي شوفي القلاس بتاعك بي وين،،ضحكت وهي بتأشر علي جهة صدرو وبتقول:دي فور بويز أما دي بتاعتي أنا،،قلة ادب أولاد وحركات وهمية زي دي ما بتنفع معاي فاهم؟ومشت بعد ما حدرت ليهو دسيس،،هو إتحسس صدرو لقى الفريم قاعد ضحك وقال:شتتتت يااا كنت عايز أشيل نظارة البت ساي لكن هي غلطانة بتلبس فريمات أولاد لشنو؟؟بالله وحدة ما قادرة تفرز بين فريم الأولاد والبنات لا وكمان بتتفلسف بالإنجليزي الشكية لله بس،،إتذكر أنو مفروض يعتذر للبت بعد موقفو البايخ معاها بس هي مشت وما عارف حيلاقيها متين تاني،،إتنهد وواصل طريقو وهو متمنى يلاقيها تانى،،
وصل لصحبو الكان مستنيهو بزهج وقال:معليش ياخ إتأخرت عليك بس حصل معاي موقف بايخ جدا في الطريق،،ملامح صحبو إتبدلت من الفضول وطوالى نسى زهجتو وقال ليهو:لاقيت ليك مزة وحاولت تحنك الرقم وأدت شاكوس صح؟؟ سامر ضحك وخت يدو في كتف مهيب وجراهو وقال:بحكي ليك بعد ما نركب المواصلات ،،بعد خمسة دقائق من الإنتظار كان جات حافلة وحدة وقفت الناس صنت كده وبقت متأهبة،،الكمساري نزل ومجرد ما قال (صينية)الناس دي فحطت لمن الكمسارب جري ووقف بالجمبة وهو مقلع عيونو،،منظر الناي وهي بتتدافر وتتشاكل والينط بالشباك واليحجز بالشنطة كان كافي بأنو تحس أنك في الغابة،،كل واحد بقاتل من أجل الحياة،،سامر ومهيب كانو في وسط المعركة دي،،مهيب قال لي سامر:بطريقتنا دي ما حنركب أبدا،،قال جملتو دي بعدها إنسحب من الناس ونط بالشباك بصعوبة وجازف ليهو كرسيين في شكرا وحجز لسامر معاهو،،طلع رأسو بالشباك وقال لسامر:تعال نط بالشباك أنا حجزت ليك معاي،،سامر ما صدق طوالي نط بالشباك وقعد،،والحافلة إتحركت وخلت مجموعة واقفين وبينبزو قدرتهم،،سامر عاين ليهم في واحد سمين كدا ووشو كلو معرق حدر ليهو وقال:شمتان فينا صح ياود الحرام؟؟مهيب قال ليهو:أسكت يا أب جيقة خليك قاعد هنا أصلك الليلة ما تمشى وقفل الشباك وخلاهو يتنابح وراهو،،سامر قال ليهو:ناس زهجانة تجي تتفشى في غيرها والله دي عوجة دي المواصلات دي طلعت ميتينا والله كلو يوم في حالة مدافرة ونطيط لمن عملنا لينا عضلات ههههه،،مهيب قال ليهو:والجابرك شنو يا ود العقيد ما كلم الحاج يشتري ليك عربية وريح نفسك وريحنا معاك يومي أنا ناقص5كيلو بسبب الجرى والنطيط لحمة تاني مافيني،،سامر قال ليهو:أنت عارف فهمي شنو يا مهيب لازم كلو مرة أعيد وأكرر في كلامي،،مهيب وهو بطلع قروش ويمدها للقدامو عشان يديها للكمساري:أيوا عارف أنت عايز تعتمد علي نفسك وتبدأ حياتك براك والأسطوانة القديتنا بيها دي
_طيب لو عارف بتسألنب كلو مرة لييه؟؟
_عايز أتأكد أنك ما غيرت رأيك لسع
_لا ما حأغيرو ولا تسألني تاني لأنك حتسمع نفس الرد
_غايتو رأسك الناشف دا حيجي زول ويكسرو ليك وأنا في وأنت في
_سيبك من الكلام دا ما عايز تسمع القصة؟؟
_اخخخ نسيت والله يلا أحكي يا مان سامعك
_كل الحكاية اني كنت طالع من الكلية وبتكلم معاك بالتلفون نزات عشان أربط رباط جزمتي كويس ولمحت فريمي واقع وكنت عايز أشيلو كدا في بت كان مدنقرة عايز تشيل الفريم برضو ولمست يدها بالغلط إتخلعت وطوالي رفعت رأسي وضربتها في فكها وهي هاجت فيني وبدت ترطن لي بالإنجليزي وطلع فعلا أنو الفريم حقها وبشبه حقي بس الغلطة منها هي لابسة فريم حق أولاد لييه المهم هي شبكتني ليك قلة ادب الأولاد والحركات الوهمية دي ما بتنفع معاي وغرصنت لي دسيس ومشت ياخ منظري كان بيش قدامها والله،،مهيب إتفقع بالضحك وقال ليهو:تكبر تنسى يا فردة عشان كدا قلنا ليك أركب حديد وجنن المزز فيك بس أنت ما داير تسمع كلامي تستاهل يلا
_كويس يا مهيب عشان كلامك دا حأجيب حديدة فنيطة وأغرف المزز معاي وأخليك تتمرمط في المواصلات أصبر بس خلي تعرصتك دي توديك البيت
_لا عليك دينك ياخ تهون عليك عشرتنا؟؟
_اي طبعا يا مان عشرتنا دي نفكها وأي واحد يشيل خمسة جنيه ونتفكفك
_الفيك ظهرت خلاص البينا كيس وشالو الهواء
سامر كان عايز يرد ليهو كدا بس فجأة في بت طقطقت للكمساري وقالت ليهو:نزلني هنا لو سمحتك،،سامر عاين ليها بصدمة وقال لمهيب:دي ياها نفس البت الحكيت ليها عنك،،مهيب قال ليهو:قاصد بيان؟؟
ــــــــــــــــــــــــــــــــــــــــــــــــــــــــــــ
زحف براحة لمكتب أبوهو ودخل المفتاح السرقو من أوضة أمو وهي نايمة في قفل الباب وفتحو براحة،،أتأكد من انو مافي زول شافو وهو بدخل بعدها قفل الباب عليهو وفتح النور عشان يباشر في شغلو الجنائي السري،،فرك يدينو بحماس وبدا يفتش في حاجة توصلو لطرف الخيط،،قلب الأدراج كلها ما لقى حاجة مهمة وفتش في الملفات بس ما لقى حاجة غريبة،،بعد ساعة من التفتيش أستسلم وكان عايز يمشي بس نظرو وقع علي سلة الوساخة،،قلبها في الواطة وبدا يفتش فيها ورقة ورقة،،الورق كان أغلبو فواتير وإيصالات بس في ورقة مطوية لفتت إنتباهو لأنو كان جزء كبير منها محروق فتح الورقة لقى فيها كلام إنجليزي ما واضح وكان في 4أرقام ظاهرة والباقي محروق وما واضح،،كل القدر يقرأهو كان أسم vandam،،أستغرب لأنو الأسم دا ما لاقاهو قبل كدا وما شكلو واحد من الشغالين مع أبوهو،،إتسائل جواهو وقال:طيب لييه أبوي حارق الورقة ومظهر فيها أسم الراجل دا يا ربي ممكن كدا نصل للقتل أبوي ولا لسع الحكاية أصعب من كدا!! هل أبوي كان عارف أنو حيموت عشان كدا خت الورقة ولا دي مجرد ورقة عادية والأسم دا ما أتحرق بالصدفة،،طيب والأرقام دي بتاعت شنو؟؟شكلي ماشي صح وكدا بديت أمسك طرف الخيط،،أبتسم وهو بدخل الورقة في جيبو وكان عايز يقوم كدا بس إتجمد في مكانو لمن سمع صوت زول بوراهو بقول:وسام؟؟بتسوي شنو في مكتب أبوك أنصاص الليل أنت؟؟!!